সোণাপুৰৰ জুবিন ক্ষেত্ৰত আজি পুৱা সংঘটিত হ’ল এক ভয়ংকৰ বজ্ৰপাতৰ ঘটনা। বজ্ৰপাতৰ ফলত ক্ষেত্ৰখনত থকা এজোপা নাহৰ গছ উভালি পৰে। এই ঘটনাত ঘটনাস্থলীত উপস্থিত থকা তিনিগৰাকী মহিলা সামান্যভাৱে আহত হয়।
জানিব পৰা মতে, জুবিন গাৰ্গৰ প্ৰথম মৃত্যু বাৰ্ষিকী উপলক্ষে জুবিন ক্ষেত্ৰত বিভিন্ন প্ৰস্তুতি আৰু কাৰ্যসূচী চলি থকাৰ মাজতে এই ঘটনা সংঘটিত হয়। হঠাতে অহা বজ্ৰপাতৰ ফলত নাহৰ গছজোপা বাগৰি পৰাত তাত থকা লোকসকলৰ মাজত হুৱাদুৱা লাগে।
উভালি পৰা গছজোপাৰ ফলত জুবিন গাৰ্গৰ ছবি থকা এখন পোষ্টাৰ আৰু কাটআউটতো ক্ষতি হয়। ঘটনাৰ সময়ত কাটআউটখনৰ জুবিন গাৰ্গৰ মূৰৰ অংশ ছিঙি যোৱা বুলি জানিব পৰা গৈছে।
বজ্ৰপাতৰ ফলত জুবিন ক্ষেত্ৰৰ বিদ্যুৎ যোগানো কিছু সময়ৰ বাবে ব্যাহত হয়। ঘটনাটোৱে ইতিমধ্যে জুবিন ক্ষেত্ৰত উপস্থিত লোকসকলৰ মাজত উদ্বেগ সৃষ্টি কৰিছে। জুবিন গাৰ্গৰ প্ৰথম মৃত্যু বাৰ্ষিকীক কেন্দ্ৰ কৰি ক্ষেত্ৰখনত ব্যাপক প্ৰস্তুতি চলি থকাৰ সময়তে সংঘটিত এই ঘটনাই স্বাভাৱিকতেই সকলোকে চিন্তিত কৰি তুলিছে।
