শেহতীয়াকৈ কোষাগাৰত হেনো বৰ নাটনি হৈছে। যাৰ বাবে বিজেপি শাসিত মধ্যপ্ৰদেশ চৰকাৰে ব্যয় হ্ৰাস কৰাৰ বাবে কেইবাটাও পদক্ষেপ গ্ৰহণ কৰিছে। মন্ত্ৰী-আমোলাৰ বিদেশ ভ্ৰমণত নিয়ন্ত্ৰণ অনা হৈছে। চৰকাৰী অনুষ্ঠানৰ বাবে বিলাসী হোটেলকে ধৰি বিভিন্ন খৰচো কৰ্তন কৰা হৈছে। ইপিনে সৰিয়হৰ ডুলিতে ওলাইছে ভূত।
অভিযোগ অনুসৰি ৰাজ্যত বাজেট আৱন্টনত প্ৰায় ৬০০ কোটি টকা লুণ্ঠন হৈছে। সুযোগ লৈ চৰকাৰী কৰ্মচাৰীয়ে কোটি কোটি টকা হৰলুকি কৰিছে। কোনো কোনো ক্ষেত্ৰত ভুৱা বিল দেখুৱাই ধন আত্মসাৎ কৰা হৈছে। কোনো কোনো ঠাইত একে কামৰ বাবে দুবাৰকৈ টকা আদায় দিয়া হৈছে।
অভিযোগ অনুসৰি চৰকাৰী কৰ্মচাৰীয়ে ধন আত্মসাৎ কৰি পত্নী আৰু আত্মীয়ৰ একাউণ্টলৈ ধন স্থানান্তৰ কৰিছে। সেই টকাৰে সম্পত্তি ক্ৰয় কৰা হৈছে। আকৌ কিছুমানে কেৱল জুৱা খেলি, মজ-মস্তি কৰি টকা উৰুৱাই দিছে।
এই অভিযোগ পোহৰলৈ অহাৰ লগে লগে কংগ্ৰেছকে ধৰি বিৰোধী দলসমূহ সৰৱ হৈ পৰিছে। মধ্যপ্ৰদেশৰ প্ৰাক্তন মুখ্যমন্ত্ৰী তথা কংগ্ৰেছ নেতা কমল নাথে কটাক্ষ কৰি কয় যে ৰাজ্যখনৰ বৰ্তমানৰ বিজেপি চৰকাৰখন অযোগ্য। সকলো দুৰ্নীতিগ্ৰস্ত। আনকি বিষয়া-কৰ্মচাৰীয়েও এই চৰকাৰক গুৰুত্ব নিদিয়ে। অলপো ভয় নকৰে।
ডিৰেক্টৰেট অফ ট্ৰেজাৰী এণ্ড একাউন্টনছৰ অধীনস্থ ৰাজ্যিক বিত্তীয় চোৰাংচোৱা কোষৰ তদন্তত এই বৃহৎ দুৰ্নীতি ফাদিল হৈছে। এই পৰ্যন্ত ৪০০ৰো অধিক কৰ্মচাৰীৰ বিৰুদ্ধে ৫৯খন এফআইআৰ দাখিল কৰা হৈছে। বিদ্যালয় শিক্ষা, ৰাজহ, আৰক্ষী, স্বাস্থ্যকে ধৰি ২৪টা বিভাগ তদন্তকাৰীৰ স্ক্যানাৰৰ অধীনত আছে। ইডি আৰু দুৰ্নীতি নিবাৰক শাখাই কেইবাটাওগোচৰৰ তদন্ত অব্যাহত ৰাখিছে।
জানিব পৰা মতে, চৰকাৰী ধন পৰিশোধৰ বাবে ব্যৱহাৰ কৰা ‘ইণ্টিগ্ৰেটেড ফাইনেন্সিয়েল মেনেজমেণ্ট ইনফৰ্মেশ্যন চিষ্টেম’ প্লেটফৰ্মৰ জৰিয়তে বিগত পাঁচ বছৰত বহু অনিয়ম সংঘটিত হৈছে। এই পৰ্যন্ত ১৯৯টা সন্দেহজনক লেনদেন চিনাক্ত কৰা হৈছে। এই ক্ষেত্ৰত প্ৰায় ৩০৫ কোটি টকা ৰাজকোষৰ পৰা চৰকাৰী বিষয়া-কৰ্মচাৰীৰ ব্যক্তিগত বেংক একাউণ্টত প্ৰৱেশ কৰিছে। লগতে অভিযুক্তৰ পত্নী আৰু আত্মীয়ৰ একাউণ্টলৈও ধন স্থানান্তৰ কৰা হৈছে।
নিয়ম অনুসৰি কোষাগাৰৰ ব্যক্তিগত জমা একাউণ্টত ২৯৩ কোটি টকা জমা ৰখাৰ কথা আছিল। সেই ধনো আন একাউণ্টলৈ ট্ৰেন্সফাৰ কৰা হৈছে। কৰ্মচাৰীৰ ডুপ্লিকেট ক’ড তৈয়াৰ কৰা আৰু লগইন পাছৱৰ্ড শ্বেয়াৰ কৰাৰ অভিযোগ উত্থাপন হৈছে। আনকি পঞ্জীয়নভুক্ত মোবাইল নম্বৰটোও সলনি কৰা হৈছিল যাতে ধনৰ লেনদেনৰ বাবে অ’টিপি আন এটা নম্বৰলৈ যায়। আৰু আন কোনেও গম নাপায়।
ইয়াৰ ফলত চৰকাৰৰ শীৰ্ষৰ পৰা নিম্নতম পৰ্যায়লৈকে বিষয়াসকলৰ অৱস্থা নিশাটোৰ ভিতৰতে জয়জয়-ময়ময় উঠিছে। কমল ৰাথোৰ নামৰ এজন প্ৰাক্তন ব্লক শিক্ষা বিষয়াই ২০ কোটি টকা আত্মসাৎ কৰে। আৰু সেই টকাৰে তেওঁ বালাজী ধাম নামেৰে এটা কলনী সাজি পেলাইছে। ইডিয়ে তেওঁৰ ৫৬টা প্লট সংলগ্ন(এটাছ) কৰিছে। ৰিপুদমন সিং নামৰ এজন সংশোধনী কেন্দ্ৰৰ সাধাৰণ চকীদাৰে মাহে প্ৰায় ৪ লাখ ৮২ হাজাৰ টকা দৰমহা উলিয়াইছিল। এইবোৰ দেখি তদন্তকাৰী বিষয়াসকলৰ চকু কপালত উঠিছে।
