আদানী এণ্টাৰপ্ৰাইজৰ দ্বাৰা তৰা এক অপৰাধমূলক মানহানিৰ গোচৰত সাংবাদিক ৰবি নায়াৰক কাৰাৰুদ্ধ কৰি ৰখা কাৰ্যক লৈ দেশ-বিদেশৰ বিভিন্ন সংবাদ সংস্থাই গভীৰ উদ্বেগ প্ৰকাশ কৰিছে। ডিজি পাব নিউজ ইণ্ডিয়া ফাউণ্ডেচন নামৰ স্বাধীন ডিজিটেল সংবাদ মাধ্যম আৰু সাংবাদিকসকলৰ সংগঠনে নায়াৰৰ কাৰাবাসক অতিশয় উদ্বেগজনক বুলি অভিহিত কৰিছে। এক্স অৰ্থাৎ পূৰ্বৰ টুইটাৰত কৰা ধাৰাবাহিক কিছু পোষ্টৰ বাবে নায়াৰৰ বিৰুদ্ধে এই গোচৰ চলাই থকা হৈছে। সংগঠনে উল্লেখ কৰা মতে, এই ঘটনাই শক্তিশালী কৰ্পোৰেট সংস্থাবোৰৰ বিৰুদ্ধে প্ৰশ্ন উকিওৱা স্বাধীন সাংবাদিকসকললৈ এক ভয়ংকৰ বাৰ্তা প্ৰেৰণ কৰিছে।
চলিত বৰ্ষৰ ফেব্ৰুৱাৰী মাহত গান্ধীনগৰৰ এক দণ্ডাধীশ আদালতে নায়াৰক এক বছৰৰ কাৰাদণ্ড বিহিছিল। কিন্তু আবেদন বিচৰাধীন হৈ থকা অৱস্থাত তেওঁৰ শাস্তি স্থগিত ৰখা হৈছিল আৰু তেওঁ জামিন লাভ কৰিছিল। অৱশ্যে শুনানিৰ সময়ত ব্যক্তিগতভাৱে উপস্থিত নথকাৰ বাবে চলিত মাহৰ আৰম্ভণিতে আদালতে তেওঁৰ বিৰুদ্ধে জামিনহীন গ্ৰেপ্তাৰী পৰৱানা জাৰি কৰে। ইয়াৰ পাছতে যোৱা ১৭ ছেপ্টেম্বৰত নায়াৰক জিম্মাত লৈ কাৰাগাৰলৈ প্ৰেৰণ কৰা হয়। নায়াৰে এই গ্ৰেপ্তাৰী পৰৱানাক প্ৰত্যাহ্বান জনাই মুক্তিৰ বাবে কৰা আবেদনৰ শুনানি গ্ৰহণ কৰি বুধবাৰে গুজৰাট উচ্চ আদালতে তেওঁক তাৎক্ষণিকভাৱে ৰায় নিদিয়াৰ সিদ্ধান্ত লয় আৰু শুনানি সংৰক্ষিত ৰাখে।
এই সমগ্ৰ বিষয়টো ২০২০ চনৰ অক্টোবৰৰ পৰা ২০২১ চনৰ জুলাই মাহৰ ভিতৰত নায়াৰে সামাজিক মাধ্যমত কৰা কিছু পোষ্টৰ সৈতে জৰিত। য’ত আদানী গ্ৰুপ, আমেৰিকাৰ হিল্ডেনবাৰ্গ ৰিচাৰ্চৰ অভিযোগ আৰু জৱাহৰলাল নেহৰু পোৰ্ট ট্ৰাষ্টৰ প্ৰস্তাৱিত ব্যক্তিগতকৰণৰ বিৰুদ্ধে চলা ধৰ্মঘট সংক্ৰান্তীয় বিষয় অন্তৰ্ভুক্ত আছিল। আদালতত দণ্ডাধীশে কৈছিল যে এজন সাংবাদিক তথা ৰাজহুৱা মন্তৱ্যকাৰী হিচাপে নায়াৰে ডিজিটেল মঞ্চত কৰা মন্তৱ্যই কাৰোবাৰ সুনামৰ ওপৰত পেলাব পৰা প্ৰভাৱৰ বিষয়ে সচেতন হোৱা উচিত আছিল। পৰৱৰ্তী সময়ত গান্ধীনগৰৰ আপীল আদালতে ৯ মাৰ্চত তেওঁক জামিন দি শুনানিত উপস্থিত থাকিবলৈ নিৰ্দেশ দিছিল, কিন্তু ৩ ছেপ্টেম্বৰৰ শুনানিত তেওঁ অনুপস্থিত থকাৰ বাবে জামিনহীন পৰৱানা জাৰি কৰা হয়।
ডিজি পাব ফাউণ্ডেচনে প্ৰশ্ন উত্থাপন কৰিছে যে মূল আবেদনৰ চূড়ান্ত ৰায় অহাৰ পূৰ্বেই কিয় এজন সাংবাদিকক কাৰাগাৰত ৰখা হৈছে। সংস্থাটোৱে কয় যে যিটো বৃহৎ ব্যৱসায়িক গোষ্ঠীয়ে এজন সাংবাদিকৰ বিৰুদ্ধে মানহানিৰ গোচৰ চলাইছে, তেওঁলোকেই শেষত এখন ডাঙৰ সংবাদ সংস্থা নিয়ন্ত্ৰণ কৰে য’ত আন সাংবাদিকসকলেও একেই বৃত্তিত কাম কৰে। ক্ষমতাশালী প্ৰতিষ্ঠানসমূহক প্ৰশ্ন সোধাৰ বাবে কাৰাদণ্ড ভুগিবলগীয়া হ’লে সংবাদ মাধ্যমৰ স্বাধীনতা ৰক্ষা পৰা কঠিন হৈ পৰিব বুলি তেওঁলোকে মত প্ৰকাশ কৰে।
এই সমগ্ৰ ঘটনাক লৈ আন্তৰ্জাতিক পৰ্যায়তো প্ৰতিক্ৰিয়া প্ৰকাশ পাইছে। নিউয়ৰ্ক ভিত্তিক বিশ্বব্যাপী সংবাদ সংৰক্ষণ সংস্থান committee to protect journalists অৰ্থাৎ চিপিজে-য়ে এই ঘটনাটোক নিৰন্তৰ নিৰীক্ষণ কৰি থকা বুলি জানিবলৈ দিয়ে। তেওঁলোকে কয় যে কেৱল নিজৰ দায়িত্ব পালন কৰাৰ বাবে কোনো সাংবাদিকক কাৰাৰুদ্ধ বা হাৰাশাস্তি কৰিব নালাগে। একেদৰে মঙ্গলবাৰে এমনিক্ৰেষ্টি ইণ্টাৰনেচনেলেও এই গ্ৰেপ্তাৰক লৈ গভীৰ উদ্বেগ প্ৰকাশ কৰি এই ঘটনাই দেশখনত বাক স্বাধীনতা আৰু ন্যায়সংগত বিচাৰৰ অধিকাৰৰ ওপৰত গুৰুতৰ প্ৰশ্ন উত্থাপন কৰিছে বুলি স্পষ্ট কৰি দিয়ে।
