শুকুৰবাৰে নিশা যোৰহাট চিকিৎসা মহাবিদ্যালয় আৰু চিকিৎসালয়ত এক ভয়ংকৰ সংঘৰ্ষৰ সৃষ্টি হয়। স্থানীয় একাংশ যুৱকে এগৰাকী চিকিৎসক আৰু তিনিগৰাকী চূড়ান্ত বৰ্ষৰ এম বি বি এছ ছাত্ৰক আক্ৰমণ কৰা হয়। এই আক্ৰমণৰ পিছতে চিকিৎসালয়খনৰ চৌহদত তীব্ৰ উত্তেজনাই বিৰাজ কৰে। জানিব পৰা মতে, আক্ৰমণকাৰীসকলে চোকা অস্ত্ৰৰে তেওঁলোকক আক্ৰমণ কৰে।
আহত চিকিৎসকগৰাকীক ডাঃ ধীৰাজ পেগু বুলি চিনাক্ত কৰা হৈছে। আনহাতে আহত ছাত্ৰকেইগৰাকীৰ ভিতৰত অভিলেষ আৰু সুকুমাৰ দাসৰ নাম জানিব পৰা গৈছে। আটাইকেইগৰাকী আহত ব্যক্তিক যোৰহাট চিকিৎসা মহাবিদ্যালয়তে লগে লগে চিকিৎসা প্ৰদান কৰা হয়। বৰ্তমান তেওঁলোকৰ স্বাস্থ্যৰ অৱস্থা সুস্থিৰ বুলি জানিব পৰা গৈছে যদিও ইয়াৰে এগৰাকীৰ ভৰিত গুৰুতৰ আঘাত লাগিছে।
এই আক্ৰমণৰ পিছতে চিকিৎসালয়খনৰ হোষ্টেলৰ বহুতো আৱাসী একত্ৰিত হৈ চিকিৎসালয়ৰ বাহিৰত ওলাই আহে আৰু দোষীক বিচাৰি উলিয়াই কঠোৰ শাস্তি প্ৰদানৰ দাবী জনায়। পৰিস্থিতি অধিক বেয়া হোৱাৰ আশংকাত লগে লগে আৰক্ষীৰ দল ঘটনাস্থলীত উপস্থিত হৈ পৰিস্থিতি নিয়ন্ত্ৰণলৈ আনে। ইয়াৰ পিছতে ঘটনাৰ মূল অভিযুক্তই আৰক্ষীৰ ওচৰত আত্মসমৰ্পণ কৰাৰ খবৰ পোৱা গৈছে আৰু ইয়াৰ লগে লগে অঞ্চলটোৰ পৰিস্থিতি পুনৰ শান্ত হৈ পৰে।
আনহাতে, স্থানীয় যুৱকসকলে অভিযোগ কৰা অনুসৰি এই সংঘৰ্ষৰ আঁৰত আন এক কাৰণহে লুকাই আছে। তেওঁলোকৰ মতে, চিকিৎসালয়ৰ সমীপৰ এখন ৰাজহুৱা স্থানত একাংশ চিকিৎসা বিজ্ঞানৰ ছাত্ৰই সুৰাৰ বটল ভঙাৰ পিছতে তৰ্কাতৰ্কিৰ সূত্ৰপাত হৈছিল। সমগ্ৰ ঘটনাটোৰ প্ৰকৃত সত্য পোহৰলৈ আনিবলৈ আৰু প্ৰকৃত দোষীক চিনাক্ত কৰিবলৈ আৰক্ষীয়ে ইতিমধ্যে এক তদন্ত আৰম্ভ কৰিছে। আৰক্ষীৰ পুংখানুপুংখ তদন্তৰ পিছতহে ঘটনাৰ প্ৰকৃত কাৰণ ফাদিল হ’ব।
