কৰ্কট ৰোগৰ অত্যাৱশ্যকীয় ঔষধৰ অত্যধিক মূল্য নিৰ্ধাৰণক লৈ মঙলবাৰে তীব্ৰ প্ৰতিক্ৰিয়া প্ৰকাশ কৰিছে উচ্চতম ন্যায়ালয়ে। ৰোগীসকলৰ পৰা ঔষধৰ নামত অত্যধিক ধন আদায় কৰা কাৰ্যক সৰ্বোচ্চ ন্যায়ালয়খনে ‘দিন-ডকাইতি’ আখ্যা দিছে। ন্যায়াধীশ বিক্ৰম নাথ আৰু ন্যায়াধীশ সন্দীপ মেহতাৰ খণ্ড বিচাৰপীঠে কৰ্কট ৰোগৰ এবিধ অত্যাৱশ্যকীয় ঔষধৰ সৰ্বোচ্চ খুচুৰা মূল্য আৰু খুচুৰা বিক্ৰেতালৈ দিয়া মূল্যৰ মাজত দহ গুণ পাৰ্থক্য থকাৰ বিষয়ে অৱগত হোৱাৰ পাছতেই এই মন্তব্য প্ৰকাশ কৰে।
শুনানিৰ সময়ত বিচাৰপীঠখনে উল্লেখ কৰে যে কৰ্কট ৰোগৰ এবিধ অত্যাৱশ্যকীয় ঔষধৰ খুচুৰা বিক্ৰেতালৈ নিৰ্ধাৰিত মূল্য মাত্ৰ ২,৭০০ টকা হোৱাৰ বিপৰীতে ইয়াৰ সৰ্বোচ্চ খুচুৰা মূল্য ২৭,০০০ টকা ছপা কৰা হৈছে। মূল্যৰ এই অভাৱনীয় পাৰ্থক্যত তীব্ৰ উদ্বেগ প্ৰকাশ কৰি ন্যায়ালয়ে এনে অনৈতিক কাৰ্যক ৰোগীসকলৰ সৈতে কৰা এক প্ৰকাৰৰ ‘দিন-ডকাইতি’ৰ সমতুল্য বুলি অভিহিত কৰে। যিসমূহ কৰ্তৃপক্ষই এনে কাৰ্যৰ বিৰুদ্ধে কঠোৰ ব্যৱস্থা গ্ৰহণ কৰিব লাগিছিল, তেওঁলোকৰ নিশ্চুপ ভূমিকাক লৈয়ো বিচাৰপীঠখনে আশ্চৰ্য প্ৰকাশ কৰে। ঔষধৰ মূল্যৰ এই ভয়ংকৰ ব্যৱধানক লৈ প্ৰশ্ন উত্থাপন কৰি সৰ্বোচ্চ ন্যায়ালয়ে কয় যে খুচুৰা বিক্ৰেতাৰ মূল্যতকৈ দহ গুণ অধিক এমআৰপি নিৰ্ধাৰণ কৰাটো ধনদাবীৰ বাহিৰে আন একো নহয়। সাধাৰণ জনসাধাৰণে এনে ব্যয়বহুল চিকিৎসাৰ খৰচ বহন কৰিবলৈ গৈ নিজৰ ঘৰ-মাটি তথা আ-অলংকাৰ পৰ্যন্ত বিক্ৰী কৰিবলগীয়া এক দুখজনক পৰিস্থিতিৰ সৃষ্টি হয় বুলিও ন্যায়ালয়ে আক্ষেপ প্ৰকাশ কৰে।
ঔষধৰ মূল্য নিয়ন্ত্ৰণ আৰু ইয়াৰ সৈতে জড়িত কেতবোৰ গুৰুত্বপূৰ্ণ বিষয়কলৈ দাখিল কৰা দুখন সুকীয়া আৱেদনৰ শুনানিৰ সময়তে সৰ্বোচ্চ ন্যায়ালয়ে এই গুৰুত্বপূৰ্ণ পৰ্যবেক্ষণ আগবঢ়ায়। এটা গোচৰত কেন্দ্ৰীয় চৰকাৰক প্ৰতিনিধিত্ব কৰা অতিৰিক্ত ছলিচিটৰ জেনেৰেল কে এম নটৰাজে আদালতৰ মজিয়াত স্পষ্ট কৰি দিয়ে যে চৰকাৰে এই সমগ্ৰ আইনী প্ৰক্ৰিয়াটোক কোনো প্ৰতিদ্বন্দ্বিতামূলক স্থিতিৰে গ্ৰহণ কৰা নাই।
উল্লেখ্য যে, ইয়াৰে এখন আৱেদনত ফাৰ্মাচিউটিকেল কোম্পানী আৰু খুচুৰা বিক্ৰেতাসকলৰ দ্বাৰা অত্যাৱশ্যকীয় ঔষধৰ অনৈতিক মূল্য নিৰ্ধাৰণ প্ৰক্ৰিয়াত ৰোকা লগাই দৰৱসমূহ জনসাধাৰণৰ বাবে সুলভ কৰাৰ দাবী উত্থাপন কৰা হৈছে। ইয়াৰ সমান্তৰালভাৱে, ঔষধৰ মূল্য নিয়ন্ত্ৰণ নীতিৰ উলংঘন কঠোৰহাতেৰে ৰোধ কৰিবলৈ ‘ড্ৰাগছ (প্ৰাইচেছ কণ্ট্ৰোল) অৰ্ডাৰ, ২০১৩’ সবলৰূপত বলৱৎ কৰাৰ বাবেও ন্যায়ালয়ক অনুৰোধ জনোৱা হৈছে। আনহাতে, দ্বিতীয়খন আৱেদনত ৰোগীক সুলভ মূল্যৰ জেনেৰিক ঔষধৰ পৰামৰ্শ নিদিয়া চিকিৎসকসকলৰ বিৰুদ্ধে অনুশাসনমূলক ব্যৱস্থা গ্ৰহণৰ দাবী কৰা হৈছে।
সমগ্ৰ বিষয়টোৰ পুংখানুপুংখ পৰ্যালোচনাৰ অন্তত উচ্চতম ন্যায়ালয়ৰ বিচাৰপীঠখনে মত প্ৰকাশ কৰে যে বৰ্তমানৰ প্ৰেক্ষাপটতো ঔষধৰ মূল্য নিৰ্ধাৰণ প্ৰক্ৰিয়াটো এক গভীৰ উদ্বেগৰ বিষয় হৈয়েই আছে। এই স্পৰ্শকাতৰ তথা গুৰুত্বপূৰ্ণ গোচৰটোৰ পৰৱৰ্তী শুনানিৰ বাবে আদালতে অহা ২৯ ছেপ্টেম্বৰৰ দিনটো ধাৰ্য কৰিছে।
