জ্বৰ হ’লে স্নান কৰিব নালাগে—এনে ধাৰণা বহু লোকৰ মাজত আছে। কিন্তু বিশেষজ্ঞসকলৰ মতে, জ্বৰ কোনো নিজা ৰোগ নহয়। শৰীৰত সংক্ৰমণ হ’লে তাৰ বিৰুদ্ধে যুঁজ দিয়াৰ সময়ত শৰীৰে স্বাভাৱিকভাৱে জ্বৰৰ সৃষ্টি কৰে। বেছিভাগ ক্ষেত্ৰতে পৰ্যাপ্ত বিশ্ৰাম, পানী আৰু সঠিক যত্ন ল’লে জ্বৰ ধীৰে ধীৰে কমি যায়। কিন্তু জ্বৰৰ সময়ত কৰা কিছুমান সাধাৰণ ভুলে সুস্থ হোৱাত পলম কৰিব পাৰে।
জ্বৰ হ’লে শৰীৰৰ তাপমাত্ৰা বৃদ্ধি পোৱাৰ লগতে ঘাম ওলোৱাৰ ফলত শৰীৰৰ পৰা যথেষ্ট পৰিমাণে পানী ওলাই যাব পাৰে। ইয়াৰ ফলত শৰীৰত পানীৰ অভাৱ বা ডিহাইড্ৰেচন হ’ব পাৰে। সেয়ে জ্বৰ হ’লে একেলগে অধিক পানী খোৱাৰ পৰিৱৰ্তে অলপ অলপকৈ বাৰে বাৰে পানী খোৱাটো ভাল। ইয়াৰ উপৰি ORS, ডাবৰ পানী, পাতল ছুপ অথবা সতেজ ফলৰ ৰস খাব পাৰি। ইয়াৰ ফলত দুৰ্বলতা, মূৰ ঘূৰণি আৰু মূৰৰ বিষৰ দৰে সমস্যা কিছু পৰিমাণে কমিব পাৰে।
জ্বৰৰ সময়ত শৰীৰৰ অধিকাংশ শক্তি ৰোগ প্ৰতিৰোধ ক্ষমতাই সংক্ৰমণৰ বিৰুদ্ধে যুঁজিবলৈ ব্যৱহাৰ কৰে। ফলত হজমৰ প্ৰক্ৰিয়াও কিছু ধীৰ হৈ পৰিব পাৰে। সেইবাবে এই সময়ত ভজা-পোৰা, অতিমাত্ৰা মছলাযুক্ত আৰু গধুৰ খাদ্য এৰাই চলাটো উচিত। তাৰ সলনি ভাত, খিচিৰি, ডাল, জাউ, পায়েস বা টোষ্টৰ দৰে পাতল আৰু সহজে হজম হোৱা খাদ্য খাব পাৰি।
আনহাতে, জ্বৰ কমাবলৈ বৰফঠাণ্ডা পানীৰে স্নান কৰাটো মুঠেও ভাল উপায় নহয়। অতি ঠাণ্ডা পানীৰ সংস্পৰ্শত শৰীৰত কঁপনি উঠিব পাৰে। এই কঁপনিয়ে শৰীৰৰ ভিতৰৰ তাপমাত্ৰা আৰু বৃদ্ধি কৰাৰ সম্ভাৱনা থাকে। সেয়ে জ্বৰ হ’লে ঠাণ্ডা পানীৰ পৰিৱৰ্তে কুহুমীয়া পানীৰে স্নান কৰাটো বেছি উপযোগী। স্নান কৰিবলৈ অসুবিধা হ’লে কুহুমীয়া পানীত কাপোৰ তিয়াই শৰীৰ মচি ল’বও পাৰি।
কেৱল ঔষধ খালেই জ্বৰ সোনকালে ভাল হৈ যাব বুলি ভাবিব নালাগে। শৰীৰক সুস্থ হ’বলৈ পৰ্যাপ্ত বিশ্ৰাম, টোপনি, পুষ্টিকৰ খাদ্য আৰু পৰিষ্কাৰ পৰিৱেশৰ প্ৰয়োজন। সেয়ে জ্বৰ হ’লে অযথা শাৰীৰিক পৰিশ্ৰম নকৰি শৰীৰক বিশ্ৰাম দিয়াটো অত্যন্ত জৰুৰী। পৰ্যাপ্ত বিশ্ৰামে ৰোগ প্ৰতিৰোধ ক্ষমতাক সংক্ৰমণৰ বিৰুদ্ধে যুঁজিবলৈ সহায় কৰে।
চিকিৎসকৰ পৰামৰ্শ অবিহনে নিজৰ ইচ্ছামতে ঔষধ খোৱাটোও এৰাই চলিব লাগে। কাৰণ জ্বৰৰ কাৰণ সদায় একে নহয়। সাধাৰণ ভাইৰাছজনিত সংক্ৰমণৰ পৰা আৰম্ভ কৰি আন বহুতো কাৰণত জ্বৰ হ’ব পাৰে। সেয়ে জ্বৰ বেছি দিন ধৰি থাকিলে, অতি বেছি তাপমাত্ৰা হ’লে অথবা আন কোনো গুৰুতৰ উপসৰ্গ দেখা দিলে চিকিৎসকৰ পৰামৰ্শ লোৱাটো জৰুৰী।
সৰল কথাত ক’বলৈ গ’লে, জ্বৰ হ’লে পানী কম নহ’বলৈ দিয়ক, সহজে হজম হোৱা খাদ্য খাওক, পৰ্যাপ্ত বিশ্ৰাম লওক আৰু ঠাণ্ডা পানীৰে স্নান কৰাৰ পৰা বিৰত থাকক। শৰীৰৰ সংকেতক আওকাণ নকৰি সময়মতে চিকিৎসকৰ পৰামৰ্শ লোৱাটোৱেই সুস্থ হোৱাৰ আটাইতকৈ নিৰাপদ পথ।
