জম্মু-কাশ্মীৰৰ মুখ্যমন্ত্ৰী ওমৰ আব্দুল্লাহ আৰু সাংবাদিক নিধি ৰাজদানৰ শেহতীয়া বিবাহক কেন্দ্ৰ কৰি এক ধৰ্মীয় বিতৰ্কৰ সূত্ৰপাত ঘটিছে। বিবাহৰ আনুষ্ঠানিক ঘোষণাৰ দুদিন পাছতেই অল ইণ্ডিয়া মুছলিম জামাতৰ সভাপতি মৌলানা মুফটি শ্বাহাবুদ্দিন ৰজভী বেৰেলভীয়ে এই বিবাহখনক ইছলামিক নীতিৰ পৰিপন্থী বুলি ঘোষণা কৰিছে। মৌলানাগৰাকীৰ মতে, শৰিয়ত আইন অনুসৰি এখন বিবাহ বৈধ হ’বলৈ দৰা আৰু কইনা দুয়োগৰাকী মুছলমান হোৱাটো বাধ্যতামূলক। যিহেতু ওমৰ আব্দুল্লাহ মুছলমান আৰু নিধি ৰাজদান মুছলমান নহয়, সেয়েহে ইছলামিক দৃষ্টিকোণৰ পৰা তেওঁলোকৰ এই বিবাহ কোনো কাৰণতে গ্ৰহণযোগ্য নহয় বুলি জামাত প্ৰধানগৰাকীয়ে স্পষ্ট কৰি দিছে।
এই প্ৰসংগত মত প্ৰকাশ কৰি ধৰ্মীয় নেতাজনে কয় যে নিকাহৰ পূৰ্বে আব্দুল্লাহে নিধি ৰাজদানক ইছলাম ধৰ্ম গ্ৰহণ কৰিবলৈ বাধ্য কৰাব লাগিছিল। যদি নিধি ৰাজদানে ইছলাম ধৰ্ম গ্ৰহণ কৰিলেহেঁতেন আৰু দুয়ো ইছলামিক ৰীতি-নীতি তথা পৰম্পৰা অনুসৰি বিবাহপাশত আৱদ্ধ হ’লহেঁতেন, তেন্তে শৰিয়ত অনুসৰি বিবাহখন বৈধ বুলি গণ্য কৰা হ’লহেঁতেন। ইছলামত বিবাহৰ নিৰ্দিষ্ট নীতি-নিয়ম আৰু চৰ্তৰ কথা উল্লেখ কৰি ৰজভীয়ে কয়, “দৰা বা কইনাৰ যিকোনো এজন মুছলমান নহ’লে বিবাহখন আইনসন্মত হ’ব নোৱাৰে।” এই চৰ্ত পূৰণ নোহোৱাৰ বাবেই তেওঁ দুয়োৰে বিবাহক ইছলামিক নীতি অনুসৰি নীতিবৰ্হিভূত বুলি অভিহিত কৰিছে।
জামাত প্ৰধানগৰাকীৰ এই মন্তব্যই বৰ্তমান ধৰ্মীয় বিশ্বাস আৰু ব্যক্তিগত স্বাধীনতাৰ বিষয়টোক চৰ্চালৈ আনিছে। অৱশ্যে, এই ঘোষণা কেৱল ইছলামিক ধৰ্মীয় নীতিৰ এক নিজস্ব ব্যাখ্যা হে। ভাৰতত যিকোনো বিবাহৰ আইনী বৈধতা কেৱল প্ৰযোজ্য আইনৰ অধীনতহে নিৰ্ণয় কৰা হয়, কোনো ধৰ্মীয় ফতোৱাৰ ভিত্তিত ইয়াক বাতিল বা নিৰ্ধাৰণ কৰিব নোৱাৰি।
