দিল্লীত ৫ ছেপ্টেম্বৰত অনুষ্ঠিত হ’বলগীয়া ‘ককৰোচ জনতা পাৰ্টী’ৰ প্ৰতিবাদী সমদলক বাধা দিবলৈ দাখিল কৰা আবেদন নাকচ কৰিছে ভাৰতৰ উচ্চতম ন্যায়ালয়ে। প্ৰতিবাদ বন্ধ কৰাৰ দাবীৰে দাখিল কৰা এই আৱেদনৰ ভিত্তিত সোমবাৰে ন্যায়ালয়ে কেন্দ্ৰ চৰকাৰ আৰু দিল্লী আৰক্ষীলৈ জাননী জাৰি কৰিছে। তথাপি, নিৰ্ধাৰিত প্ৰতিবাদৰ পূৰ্বে এই গোচৰৰ কোনো শুনানি নহ’ব বুলি স্পষ্ট কৰি দিছে উচ্চতম ন্যায়ালয়ে।
মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচী আৰু ন্যায়াধীশ ভি. মোহনৰ বিচাৰপীঠে এই বিষয়ৰ পৰৱৰ্তী শুনানিৰ দিন ধাৰ্য কৰিছে ১০ ছেপ্টেম্বৰ। বিচাৰপীঠে স্পষ্ট কৰি দিয়ে যে আইন-শৃংখলা ৰক্ষা কৰাটো আৰক্ষী আৰু চৰকাৰৰ দায়িত্ব। সেয়েহে আৱেদনকাৰীয়ে তেওঁৰ উদ্বেগৰ বিষয়ে চিন্তা-ভাবনা কৰি আৰক্ষীক অৱগত কৰা উচিত।
গত জুলাই মাহত পৰীক্ষাৰ প্রশ্নপত্র বিতৰণে হোৱা ভুলক লৈ কৰা প্রতিবাদত অংশগ্রহণ কৰা ছাত্র-ছাত্রীসকলৰ বিৰুদ্ধে দাখিল কৰা গোচৰসমূহ বাতিল কৰাৰ প্রতিশ্রুতি চৰকাৰে পূৰণ নকৰাৰ অভিযোগত চিজেপিয়ে এই প্রতিবাদৰ আহ্বান জনাইছে।
দিল্লী আৰক্ষীৰ অৱসৰপ্রাপ্ত বিষয়া ৰাজেন্দ্র সিঙে অধিবক্তা পুলকিত আগৰৱালৰ জৰিয়তে দাখিল কৰা এই আৱেদনত যুক্তি দিয়া হৈছিল যে প্রয়োজনীয় অনুমতি নোহোৱাকৈ ৰাজধানীৰ স্পৰ্শকাতৰ অঞ্চলত বৃহৎ প্রতিবাদ বা সমদল আয়োজন কৰিব নালাগে।
শুনানিৰ সময়ত আৱেদনকাৰীৰ অধিবক্তা ড. ৰিজৱান আহমেদে যুক্তি দৰ্শাই কয় যে ৫ ছেপ্টেম্বৰৰ সমদলৰ বাবে আয়োজকসকলে এতিয়ালৈকে কোনো অনুমতি বিচৰা নাই। ১২ পৰা ১৩ ছেপ্টেম্বৰলৈ দিল্লীত ব্রিকছ সন্মিলন অনুষ্ঠিত হ’বলগীয়া হোৱাৰ সময়ত আন্তর্রাষ্ট্রীয় সংবাদ মাধ্যমৰ উপস্থিতিত এনে প্রতিবাদে সমস্যাৰ সৃষ্টি কৰিব পাৰে বুলি তেওঁ উদ্বেগ প্রকাশ কৰে। সেয়েহে তেওঁ এই সমদল ১৫ ছেপ্টেম্বৰলৈ পিছুৱাই দিয়াৰ দাবী জনায়।
এৰ উত্তৰত মুখ্য ন্যায়াধীশ সূৰ্য কান্তে কয় যে বৰ্তমান সকলোৱে শান্তিপূৰ্ণভাৱে আচৰণ কৰিব বুলি ধৰি লোৱা হৈছে। কোনো অপ্রীতিকৰ ঘটনা ঘটিব বুলি আগতীয়াকৈ অনুমান কৰাৰ কোনো কাৰণ নাই বুলিও তেওঁ জনায়।
অধিবক্তা ড. আহমেদে গত ২০ জুলাইত চিজেপিয়ে আহ্বান জনোৱা ‘সংসদ মাৰ্চ’ত হোৱা হিংসাত্মক ঘটনাৰ কথা সোঁৱৰাই দিয়ে। তেওঁ অভিযোগ কৰে যে চিজেপিয়ে অনুমতি নিবিচাৰে প্রতিবাদ কৰে আৰু আন্তর্রাষ্ট্রীয় সংবাদ মাধ্যমৰ সন্মুখত আৰক্ষীৰ সৈতে সংঘাত বিচাৰে।
অৱশ্যে মুখ্য ন্যায়াধীশ সূৰ্য কান্তে পুনৰবাৰ স্পষ্ট কৰি দিয়ে যে আইন-শৃংখলা নিয়ন্ত্ৰণ কৰাটো চৰকাৰ আৰু আৰক্ষীৰ কাম। তেওঁলোকেই আইন অনুসৰি প্রয়োজনীয় ব্যৱস্থা গ্রহণ কৰিব।
