এইবাৰ পৃথিৱীৰ দিশে আহি আছে সৌৰ ছুনামী। সূৰ্য্যত ইটোৰ পিছত সিটোকৈ শক্তিশালী বিস্ফোৰণ ঘটিছে। সেইবাবেই পৃথিৱীৰ পিনে সৌৰ ধুমুহা আহিব পাৰে। অতি উত্তপ্ত প্লাজমাৰ বিশাল ঢৌ নামি আহিব পাৰে বুলি বিজ্ঞানীসকলে আশংকা কৰিছে। ইয়াক ‘ছলাৰ ছুনামী’ বা সৌৰ ছুনামী বুলি কোৱা হয়।
মহাকাশৰ বতৰৰ এই পৰিৱৰ্তনৰ ফলত পৃথিৱীত মৃদুৰ পৰা প্ৰবল ভূ-চুম্বকীয় ধুমুহা আহিব পাৰে। আনকি এই ছুনামী চকুত দেখা পোৱা যাবও পাৰে। এই ক্ষেত্ৰত সপ্তাহান্তিক দিনত আকাশত অপূৰ্ব মেৰুজ্যোতি বা অৰোৰা দেখা যাব পাৰে।
অৱশ্যে পোহৰৰ এই খেলা ক’ত আৰু কিমান স্পষ্টকৈ দেখা যাব সেয়া সৌৰ ধুমুহাৰ তীব্ৰতা আৰু চুম্বকীয় ক্ষেত্ৰৰ অৱস্থানৰ ওপৰত নিৰ্ভৰ কৰিব বুলি বিশেষজ্ঞসকলে জনাইছে।
মহাকাশৰ বতৰৰ পূৰ্বাভাস অনুসৰি ৯ অক্টোবৰ আৰু ১১ অক্টোবৰত পৃথিৱীৰ চুম্বকীয় ক্ষেত্ৰত সৰ্বাধিক তিনিটা ক’ৰ’নেল মাছ ইজেকচনে আঘাত কৰিব পাৰে। এই বিস্ফোৰণৰ ফলত সূৰ্য্যৰ পৰা অহা বৃহৎ পৰিমাণৰ আধানযুক্ত কণা আৰু চুম্বকীয় ক্ষেত্ৰ মহাকাশলৈ বিয়পি পৰে। পৃথিৱীৰ চুম্বকীয় ক্ষেত্ৰৰ লগত ইহঁতে পাৰস্পৰিক ক্ৰিয়া কৰিলে ভূ-চুম্বকীয় ধুমুহাৰ সৃষ্টি হ’ব পাৰে।
এই পূৰ্বাভাস অনুসৰি এই ধুমুহাৰ তীব্ৰতা G1 বা মৃদুৰ পৰা G3 বা প্ৰবল হ’ব পাৰে। গতিকে বিশেষজ্ঞসকলে এই বিষয়টোৰ ওপৰত চকু ৰাখিছে।
যদিহে ধুমুহাৰ তীব্ৰতা বেছি হয় তেন্তে অৰোৰা বা ৰঙীন পোহৰৰ খেল দেখাৰ সম্ভাৱনা বৃদ্ধি পাব পাৰে। অৱশ্যে সেইটো যে দেখাই যাব সেয়া নিশ্চিত নহয়। সৌৰ পদাৰ্থৰ লগত অহা চুম্বকীয় ক্ষেত্ৰৰ শক্তি আৰু দিশৰ ওপৰত বহু কথা নিৰ্ভৰ কৰিব।
৮ অক্টোবৰৰ পৰা হঠাতে সূৰ্য্য সক্ৰিয় হৈ পৰিছে। সিদিনা ছানস্পট ৪৫৪৯ নামেৰে জনাজাত সৌৰকলংক এটাৰ পৰা আন এক বিস্ফোৰণ ঘটিছিল।ইয়াৰ ফলত M6.7 শ্ৰেণীৰ সৌৰজ্বলন (ছলাৰ ফ্লেয়াৰ)ঘটিছিল।
এম শ্ৰেণীৰ সৌৰজ্বলনক মধ্যমীয়া শক্তিশালী বিস্ফোৰণ বুলি গণ্য কৰা হয়। এনে বিস্ফোৰণে ৰেডিঅ’ যোগাযোগৰ ক্ষেত্ৰত সমস্যাৰ সৃষ্টি কৰিব পাৰে। ইয়াৰ উপৰিও মহাকাশৰ বতৰৰ ওপৰত অন্যান্য প্ৰভাৱো বৃদ্ধি পাব পাৰে।
এই বিস্ফোৰণৰ ফলত এক বিশাল সৌৰ ছুনামী সমগ্ৰ সূৰ্য্যৰ বায়ুমণ্ডলত বিয়পি পৰে। বৈজ্ঞানিকভাৱে ইয়াক মৰ্টন তৰংগ বোলা হয়। শক্তিশালী সৌৰ বিস্ফোৰণৰ পিছত সূৰ্যৰ বায়ুমণ্ডলত গৰম প্লাজমা আৰু চুম্বকীয় শক্তিৰ এক বিশাল ঢৌ দ্ৰুতগতিত বিয়পি পৰে।
জানি আচৰিত হ’ব যে এই ঢৌৰ আঘাতৰ সন্মুখৰ অংশৰ বিস্তাৰ পৃথিৱীৰ আকাৰতকৈ বহু বেছি হ’ব পাৰে। ইয়াৰ গতিবেগ প্ৰতি ঘণ্টাত ১০ লাখ মাইলতকৈও অধিক হ’ব পাৰে।
আচলতে ঢৌ বিয়পি পৰাৰ সময়ত সূৰ্য্যৰ পৰা ক’ৰ’নেল মাছ ইজেকচন বা চিএমইও নিৰ্গত হয়। পূৰ্বাভাস অনুসৰি এই চিএমই ১১ অক্টোবৰত পৃথিৱীৰ অতি ওচৰেৰে পাৰ হ’ব পাৰে।
সৌৰ বিস্ফোৰণৰ ফলত নিৰ্গত হোৱা চিএমই পৃথিৱীত উপনীত হ’বলৈ কেইঘণ্টামানৰ পৰা কেইদিনমান সময় লাগিব পাৰে। ১১ অক্টোবৰত পৃথিৱীৰ অতি ওচৰেৰে পাৰ হ’ব পাৰে বুলি আশা কৰা হৈছে।
এই সৌৰ বস্তুটো পৃথিৱীৰ কাষ চাপিলে ইয়াৰ চুম্বকীয় ক্ষেত্ৰখনে পৃথিৱীৰ চুম্বকমণ্ডলত বিঘিনি ঘটাব পাৰে। ইয়াৰ ফলত ভূ-চুম্বকীয় ধুমুহা সৃষ্টি হ’ব পাৰে।
এই ধুমুহাৰ সময়ত সূৰ্য্যৰ পৰা অহা আধানযুক্ত কণাবোৰে পৃথিৱীৰ ওপৰৰ বায়ুমণ্ডলত থকা গেছবোৰৰ লগত ক্ৰিয়া কৰে। ফলত আকাশত অৰোৰা বা অপূৰ্ব মেৰুজ্যোতি গঠন হ’ব পাৰে। ধুমুহা যিমানেই প্ৰবল হ’ব সিমানেই দূৰলৈ অৰোৰাবোৰ দেখা যায়। অৱশ্যে এই দৃশ্য যে দেখা যাবই তাৰ কোনো নিশ্চয়তা নাই।
ভূ-চুম্বকীয় ধুমুহাৰ প্ৰভাৱ কেৱল আকাশত পোহৰৰ খেলাতেই সীমাবদ্ধ নহয়। ফলত উপগ্ৰহ, নেভিগেচন ব্যৱস্থা, উচ্চ কম্পাঙ্ক ৰেডিঅ’ যোগাযোগ আৰু অতি প্ৰবল ধুমুহাৰ ক্ষেত্ৰত শক্তি যোগান ব্যৱস্থাও প্ৰভাৱিত হ’ব পাৰে।
এই সময়ছোৱাত মেৰু অঞ্চলৰ পৰা আকাশত অৰোৰা দেখা যায়। কাৰণ অমাৱস্যাৰ ওচৰাওচৰি সময়ত চন্দ্ৰৰ পোহৰ কমি যাব। নিশাৰ আকাশ তুলনামূলকভাৱে ক’লা হ’ব। ফলত অৰোৰাৰ ফটো তোলাৰ বাবে পৰিস্থিতি অনুকূল হ’ব পাৰে।
কিন্তু সৌৰ ধুমুহাটো শেষত কিমান শক্তিশালী হ’ব সেয়া নিৰ্ভৰ কৰিব পৃথিৱীৰ ফালে অহা চিএমইবোৰৰ চুম্বকীয় ক্ষেত্ৰৰ গতি, ঘনত্ব আৰু দিশৰ ওপৰত।
পৃথিৱীৰ চুম্বকীয় ক্ষেত্ৰখন কিমান প্ৰভাৱিত হ’ব পাৰে সেই কথা বুজিবলৈ বিজ্ঞানীসকলে সূৰ্য্যৰ কাৰ্যকলাপ আৰু পৃথিৱীৰ ফালে অহা সৌৰ পদাৰ্থৰ গতিবিধি নিৰীক্ষণ কৰি আছে।
