আগন্তুক ২০২৭ বৰ্ষত ভাৰতৰ অৰ্থনৈতিক বিকাশৰ সূচক কিছু হ্ৰাস পোৱাৰ বিপৰীতে উপভোক্তা মুদ্ৰাস্ফীতি বৃদ্ধি পাব পাৰে বুলি পূৰ্বাভাস দিছে বহুজাতিক মাৰ্কিন বিত্তীয় সেৱা সংস্থা গোল্ডমেন ছেকছে (Goldman Sachs)। ২০২৬-২৭ বিত্তীয় বৰ্ষৰ তৃতীয় ত্ৰৈমাসিকত প্ৰকাশিত এই শেহতীয়া প্ৰতিবেদনত উল্লেখ কৰা হৈছে যে মুদ্ৰাস্ফীতিৰ ঊৰ্ধ্বমুখী প্ৰৱণতা নিয়ন্ত্ৰণ কৰিবলৈ অনাগত সময়ত ভাৰতীয় ৰিজাৰ্ভ বেংকে সুতৰ হাৰ অৰ্থাৎ ৰেপ’ ৰেট বৃদ্ধি কৰিবলগীয়া হ’ব পাৰে বুলি প্ৰতিবেদনখনত উল্লেখ কৰিছে।
গোল্ডমেন ছেকছৰ প্ৰতিবেদন অনুসৰি, ২০২৬ বৰ্ষত ভাৰতৰ মুঠ ঘৰুৱা উৎপাদন বৃদ্ধিৰ হাৰ ৭.৯ শতাংশত স্থিৰ হৈ থকাৰ সম্ভাৱনা আছে যদিও আগন্তুক ২০২৭ বৰ্ষত ই ৭.২ শতাংশলৈ হ্ৰাস পাব পাৰে। অৱশ্যে বিকাশৰ হাৰ কিছু পৰিমাণে কমিলেও ভাৰতৰ অৰ্থনৈতিক বৃদ্ধি শক্তিশালী পৰ্যায়তে বৰ্তি থাকিব বুলি মাৰ্কিন বিত্তীয় সংস্থাটোৱে স্পষ্ট কৰি দিছে।
মুদ্ৰাস্ফীতি সন্দৰ্ভতো সংস্থাটোৱে গুৰুত্বপূৰ্ণ ইংগিত প্ৰদান কৰিছে। গোল্ডমেন ছেকছৰ অনুমান অনুসৰি, চলিত বৰ্ষত উপভোক্তা মুদ্ৰাস্ফীতি ৪.৬ শতাংশত সীমাবদ্ধ থাকিলেও ২০২৭ চনত ই বৃদ্ধি পাই ৫.৭ শতাংশ হ’ব পাৰে। মূল্যবৃদ্ধিৰ সূচক ঊৰ্ধ্বমুখী হোৱাৰ আঁৰত সংস্থাটোৱে মূলতঃ দুটা কাৰণ চিনাক্ত কৰিছে। ইয়াৰে প্ৰথমটো হৈছে এল নিন’জনিত বতৰৰ বিপৰ্যয় আৰু দ্বিতীয়টো হৈছে উৎপাদনৰ উপকৰণৰ উচ্চ মূল্য।
মাৰ্কিন বিত্তীয় সেৱা সংস্থাটোৰ ধাৰণা অনুসৰি, মুদ্ৰাস্ফীতিৰ এই ঊৰ্ধ্বমুখী ধাৰা ৰোধ কৰিবলৈ ভাৰতীয় ৰিজাৰ্ভ বেংকে আগন্তুক সময়ত অধিক কঠোৰ পদক্ষেপ গ্ৰহণ কৰিব পাৰে। ইয়াৰ ফলত ২০২৭ চনৰ শেষৰ ফালে ৰেপ’ ৰেট ৬.২৫ শতাংশত উপনীত হোৱাৰ সম্ভাৱনা আছে। উল্লেখযোগ্য যে বৰ্তমান ৰেপ’ ৰেট ৫.৭৫ শতাংশত আছে আৰু যোৱা অক্টোবৰ মাহত ভাৰতীয় ৰিজাৰ্ভ বেংকে শেষবাৰৰ বাবে ৰেপ’ ৰেট পৰিৱৰ্তন কৰিছিল।
ইফালে, আমেৰিকান ডলাৰৰ বিপৰীতে ভাৰতীয় টকাৰ বিনিময় মূল্য ৯৬ টকাত স্থিৰ হৈ থাকিব বুলি গোল্ডমেন ছেকছে পূৰ্বাভাস দিছে। আগন্তুক এবছৰলৈকে এই বিনিময় হাৰ স্থিতিশীল হৈ থাকিব বুলি সংস্থাটোৱে অনুমান কৰিছে। প্ৰতিবেদনখনত উল্লেখ কৰা অনুসৰি, সেৱা খণ্ডৰ শক্তিশালী ৰপ্তানি আৰু প্ৰবাসী ভাৰতীয়সকলে প্ৰেৰণ কৰা বিপুল পৰিমাণৰ বৈদেশিক মুদ্ৰাৰ ফলত নতুন দিল্লীয়ে ইতিমধ্যেই দেশীয় মুদ্ৰাৰ ওপৰত থকা তীব্ৰ চাপ অতিক্ৰম কৰিবলৈ সক্ষম হৈছে।
মুদ্ৰাস্ফীতি আৰু ৰেপ’ ৰেট বৃদ্ধিৰ আশংকাৰ মাজতো ভাৰতত বিনিয়োগ আৰু কৰ্প’ৰেট লাভ বৃদ্ধিৰ ইতিবাচক দিশটোও গোল্ডমেন ছেকছৰ প্ৰতিবেদনত প্ৰতিফলিত হৈছে। সংস্থাটোৱে জনোৱা অনুসৰি, এনএছই ৫০০ সূচকত তালিকাভুক্ত প্ৰতিষ্ঠানসমূহৰ মূলধনী ব্যয় ইতিমধ্যেই ১৭ শতাংশ বৃদ্ধি পাইছে, যিটো বিগত এটা দশকৰ ভিতৰত দ্বিতীয় সৰ্বোচ্চ। আনহাতে, চলিত ২০২৬-২৭ বিত্তীয় বৰ্ষৰ তৃতীয় ত্ৰৈমাসিকত এমএছচিআই ইণ্ডিয়া সূচকৰ অধীনত থকা প্ৰতিষ্ঠানসমূহৰ লাভৰ পৰিমাণ ১৬ শতাংশত উপনীত হ’ব পাৰে বুলি প্ৰতিবেদনখনত আশা প্ৰকাশ কৰা হৈছে।





