বাংলাদেশত সংঘটিত হৈছে আন এক হিন্দু পৰিয়ালৰ হত্যাকাণ্ড। জানিব পৰা মতে ৰংপুৰত এজন শিক্ষকৰ পৰিয়ালৰ ৪ জন সদস্যক নৃশংসভাৱে হত্যা কৰিছে কেইজনমান দুষ্কৃতিকাৰীয়ে। এই হত্যাকাণ্ডই যথেষ্ট উত্তেজনাৰ সৃষ্টি কৰিছে।
আৰক্ষীয়ে তদন্ত আৰম্ভ কৰিছে, অনুমান কৰা হৈছে যে এই হত্যাকাণ্ড দুদিন পূৰ্বে সংঘটিত হৈছিল। স্থানীয় ৰাইজে তলাবন্ধ ঘৰৰ পৰা দুৰ্গন্ধ ওলোৱাৰ পিছতে গম পায়। ইতিমধ্যে এই ঘটনাক মানৱ অধিকাৰ সংগঠনসমূহে সমালোচনা কৰিছে। বাংলাদেশৰ সংখ্যালঘু লোকৰ মাজত তীব্ৰ আতংক বিয়পি পৰিছে।
খবৰ অনুসৰি শনিবাৰে বাংলাদেশৰ ৰংপুৰ চহৰৰ কামাল কাচনা মাচুয়াপাৰা গাঁৱৰ তিনিমহলীয়া অট্টালিকাৰ পৰা আৰক্ষীয়ে এজন অৱসৰপ্ৰাপ্ত শিক্ষককে ধৰি পৰিয়ালটোৰ চাৰিজন সদস্যৰ মৃতদেহ উদ্ধাৰ কৰে। তলাবন্ধ ঘৰটোত ৬৫ বছৰীয়া অৱসৰপ্ৰাপ্ত বিদ্যালয় শিক্ষক গণপতি চক্ৰৱৰ্তী, পত্নী প্ৰীতিলতা চক্ৰৱৰ্তী, কন্যা আগামী চক্ৰৱৰ্তী আৰু পুত্ৰ আয়ুষ চক্ৰৱৰ্তীৰ মৃতদেহ উদ্ধাৰ হয়।
প্ৰাথমিক তদন্তত পোহৰলৈ আহিছে যে এদল দুষ্কৃতিকাৰীয়ে ঘৰত প্ৰৱেশ কৰি চোকা অস্ত্ৰৰে পৰিয়ালৰ লোককেইজনক হত্যা কৰে। কেৱল সেয়াই নহয়, হত্যাকাণ্ডৰ পূৰ্বে অৱসৰপ্ৰাপ্ত শিক্ষকগৰাকীৰ পত্নী আৰু কন্যাক ধৰ্ষণো কৰা হৈছিল।
ৰংপুৰ চি আই ডিৰ আৰক্ষী পৰিদৰ্শক আবু হাছান কবীৰে কয় যে, “গোটেই অট্টালিকাটোত দুৰ্গন্ধ বিয়পি পৰিছিল। কোনোবাই তেওঁলোকক হত্যা কৰিছে। সমগ্ৰ পৰিয়ালটো তিনিমহলীয়া অট্টালিকাটোৰ দ্বিতীয় মহলাত বাস কৰিছিল।”
কোতৱালি থানাৰ ভাৰপ্ৰাপ্ত অ’ চি এ কে এম নাজমুল কোৱাডাৰে জানিবলৈ দিয়া মতে, এই হত্যাকাণ্ড দুই-তিনি দিন পূৰ্বে সংঘটিত হোৱা বুলি অনুমান কৰা হৈছে। ইতিমধ্যে আৰক্ষীয়ে ঘটনাৰ তদন্ত আৰম্ভ কৰিছে আৰু এটা বিশেষ দল গঠন কৰা হৈছে। মৃতদেহ কেইটা মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰা হৈছে। এই নৃশংস হত্যাকাণ্ডৰ লগত জড়িত লোকসকলক চিনাক্ত কৰি শীঘ্ৰে গ্ৰেপ্তাৰ কৰা হ’ব বুলি আৰক্ষীয়ে আশ্বাস দিছে।
উল্লেখ্য যে বাংলাদেশৰ বিভিন্ন প্ৰান্তত হিন্দু সম্প্ৰদায়ৰ ওপৰত অত্যাচাৰ, সম্পত্তি দখল, মন্দিৰ ধ্বংস আদি কেইবাটাও ঘটনা পোহৰলৈ আহিছে। আনকি জীৱন্তে জ্বলাই হত্যা কৰাৰ ঘটনাও সংঘটিত হৈছে।
এনে পৰিপ্ৰেক্ষিতত হিন্দু শিক্ষকৰ পৰিয়ালৰ চাৰিজন সদস্যক একেলগে হত্যা কৰা ঘটনাই পুনৰ বাংলাদেশৰ সংখ্যালঘুসকলৰ সুৰক্ষাৰ প্ৰতি তীব্ৰ ভাবুকিৰ সৃষ্টি কৰিছে। ইতিমধ্যে বিভিন্ন মানৱ অধিকাৰ সংগঠনে এই হত্যাকাণ্ডক তীব্ৰ ভাষাৰে গৰিহণা দিয়াৰ লগতে শাস্তি প্ৰদানৰ দাবীত বিভিন্ন স্থানত প্ৰতিবাদো আৰম্ভ হৈছে।
