ক্ষেত্ৰী আৰু সোণাপুৰৰ মাজত সংঘটিত এক ভয়ংকৰ পথ দুৰ্ঘটনাত ৭ জনকৈ লোকৰ কৰুণ মৃত্যু হোৱাৰ পাছতেই সমগ্ৰ অঞ্চলটোত তীব্ৰ উত্তেজনাই বিৰাজ কৰিছে। এই ঘটনাত ক্ষুব্ধ হৈ স্থানীয় ৰাইজ তথা বিভিন্ন দল-সংগঠনে তীব্ৰ প্ৰতিবাদ সাব্যস্ত কৰে। শেহতীয়া খবৰ অনুসৰি ক্ষুব্ধ প্ৰতিবাদী ৰাইজে সোণাপুৰ টোলগেটখন সম্পূৰ্ণৰূপে উচ্ছেদ কৰে।
এই ভয়ংকৰ ঘটনাৰ পাছতেই গুৱাহাটী মহানগৰ আৰক্ষী আয়ুক্তৰ কাৰ্যালয়ত এখন জৰুৰী আৰু গুৰুত্বপূৰ্ণ বৈঠক অনুষ্ঠিত হয়। বৈঠকত উপস্থিত থকা ডিমৰীয়াৰ বিভিন্ন দল-সংগঠনৰ প্ৰতিনিধিয়ে ৰাষ্ট্ৰীয় ঘাইপথ প্ৰাধিকৰণ আৰু ৰিং ৰোড কৰ্তৃপক্ষক এই দুৰ্ঘটনাৰ বাবে জবাবদিহি কৰে। মহানগৰ আৰক্ষী আয়ুক্ত পাৰ্থ সাৰথি মহন্তই ৰাষ্ট্ৰীয় ঘাইপথ প্ৰাধিকৰণ কৰ্তৃপক্ষৰ এনে চৰম দায়িত্বজ্ঞানহীনতাক লৈ ক্ষোভ প্ৰকাশ কৰে। আনহাতে, উপস্থিত ৰাইজে দুৰ্ঘটনাত নিহত আৰু আহতসকলক উচিত ক্ষতিপূৰণ নিদিয়া পৰ্যন্ত আৰু পথটো পুনৰ নিৰ্মাণ নকৰা পৰ্যন্ত কোনো ধৰণৰ টোল কৰ আদায় নিদিয়াৰ হুংকাৰ দিয়ে।
এই গুৰুত্বপূৰ্ণ বৈঠকত সাংসদ বিজুলী কলিতা মেধি, স্থানীয় বিধায়ক ড০ তপন দাস, কামৰূপ মহানগৰ জিলা আয়ুক্ত স্বপ্নীল পাল, পৰিবহন বিষয়া হিমাংশু দাস আৰু ৰাষ্ট্ৰীয় ঘাইপথ প্ৰাধিকৰণৰ দুজন উচ্চপদস্থ বিষয়া উপস্থিত থাকে। বৈঠকত সিদ্ধান্ত মৰ্মে সোণাপুৰৰ পৰা ৩৭নং ৰাষ্ট্ৰীয় ঘাইপথচোৱা মেৰামতিৰ বাবে ৰাষ্ট্ৰীয় ঘাইপথ প্ৰাধিকৰণক আজিৰ পৰা ৭ দিনৰ কঠোৰ সময়সীমা বান্ধি দিয়া হৈছে। মেৰামতিৰ কাম নিৰীক্ষণ কৰিবলৈ জিলা পৰিবহন বিষয়া, সোণাপুৰৰ মহকুমা আৰক্ষী বিষয়া, চক্ৰ বিষয়া, প্ৰকল্প সঞ্চালক আৰু দুজন স্থানীয় লোকক লৈ এখন বিশেষ কমিটী গঠন কৰা হৈছে। এই কমিটীয়ে অহা ৮ ছেপ্টেম্বৰত পথ নিৰ্মাণৰ অগ্ৰগতিৰ ওপৰত প্ৰতিবেদন দাখিল কৰিব লাগিব।
আনহাতে, কামৰূপ মহানগৰ জিলা আয়ুক্ত স্বপ্নীল পালে স্পষ্ট কৰি দিয়ে যে দুৰ্ঘটনাস্থলীত বৃহৎ গাঁত আছিল আৰু ইয়াত ৰাষ্ট্ৰীয় ঘাইপথ প্ৰাধিকৰণৰ ফালৰ পৰাও সম্পূৰ্ণ গাফিলতি আছিল। যদিও ৰাষ্ট্ৰীয় ঘাইপথ প্ৰাধিকৰণে পথৰ দায়িত্বত থকা ঠিকাদাৰক জগৰীয়া কৰিবলৈ চেষ্টা কৰিছে, জিলা আয়ুক্তগৰাকীয়ে কয় যে ঠিকাদাৰী সংস্থাই ঘনে ঘনে নীতি-নিয়ম আৰু ঠিকাদাৰ সলনি কৰি থকাটোও এটা ডাঙৰ সমস্যা। স্থানীয় ৰাইজে উত্থাপন কৰা অন্যান্য সমস্যাসমূহ অহা ৩ ছেপ্টেম্বৰত জিলা আয়ুক্তৰ নেতৃত্বত থকা পথ সুৰক্ষা সমিতিৰ জৰিয়তে পৰ্যবেক্ষণ আৰু আলোচনা কৰা হ’ব।
ইতিমধ্যে ৰাষ্ট্ৰীয় ঘাইপথ প্ৰাধিকৰণৰ ভুলৰ বাবে কঠোৰ পদক্ষেপ গ্ৰহণ কৰা হৈছে আৰু দিছপুৰ আৰক্ষীয়ে ৰাষ্ট্ৰীয় ঘাইপথ প্ৰাধিকৰণৰ দুজনকৈ বিষয়াক আটক কৰিছে। জানিব পৰামতে পৰিস্থিতিৰ বুজ ল’বলৈ আজি বিয়লি ২:৩০ বজাত ৰাজ্যৰ মুখ্যমন্ত্ৰী হিমন্ত বিশ্ব শৰ্মাই স্বয়ং সোণাপুৰৰ দুৰ্ঘটনাস্থলী পৰিদৰ্শন কৰিব।
