দিল্লীৰ যন্তৰ মন্তৰত প্ৰতিবাদৰ সময়ত এগৰাকী মহিলাৰ ছবি কৃত্ৰিম বুদ্ধিমত্তাৰ সহায়ত বিকৃত কৰি প্ৰধানমন্ত্ৰী নৰেন্দ্ৰ মোডীৰ সৈতে যোৰা লগাই দিয়াৰ অভিযোগ উঠিছে। সেই ছবিখন ছ’চিয়েল মিডিয়াত বিয়পাই দিয়াৰ অভিযোগত‘ককৰোচ জনতা পাৰ্টি’ বা চিজেপিৰ একাংশ নেতাৰ বিৰুদ্ধে দাখিল কৰা গোচৰত শুকুৰবাৰে দিল্লী উচ্চ ন্যায়ালয়ে এক গুৰুত্বপূৰ্ণ নিৰ্দেশ জাৰি কৰে।
আদালতে চিজেপি নেতা অভিজিৎ দীপকে, সৌৰভ দাস, আশুতোষ ৰাংকা আৰু ৰত্ন সিংলৈ জাননী জাৰি কৰিছে। একে সময়তে মেটাক অভিযোগ থকা ছবি বা আনুষংগিক বিষয়বস্তু আঁতৰাবলৈ নিৰ্দেশ দিয়া হৈছে।
মহিলাগৰাকীয়ে অভিযোগ কৰে যে যন্তৰ মন্তৰত চিজেপিৰ প্ৰতিবাদৰ সময়ত অনুমতি অবিহনে তেওঁৰ ব্যক্তিগত ছবি সংগ্ৰহ কৰা হৈছিল। পিছত এআই ভিত্তিক ফেচ শ্বেপিং প্ৰযুক্তি ব্যৱহাৰ কৰি আপত্তিজনক ছবি এখনত তেওঁৰ মুখখন সলনি কৰা হয়।
অভিযোগ অনুসৰি সেই ছবিখন কেৱল অনলাইনত প্ৰচাৰ হোৱাই নহয়, প্ৰতিবাদস্থলীত বেনাৰতো ব্যৱহাৰ কৰা হৈছিল। পিছত সেই ছবি আৰু ইয়াৰ ভিডিঅ’ ছ’চিয়েল মিডিয়াত ভাইৰেল হৈ পৰে।
মহিলাগৰাকীৰ অধিবক্তা উমেশ চন্দ্ৰ শৰ্মাই আদালতত কয় যে এই ঘটনাত ইতিমধ্যে এফআইআৰ দাখিল কৰা হৈছে। কিন্তু অভিযোগ উত্থাপন হৈছে যে ছবিখন আঁতৰাই ঘটনাৰ লগত জড়িতসকলৰ বিৰুদ্ধে ব্যৱস্থা গ্ৰহণৰ বাবে পৰ্যাপ্ত পদক্ষেপ গ্ৰহণ কৰা হোৱা নাই।
মহিলাগৰাকীয়ে দাবী কৰিছে যে ছবিখন ভাইৰেল হোৱাৰ পিছত তেওঁ ভাবুকিৰ সন্মুখীন হৈ আহিছে আৰু নিৰাপত্তাহীনতাত ভুগি আছে।
বিষয়টোৰ গুৰুত্ব লক্ষ্য কৰি ন্যায়াধীশ গিৰীশ কাঠপালিয়াই কয় যে এয়া কেৱল এগৰাকী মহিলাৰ বিষয় নহয়, দেশৰ প্ৰধানমন্ত্ৰীৰ সৈতেও জড়িত হৈ আছে। সেয়েহে অভিযোগকাৰীৰ সুৰক্ষাৰ বিষয়টো চাবলৈ দিল্লী আৰক্ষীক নিৰ্দেশ দিছে আদালতে।
আদালতৰ নিৰ্দেশ অনুসৰি মহিলাগৰাকীক সম্পূৰ্ণ আৰক্ষীৰ নিৰাপত্তা প্ৰদান কৰা হ’ব। লগতে তেওঁৰ ঠিকনা ৰাজহুৱা নকৰিবলৈও নিৰ্দেশ দিয়া হৈছে। নিৰাপত্তাজনিত কাৰণত ঠিকনাটো কেৱল সংশ্লিষ্ট আৰক্ষী বিষয়াকহে জনোৱা হ’ব।
ইয়াৰ উপৰিও অভিযোগত থকা আপত্তিজনক বিষয়বস্তুৰ ৱেব লিংক আদালতত দাখিল কৰাৰ পিছত নিজৰ প্লেটফৰ্মৰ পৰা আঁতৰাই পেলাবলৈ মেটাক নিৰ্দেশ দিয়া হৈছে। দিল্লী আৰক্ষীক তদন্তৰ অগ্ৰগতিৰ প্ৰতিবেদন দাখিল কৰিবলৈ কোৱা হৈছে।
এই ঘটনাত ইতিমধ্যে দিল্লী আৰক্ষীৰ চাইবাৰ আৰক্ষী থানাত এটা গোচৰ ৰুজু কৰা হৈছে। জানিব পৰা মতে, ভাৰতীয় দণ্ডবিধিৰ সংশ্লিষ্ট ধাৰা আৰু তথ্য প্ৰযুক্তি আইনৰ অধীনত অচিনাক্ত ব্যক্তিসকলৰ বিৰুদ্ধে এফআইআৰ দাখিল কৰা হৈছে। অভিযোগকাৰীয়ে নিজকে কন্টেন্ট ক্ৰিয়েটৰ বুলি পৰিচয় দি দাবী কৰিছে যে তেওঁৰ ছবি তেওঁৰ সন্মতি অবিহনে ব্যৱহাৰ কৰা হৈছে।
অৱশ্যে চিজেপি নেতাসকলৰ বিৰুদ্ধে উত্থাপিত অভিযোগ আদালতত এতিয়াও প্ৰমাণিত হোৱা নাই। গোচৰটোত তেওঁলোকৰ বক্তব্য এই পৰ্যায়ত চৰ্চালৈ অহা নাই। দিল্লী উচ্চ ন্যায়ালয়ে এই গোচৰৰ পৰৱৰ্তী শুনানিৰ দিন হিচাপে ১৪ অক্টোবৰ নিৰ্ধাৰণ কৰিছে।
