২০২৪ চনৰ ৫ আগষ্টত ছাত্ৰ বিদ্ৰোহৰ সন্মুখীন হৈ পদত্যাগ কৰি ভাৰতলৈ পলায়ন কৰাৰ সময়ত প্ৰাক্তন প্ৰধানমন্ত্ৰী শ্বেখ হাছিনাই হেলিকপ্টাৰত উঠাৰ বহু চৰ্চিত ভিডিঅ’ ৰেকৰ্ডিং কৰা অন্যতম ব্যক্তি হিচাপে পৰিচিত আছিল বাংলাদেশৰ প্ৰাক্তন বায়ুসেনাৰ বিষয়া কে এম তাহছিফ ছাওৰী। ঢাকাৰ তুৰাগ নদীৰ পৰা উদ্ধাৰ হৈছে ২৮ বছৰীয়া প্ৰাক্তন ফ্লাইট লেফটেনেন্টগৰাকীৰ মৃতদেহ।
নিৰুদ্দেশ হোৱাৰ ২৪ ঘণ্টাৰো অধিক সময়ৰ পাছত ২৮ অক্টোবৰত উদ্ধাৰ হোৱা তেওঁৰ অস্বাভাৱিক মৃত্যুৰ ৰহস্য ক্ৰমান্বয়ে ঘণীভূত হৈ পৰিছে। পৰিয়ালে এয়া পৰিকল্পিত হত্যাকাণ্ড বুলি অভিযোগ উত্থাপন কৰিছে।
উত্তৰাত পৰিয়ালৰ সৈতে থকা তাহছিফে ২৭ অক্টোবৰৰ সন্ধিয়া বন্ধুৰ সৈতে মটৰবাইক মেৰামতি কৰিবলৈ ঘৰৰ পৰা ওলাই যায়। পুৱা প্ৰায় ১:৩০ বজাত তেওঁ ঘৰলৈ উভতি অহাৰ কথা মেছেজ যোগে মাকক জনাইছিল যদিও তাৰ পিছৰ পৰা তেওঁৰ কোনো সন্ধান পোৱা নাছিল।
অৱশেষত পিছদিনা দুপৰীয়া স্থানীয় ৰাইজে তেওঁৰ মৃতদেহ উত্তৰখানৰ ৰজাবাৰী ঘাটৰ সমীপৰ তুৰাগ নদীত ওপঙি থকা অৱস্থাত প্ৰত্যক্ষ কৰে আৰু খবৰ পোৱাৰ পিছত নৌসেনা আৰক্ষীয়ে উদ্ধাৰ কৰে। পকেটত থকা আইফোন আৰু হাতঘড়ীটো চাই তেওঁৰ পৰিচয় নিশ্চিত কৰা হয়। মৃতদেহটো মৰণোত্তৰ পৰীক্ষাৰ বাবে শ্বহীদ সুহৰাৱাৰ্ডি মেডিকেল কলেজ হাস্পতাললৈ প্ৰেৰণ কৰা হয়।
আৰক্ষীয়ে জনোৱা মতে, মৃতদেহত কোনো ধৰণৰ আঘাতৰ লক্ষণ দেখা পোৱা হোৱা নাই আৰু মৰণোত্তৰ পৰীক্ষাৰ প্ৰতিবেদন অহাৰ পিছতহে মৃত্যুৰ প্ৰকৃত কাৰণ নিশ্চিত কৰিব পৰা যাব। তাহছিফৰ মৃত্যুৰ পিছত তেওঁৰ খুড়াকৰ জীয়েক ভগ্নী মুছফিকা জাহানে ছ’চিয়েল মিডিয়াত ক্ষোভ প্ৰকাশ কৰি অভিযোগ কৰে যে এয়া স্বাভাৱিক মৃত্যু বা দুৰ্ঘটনা নহয়, পৰিকল্পিত হত্যাহে। তেওঁ নাগৰিক দায়বদ্ধতাৰ বাবে শ্বেখ হাছিনাৰ দেশ এৰি যোৱাৰ ভিডিঅ’ ছ’চিয়েল মিডিয়াত শ্বেয়াৰ কৰাৰ পিছৰে পৰা তাহছিফক অহৰহ মানসিক নিৰ্যাতন আৰু হাৰাশাস্তিৰ সন্মুখীন হোৱা বুলি দাবী কৰে।
আনহাতে, তাহছিফৰ পিতৃ কে এম এনায়েতুল কৰিম হেলালে কয় যে তেওঁৰ পুত্ৰই কেইবামাহো ধৰি তেওঁৰ সুৰক্ষাৰ বাবে অত্যন্ত চিন্তিত হৈ আছিল আৰু প্ৰায়ে তেওঁৰ আশংকাৰ কথা কয় যদিও তেওঁ কিয় ভয়ত আছিল সেই বিষয়ে পৰিয়ালক সঠিকভাৱে কোৱা নাছিল।
হাছিনাৰ দেশ এৰি যোৱাৰ ভিডিঅ’ ভাইৰেল হোৱাৰ লগে লগে ২০২৪ চনৰ ছেপ্টেম্বৰ মাহত অনুশাসন ভংগৰ অভিযোগত তাহছিফক বায়ুসেনাৰ পৰা বৰ্খাস্ত কৰা হৈছিল। যদিও সৰুৰে পৰা পাইলট হোৱাৰ সপোন দেখা আৰু প্ৰায় ২০০ ঘণ্টাৰ সফল বিমান চালনাৰ অভিলেখ থকা তাহছিফৰ পৰিয়ালে এই কাৰণ সম্পূৰ্ণৰূপে মানি ল’ব পৰা নাছিল।
চাকৰি হেৰুৱাৰ পিছত তেওঁ বিচিবি, নেট্ৰ নিউজ আৰু নিজাকৈ নিৰাপত্তা সেৱাৰ ব্যৱসায় কৰি জীৱন-যাপনৰ চেষ্টা কৰিছিল। কিন্তু তেওঁৰ জীৱনত এক নতুন ধুমুহাৰ সৃষ্টি হ’ল যেতিয়া বাংলাদেশৰ এখন বাতৰি কাকতে হাছিনাৰ প্ৰচাৰ কৰা ভিডিঅ’টোৰ আঁৰৰ লোকসকলৰ তদন্তৰ সময়ত ভাৰতীয় চোৰাংচোৱা সংস্থা ‘ৰ’ৰ সৈতে সম্পৰ্ক থকা বুলি দাবী কৰিলে, আৰু তাত তাহছিফৰ নামো সংযোজন কৰা হ’ল। কিন্তু আই এছ পি আৰয়ে এই অভিযোগ শীঘ্ৰে অস্বীকাৰ কৰি কৈছিল যে কোনো বিদেশী সংগঠনৰ সৈতে তেওঁৰ ঘনিষ্ঠতাৰ বাবে তেওঁক আঁতৰাই দিয়া হোৱা নাই।
মৃত্যুৰ কেইমাহমান আগতে জুলাই মাহত এটা জনপ্ৰিয় প’ডকাষ্টত অংশগ্ৰহণ কৰিছিল তাহছিফে। তাত তেওঁ স্পষ্টকৈ উল্লেখ কৰিছিল যে ভাৰতীয় চোৰাংচোৱা এজেণ্ট হিচাপে তেওঁৰ বিৰুদ্ধে উত্থাপিত অভিযোগ সম্পূৰ্ণ ভিত্তিহীন আৰু উদ্দেশ্যপ্ৰণোদিত অপপ্ৰচাৰ। অৱশ্যে হাছিনাৰ ভিডিঅ’টোৱে তেওঁৰ চাকৰি কাঢ়ি নিছে নেকি বুলি সোধাত তেওঁ কয় যে, “হ’ব পাৰে”।
একে সময়তে ২০২৫ চনত উত্তৰাৰ মাইলষ্টোন স্কুলত ট্ৰেইনিং যুঁজাৰু বিমান দুৰ্ঘটনা সংঘটিত হোৱাৰ তদন্তৰ সন্দৰ্ভতো তেওঁ কিছু অস্বস্তিকৰ প্ৰশ্ন উত্থাপন কৰে, য’ত বহু ছাত্ৰ-ছাত্ৰীৰ মৃত্যু হৈছিল। ৰহস্যজনকভাৱে নিৰুদ্দেশ হোৱাৰ লগতে নদীত নিথৰ দেহ উদ্ধাৰ হোৱাৰ ফলত তাহছিফৰ পৰিয়াল আৰু সহকৰ্মীসকলে গভীৰ শোক আৰু বহু উত্তৰবিহীন প্ৰশ্নৰ সন্মুখীন হৈছে।
