আগন্তুক দুৰ্গা পূজাক সুৰক্ষিত আৰু শান্তিপূৰ্ণভাৱে অনুষ্ঠিত কৰাৰ লক্ষ্যৰে গুৱাহাটী জিলা প্ৰশাসন আৰু আৰক্ষীয়ে পূজা সমিতিসমূহৰ বাবে একাধিক কঠোৰ নিৰ্দেশনা জাৰি কৰিছে। শুকুৰবাৰে আমবাৰীৰ জিলা পুথিভঁৰালত অনুষ্ঠিত এখন বৈঠকত আৰক্ষী আৰু প্ৰশাসনৰ বিষয়াসকলে পূজা সমিতিৰ প্ৰতিনিধিসকলক এই নিৰ্দেশনাসমূহ অৱগত কৰে।
নিৰ্দেশনা অনুসৰি কোনো পূজা সমিতিয়ে আৰক্ষী আৰু অগ্নিনিৰ্বাপণ তথা জৰুৰীকালীন সেৱাৰ পূৰ্বানুমতি অবিহনে পূজা আয়োজন কৰিব নোৱাৰিব। পুৱা ৬ বজাৰ পৰা নিশা ১০ বজালৈ শব্দৰ মাত্ৰা ৫৫ ডেচিবেলৰ ভিতৰত ৰাখিব লাগিব। নিশা ১০ বজাৰ পিছত উচ্চ শব্দৰ ছাউণ্ড ছিষ্টেম ব্যৱহাৰৰ অনুমতি নাথাকিব। অশ্লীল গীত আৰু ‘আইটেম ছং’ বজোৱাতো নিষেধাজ্ঞা আৰোপ কৰা হৈছে।
নিৰাপত্তাৰ বাবে প্ৰতিটো পূজা মণ্ডপত চিচিটিভি কেমেৰা স্থাপন বাধ্যতামূলক কৰা হৈছে। পূজা সমিতিসমূহে স্বেচ্ছাসেৱকসকলৰ নাম-সহ সম্পূৰ্ণ তথ্য আগতীয়াকৈ আৰক্ষীক জমা দিব লাগিব। স্বেচ্ছাসেৱকসকলৰ একাংশই নিশাও মণ্ডপত উপস্থিত থাকি নিৰাপত্তা আৰু ভিৰ নিয়ন্ত্ৰণৰ দায়িত্ব পালন কৰিব লাগিব।
ইয়াৰ উপৰি মণ্ডপত পৃথক প্ৰৱেশ আৰু প্ৰস্থান পথৰ ব্যৱস্থা, পুৰুষ আৰু মহিলাৰ বাবে পৃথক শাৰী আৰু জৰুৰী পৰিস্থিতিত লোকক সুৰক্ষিতভাৱে বাহিৰলৈ উলিয়াই নিয়াৰ ব্যৱস্থা ৰাখিবলৈ নিৰ্দেশ দিয়া হৈছে। প্ৰতিটো মণ্ডপতে অভিজ্ঞ ইলেক্ট্ৰিচিয়ান উপস্থিত থকাৰ লগতে অগ্নিনিৰ্বাপণৰ উপযুক্ত ব্যৱস্থা থাকিব লাগিব। বৈদ্যুতিক আৰু অগ্নিনিৰাপত্তাৰ দায়িত্বত থকা কৰ্মীসকলক পূৰ্বেই প্ৰশিক্ষণ দিব লাগিব।
প্ৰতিটো পূজা মণ্ডপতে ‘No Tobacco’ আৰু ‘No Alcohol’ এলেকা বুলি স্পষ্টভাৱে জাননী প্ৰদৰ্শন কৰাটোও বাধ্যতামূলক কৰা হৈছে। পূজা উপলক্ষে শোভাযাত্ৰা উলিয়াবলৈ পূৰ্বানুমতি ল’ব লাগিব। ৰাস্তা বা ৰাজহুৱা যাতায়াতত বাধা সৃষ্টি হোৱাকৈ মণ্ডপ নিৰ্মাণ কৰিব নোৱাৰিব।
প্ৰতিমা বিসৰ্জনৰ ক্ষেত্ৰতো বিশেষ নিয়ম নিৰ্ধাৰণ কৰা হৈছে। প্ৰতিটো পূজা মণ্ডপৰ পৰা সৰ্বাধিক পাঁচগৰাকী লোকেহে প্ৰতিমাৰ সৈতে বিসৰ্জনস্থলীলৈ যাব পাৰিব। এইবাৰ নুনমাটিৰ চুনচালি ঘাটত বিসৰ্জন অনুষ্ঠিত নহ’ব। নাৰেংগী-নুনমাটি পূজা সমিতিয়ে কাচাৰী ঘাটত প্ৰতিমা বিসৰ্জন কৰিব লাগিব বুলি প্ৰশাসনে জনাইছে।
