ইছলামীয় শিক্ষানুষ্ঠানসমূহৰ পৰ্যালোচনাৰ অংশ হিচাপে পশ্চিমবংগ চৰকাৰে ৰাজ্যখনৰ ২৫২ খন মাদ্ৰাছা বন্ধ কৰাৰ নিৰ্দেশ জাৰি কৰিছে। ইয়াৰ সমান্তৰালকৈ প্ৰথম পৰ্যায়ৰ প্ৰমাণীকৰণ প্ৰক্ৰিয়াত আন ১০০ খন মাদ্ৰাছালৈ কাৰণ দৰ্শোৱাৰ জাননী প্ৰেৰণ কৰা হৈছে। সংখ্যালঘু পৰিক্ৰমা মন্ত্ৰী ক্ষুদিৰাম টুডুৱে স্পষ্ট কৰি দিছে যে জাননী লাভ কৰা এই ১০০ খন শিক্ষানুষ্ঠানে যদিহে বৈধ অনুমোদনৰ প্ৰমাণ দাখিল কৰাত ব্যৰ্থ হয়, তেন্তে সেইসমূহো তৎকালীনভাৱে বন্ধ কৰি দিয়া হ’ব। ৰাজ্যখনৰ মুখ্যমন্ত্ৰী শুভেন্দু অধিকাৰীয়ে যোৱা জুন মাহত অনুমোদিত আৰু অনুমোদনহীন মাদ্ৰাছাসমূহৰ তথ্য সংগ্ৰহৰ বাবে সমগ্ৰ ৰাজ্যজুৰি এক জৰীপ চলোৱাৰ নিৰ্দেশ দিছিল।
মুখ্যমন্ত্ৰীৰ নিৰ্দেশৰ পাছতে সংখ্যালঘু পৰিক্ৰমা আৰু মাদ্ৰাছা শিক্ষা বিভাগে কলকাতাৰ লগতে ৰাজ্যখনৰ আন ২২ খন জিলাত এই সমীক্ষা চলাইছিল। জৰীপৰ সময়ত মাদ্ৰাছাসমূহৰ পৰিচালনা ব্যৱস্থা, ছাত্ৰ-ছাত্ৰীৰ নামভৰ্তি, পুঁজিৰ উৎস আৰু পঞ্জীয়নৰ স্থিতি পুংখানুপুংখভাৱে পৰীক্ষা কৰা হয়। প্ৰতিবেদন অনুসৰি, বন্ধৰ সন্মুখীন হোৱা ২৫২ খন মাদ্ৰাছাৰ সৰহভাগেই খাৰিজী সম্প্ৰদায়ৰ অন্তৰ্ভুক্ত। ইয়াৰে মালদহত ৪৪ খন, উত্তৰ দিনাজপুৰত ৩৭ খন, দক্ষিণ ২৪ পৰগণাত ৩২ খন আৰু নদীয়া তথা মুৰ্শিদাবাদত ২৫ খনকৈ মাদ্ৰাছা আছে। মন্ত্ৰী টুডুৱে সদৰী কৰা মতে, প্ৰাপ্ত তথ্যৰ ভিত্তিত প্ৰথম পৰ্যায়ত ২৫২ খন মাদ্ৰাছা বন্ধ কৰাৰ লগতে গুৰুতৰ অনিয়ম ধৰা পৰা আন ১০০ খনলৈ জাননী প্ৰেৰণ কৰা হৈছে। বৰ্তমান পশ্চিমবংগত বৈধ অনুমোদন থকা মাদ্ৰাছাৰ সংখ্যা হৈছে ২,১৩২ খন আৰু অনুমোদনহীন মাদ্ৰাছাৰ সংখ্যা হৈছে ২,৩৯৬ খন।
চৰকাৰৰ এই পদক্ষেপক লৈ পশ্চিমবংগৰ ৰাজনীতিত তীব্ৰ বাকযুদ্ধৰ সূত্ৰপাত ঘটিছে। ভাৰতীয় জনতা পাৰ্টিৰ ৰাজ্যিক সভাপতি শমীক ভট্টাচাৰ্যই চৰকাৰৰ সিদ্ধান্তক আদৰণি জনাই দাবী কৰে যে সীমান্তৱৰ্তী অঞ্চলসমূহত মৌলবাদী কাৰ্যকলাপ বৃদ্ধি পাইছে আৰু মাদ্ৰাছা শিক্ষাৰ আঁৰত চলা দেশবিৰোধী কাৰ্যকলাপ বন্ধ কৰাটো চৰকাৰৰ দায়িত্ব। একেদৰে, ৰাজ্যিক মন্ত্ৰী তথা বিজেপিৰ জ্যেষ্ঠ নেত্ৰী অগ্নিমিত্ৰা পলে এই কাৰ্যপন্থাৰ সমৰ্থনত কয় যে অনুমোদনহীন মাদ্ৰাছাসমূহে দেশবিৰোধী শিক্ষাক উদগনি দিছিল আৰু বাংলাদেশস্থিত সন্ত্ৰাসবাদীয়ে এনে শিক্ষানুষ্ঠানত আশ্ৰয় গ্ৰহণ কৰিছিল। শিক্ষা ব্যৱস্থাটোক শৃংখলাবদ্ধ কৰাৰ স্বাৰ্থতে এই পদক্ষেপ লোৱা হৈছে বুলি তেওঁ মন্তব্য কৰে। আনহাতে, তৃণমূল কংগ্ৰেছৰ বিধায়ক কুণাল ঘোষে চৰকাৰৰ এনে মন্তব্যৰ তীব্ৰ বিৰোধিতা কৰি কয় যে মাদ্ৰাছা হৈছে কেৱল এক শিক্ষা ব্যৱস্থা আৰু ইয়াৰ সৈতে সন্ত্ৰাসবাদক সাঙুৰি কৰা মন্তব্য কোনো কাৰণতে গ্ৰহণযোগ্য নহয়।
বৰ্তমান ৰাজ্য চৰকাৰে জাননী প্ৰেৰণ কৰা ১০০ খন মাদ্ৰাছাৰ পৰা উত্তৰ আৰু প্ৰমাণ পত্ৰৰ বাবে অপেক্ষা কৰিছে। এই নিৰ্ধাৰিত সময়সীমাৰ ভিতৰত প্ৰয়োজনীয় নথিপত্ৰ দাখিল কৰিব নোৱাৰিলে চৰকাৰৰ ফালৰ পৰা পৰৱৰ্তী কঠোৰ আইনী ব্যৱস্থা গ্ৰহণ কৰাটো নিশ্চিত বুলি ধাৰণা কৰা হৈছে। একে সময়তে, চৰকাৰৰ এই সিদ্ধান্ত আৰু ইয়াক লৈ সৃষ্টি হোৱা ৰাজনৈতিক বিতৰ্কই ৰাজ্যখনত পৰৱৰ্তী সময়ত কেনে প্ৰভাৱ পেলায়, সেয়া পৰ্যবেক্ষণৰ বিষয় হৈ পৰিছে।
