তেওঁ তিনিবাৰকৈ দিল্লীৰ মুখ্যমন্ত্ৰী হিচাপে কাৰ্যনিৰ্বাহ কৰি আহিছে। প্ৰায় ১৩ বছৰ ৰাজধানীৰ মছনদত আছিল। বৰ্তমান এটা ৰাষ্ট্ৰীয় দলৰ মুৰব্বী। বহু বছৰ ধৰি তেওঁ দিল্লীত বসবাস কৰি আহিছে। তাৰপিছতো এইবাৰ অৰবিন্দ কেজৰিৱালৰ নাম ভোটাৰ তালিকাত নথকাক লৈ ডাঙৰ সন্দেহৰ সৃষ্টি হৈছে। কেজৰিৱাল সহ তেওঁৰ সমগ্ৰ পৰিয়ালে SIR-ৰ জাননী লাভ কৰিছে।
দিল্লীৰ প্ৰাক্তন মুখ্যমন্ত্ৰীগৰাকীৰ পত্নী সুনীতা কেজৰিৱাল, ২৫ বছৰীয়া পুত্ৰ পুলকিত কেজৰিৱাল, পিতৃ গোবিন্দ ৰাম কেজৰিৱাল আৰু মাতৃ গীতা দেৱীক SIR জাননী দিয়া হৈছে। কেজৰিৱাল আৰু তেওঁৰ গোটেই পৰিয়াল নতুন দিল্লী বিধানসভা সমষ্টিৰ বাসিন্দা। তেওঁৰ বুথৰ পৰা মুঠ ১১০ জনলৈ জাননী প্ৰেৰণ কৰা হৈছে।
কেজৰিৱালৰ পৰিয়ালক ‘আনমেপড’ শিতানত জাননী দিয়া হৈছে। অৰ্থাৎ পূৰ্বৰ SIR ৰ লগত তেওঁলোকৰ কোনো সংযোগ পোৱা নগ’ল। এতিয়া কেজৰিৱালৰ পৰিয়ালে আয়োগৰ বিষয়াৰ আগত হাজিৰ হ’ব লাগিব। তেওঁলোকে ভাৰতৰ বাসিন্দা বুলি প্ৰমাণ কৰিব লাগিব।
ইয়াৰ পূৰ্বে কেজৰিৱালে এই SIR প্ৰক্ৰিয়াক লৈ প্ৰশ্ন উত্থাপন কৰিছিল। তেওঁ কৈছিল যে বিজেপিয়ে ইচ্ছাকৃতভাৱে ভোটাৰৰ সংখ্যা হ্ৰাস কৰাৰ চেষ্টা চলাইছে। বিৰোধী ভোটাৰক নিৰ্বাচিতভাৱে বাদ দিয়া হৈছে।
দিল্লীৰ প্ৰাক্তন মুখ্যমন্ত্ৰীগৰাকীয়েও দাবী কৰে যে চৰকাৰে দেশৰ জনসংখ্যা কমাই দেখাব বিচাৰিছে। কেজৰিৰ দাবী, বিজেপিয়ে দেশৰ জনসংখ্যা ১৪০ কোটিৰ পৰা ৫০ কোটিলৈ হ্ৰাস কৰিব বিচাৰিছে।
মন কৰিবলগীয়া যে দিল্লীত চলি থকা SIR প্ৰক্ৰিয়াত বহু ভোটাৰক সন্দেহৰ তালিকাত ৰখা হৈছে। ১.৫ কোটি ভোটাৰৰ ভিতৰত ৪৭ লাখৰ নাম খচৰা তালিকাৰ পৰা আঁতৰাই ৰখা হৈছে।
আপৰ দাবী, কেজৰিৱালক হাৰাশাস্তি কৰিবলৈ এই জাননী দিয়া হৈছে। পঞ্জাৱত এই SIR প্ৰক্ৰিয়াৰ সময়ত ৰাঘৱ চাড্ডাকে ধৰি আপৰ একাংশ শীৰ্ষ নেতাই জাননী লাভ কৰিছিল। তাৰ প্ৰতিশোধ হিচাপে কেজৰীয়াললৈ জাননী দিয়া বুলি কোৱা হৈছে।
