বেংগালুৰুত নতুন লেবেল লগাই পুৰণি আৰু ম্যাদ উকলি যোৱা খাদ্যসামগ্ৰী বিক্ৰী কৰাৰ অভিযোগত বৃহৎ অভিযান চলাইছে কৰ্ণাটকৰ খাদ্য আৰু ঔষধ প্ৰশাসন বিভাগে। খাদ্য সুৰক্ষাৰ নিয়ম মানি চলা হৈছে নে নাই, সেয়া পৰীক্ষা কৰিবলৈ একেৰাহে এসপ্তাহ ধৰি চলোৱা এই অভিযানত আমাজন আৰু ইনষ্টামাৰ্টৰ গুদামকে ধৰি কেইবাটাও স্থানৰ পৰা ভুৱা লেবেল লগোৱা আৰু ম্যাদ উকলি যোৱা খাদ্যসামগ্ৰী উদ্ধাৰ কৰা হয়। এই ঘটনাৰ সৈতে জড়িত এটা চক্ৰৰো সন্ধান পোৱা গৈছে। অভিযানত প্ৰায় ৩ কোটি টকা মূল্যৰ খাদ্যসামগ্ৰী জব্দ কৰা বুলি জানিব পৰা গৈছে।
কৰ্ণাটকৰ স্বাস্থ্যমন্ত্ৰী ইউ টি কাদেৰে মঙলবাৰে এই অভিযান সন্দৰ্ভত তথ্য প্ৰকাশ কৰে। তেওঁ কয় যে বেংগালুৰুত নিয়ম উলংঘনৰ অভিযোগত এখন ‘পেপটাইড পাৰ্টি’ বন্ধ কৰি দিয়া হৈছিল। সেই ঘটনাৰ তদন্ত চলাওঁতেই এই খাদ্যসামগ্ৰী যোগান ধৰা চক্ৰটোৰ সন্ধান পোৱা যায়। মন্ত্ৰীগৰাকীৰ মতে, বিভিন্ন তথ্যৰ ভিত্তিত সামগ্ৰীসমূহ ক’ৰ পৰা অনা হৈছিল সেয়া অনুসন্ধান কৰা হয় আৰু আমাজনৰ এটা ডাৰ্ক ষ্ট’ৰৰ পৰাও এই সামগ্ৰী আহিছিল বুলি পোহৰলৈ আহে।
ইয়াৰ পাছতে খাদ্য আৰু ঔষধ প্ৰশাসন বিভাগৰ বিষয়াসকলে দেবনাহাল্লিত থকা আমাজনৰ বিএলআৰ৬ গুদামত অভিযান চলায়। তাত প্ৰায় ১৪ লাখ টকা মূল্যৰ ভুৱা লেবেল লগোৱা খাদ্যসামগ্ৰী, ১০ লাখ টকা মূল্যৰ ম্যাদ উকলি যোৱা খাদ্যসামগ্ৰী আৰু অনুজ্ঞাপত্ৰ নথকা ২ লাখ ৪৫ হাজাৰ টকা মূল্যৰ ঔষধ জব্দ কৰা হয়। মাদিৱালাৰ আমাজনৰ বিএলআৰ৭ গুদামতো তল্লাশি চলোৱা হয়। সেই স্থানৰ পৰা ১৯ লাখ টকা মূল্যৰ ভুৱা লেবেলযুক্ত খাদ্যসামগ্ৰী, ১৩ লাখ টকাৰ ম্যাদ উকলি যোৱা খাদ্যসামগ্ৰী আৰু ১ লাখ ৫৭ হাজাৰ টকাৰ অনুজ্ঞাপত্ৰবিহীন ঔষধ উদ্ধাৰ কৰা হয়।
স্বাস্থ্যমন্ত্ৰীয়ে জনোৱা মতে, লিঙ্গৰাজপুৰমৰ এটা শ্বেডত ‘লিঅ’ ৭ এণ্টাৰপ্ৰাইজেছ’ নামৰ এটা সংস্থাই কাম চলাই আছিল। তালাচীত সেই স্থানৰ পৰা প্ৰায় ৫৭ লাখ টকা মূল্যৰ ম্যাদ উকলি যোৱা খাদ্যসামগ্ৰী উদ্ধাৰ কৰা হয়। অভিযানৰ পাছতে সেই কেন্দ্ৰটো বন্ধ কৰি দিয়া হৈছে।
আনহাতে, হোছকোটৰ এটা ইনষ্টামাৰ্ট কেন্দ্ৰতো অভিযান চলাই কৰ্তৃপক্ষই সেই স্থান বন্ধ কৰি দিয়ে। তাত এতিয়ালৈকে প্ৰায় ৪২ লাখ টকা মূল্যৰ ম্যাদ উকলি যোৱা খাদ্যসামগ্ৰী জব্দ কৰা হৈছে। খাদ্য আৰু ঔষধ প্ৰশাসন বিভাগে জানিবলৈ দিয়া মতে, কেন্দ্ৰটোত তদন্ত এতিয়াও চলি আছে আৰু তাত মজুত থকা ভুল লেবেলযুক্ত আৰু ম্যাদ উকলি যোৱা সামগ্ৰীৰ মুঠ মূল্য প্ৰায় ১ কোটি টকা হ’ব পাৰে।
এটা অভিযোগৰ ভিত্তিত এইচবিআৰ লে’আউটৰ ‘সপ্ত বজাৰ’ নামৰ দোকানতো অভিযান চলোৱা হয়। তাত প্ৰায় ১০ হাজাৰ টকা মূল্যৰ ম্যাদ উকলি যোৱা কাজু বিস্কুট, ৰাগিৰ আটা, চিকেন পেটি, পনীৰ, কুকিজ, বাদাম, কণী আৰু ময়দা জব্দ কৰা হয়।
স্বাস্থ্যমন্ত্ৰীয়ে কয় যে এনে কাৰ্যক কেৱল জৰিমনাৰ বিষয় হিচাপে নেদেখি ফৌজদাৰী অপৰাধ হিচাপে গণ্য কৰাৰ বাবে আইন বিভাগ আৰু কেন্দ্ৰীয় চৰকাৰলৈ পত্ৰ প্ৰেৰণ কৰা হৈছে। তেওঁৰ অভিযোগ অনুসৰি, বৰ্তমান এনে অনিয়মৰ ক্ষেত্ৰত প্ৰতিষ্ঠানৰ মালিকসকলে কেৱল জৰিমনা দিয়েই সাৰি যায়। কিন্তু জনসাধাৰণৰ স্বাস্থ্যৰ সৈতে জড়িত এনে ঘটনাক গুৰুতৰ অপৰাধ হিচাপে গণ্য কৰা উচিত বুলি তেওঁ মন্তব্য কৰে। লগতে এনে অনিয়মৰ বিৰুদ্ধে অধিক অভিযোগ দাখিল কৰিবলৈ সাধাৰণ লোককো আহ্বান জনায়।
ইফালে, পশ্চিমবংগৰ বিভিন্ন স্থানতো বিগত কিছুদিন ধৰি বাসি আৰু ভেজাল খাদ্যৰ বিৰুদ্ধে ধাৰাবাহিক অভিযান চলিছে। কলকাতা পৌৰসভাই এতিয়ালৈকে ৪০খন খাদ্য বিপণীৰ অনুজ্ঞাপত্ৰ স্থগিত কৰিছে। খাদ্য সুৰক্ষাৰ নিয়ম মানি চলা হৈছে নে নাই পৰীক্ষা কৰিবলৈ পৌৰসভাৰ বিষয়াসকলে চহৰখনৰ বিভিন্ন প্ৰান্তত থকা ৰেস্তোৰাঁ আৰু বৃহৎ বিপণীকেন্দ্ৰৰ খাদ্য প্ৰাংগণতো তালাচী চলাইছে।
অভিযানৰ সময়ত ৰন্ধনশালাৰ পৰিচালনা ব্যৱস্থা, খাদ্য মজুত কৰাৰ পদ্ধতি আৰু খাদ্যৰ মান পৰীক্ষা কৰা হৈছে। পৌৰসভাৰ এটা সূত্ৰৰ মতে, পচি যোৱা মাংস, ক’তো ছাই ধৰা মিঠাই আৰু ক’তো নিম্নমানৰ মছলা বা নিষিদ্ধ ৰং ব্যৱহাৰৰ তথ্য পোৱা গৈছে। কেইবাখনো নামী ৰেস্তোৰাঁ আৰু খাদ্য প্ৰাংগণতো অনিয়মৰ প্ৰমাণ পোৱাৰ পাছত সেইবোৰো নিষেধাজ্ঞাৰ তালিকাত অন্তৰ্ভুক্ত কৰা হৈছে।
