চলিত বৰ্ষৰ ১২ আৰু ১৩ ছেপ্টেম্বৰত নতুন দিল্লীত অনুষ্ঠিত হ’বলৈ গৈ আছে অতি গুৰুত্বপূৰ্ণ ব্ৰিকছ সন্মিলন। এই উচ্চ পৰ্যায়ৰ গোলকীয় অনুষ্ঠানটোৰ পূৰ্বে ৰাজধানী চহৰখনৰ বিলাসী হোটেলসমূহত অভাৱনীয় পৰিস্থিতিৰ সৃষ্টি হৈছে। একেৰাহে কোঠাৰ নাটনি আৰু ভাড়াত অস্বাভাৱিক বৃদ্ধিয়ে এক প্ৰকাৰৰ হাহাকাৰ অৱস্থাৰ সৃষ্টি কৰিছে।
দেশৰ ৰাজধানীৰ কেইবাখনো নামজ্বলা হোটেলত এই সময়ছোৱাত কোনো কোঠা খালী নথকাৰ লগতে আন কিছুমানত আকাশলংঘী ভাড়া দাবী কৰা হৈছে। সংবাদ মাধ্যমৰ তথ্য অনুসৰি, ১১ আৰু ১২ ছেপ্টেম্বৰৰ বাবে তাজমহল আৰু দ্য অবেৰয় হোটেলত গ্ৰাহকৰ বাবে কোনো কোঠা উপলব্ধ নাই। একেদৰে, ১০ ৰ পৰা ১২ ছেপ্টেম্বৰলৈকে তাজ পেলেচত সকলো কোঠা ইতিমধ্যে বুকিং হৈ গৈছে আৰু দ্য লীলা পেলেচতো কোনো নতুন বুকিং গ্ৰহণ কৰা হোৱা নাই।
এই সময়ছোৱাত বিলাসী হোটেলৰ ভাড়াই সাধাৰণ মানুহৰ চকু কপালত তুলিছে। আই টি চি মৌৰ্য হোটেলত ১০ ৰ পৰা ১৩ ছেপ্টেম্বৰলৈকে থকাৰ বাবে এৰাতিৰ প্ৰাৰম্ভিক ভাড়া ২ লাখ ৩০ হাজাৰ টকাৰো অধিকলৈ বৃদ্ধি পাইছে। অৱশ্যে, এই ভাড়া আৰু কোঠাৰ উপলব্ধতা একেবাৰে স্থিৰ নহয়। গ্ৰাহকৰ বুকিং, বাতিলকৰণ আৰু অন্যান্য বিভিন্ন কাৰণৰ ওপৰত ভিত্তি কৰি ই যিকোনো মুহূৰ্ততে সলনি হোৱাৰ সম্ভাৱনা আছে।
