সোপাধৰাক কেন্দ্ৰ কৰি আজি ডিমা হাচাওত এক উত্তপ্ত পৰিস্থিতিৰ সৃষ্টি হয়। ডিমা হাচাও জিলাৰ মাহুৰ ৰে’লৱে ষ্টেশ্যনত ঘুৰি ফুৰা তিনিজন অচিনাক্ত লোক স্থানীয় লোকৰ ৰোষত পৰে।
উল্লেখযোগ্য যে আজি পুৱা য়ু পি ১৬ বি ৭৫৮২ নম্বৰৰ এখন মাৰুতি বাহনত অহা ৰঙা কাপোৰ পৰিধান কৰা তিনি গৰাকী সাধুৰূপী লোক মাহুৰত উপস্থিত হৈছিল।
লোককেইজনক ঘুৰি ফুৰা দেখা পাই ৰাইজৰ মাজত সোপাধৰা বুলি সন্দেহ ওপজাৰ লগতে বাতৰিটো বনজুইৰ দৰে অঞ্চলটোত বিয়পি পৰে।
অৱশ্যে স্থানীয় লোকসকলে তেওঁলোকক ৰে’লৱে ষ্টেশ্যনৰ সমীপত ঘেৰি ধৰাৰ সময়তে কৰ্তব্যৰত সেনা জোৱান ঘটনাস্থলীত উপস্থিত হৈ লোককেইজনক উদ্ধাৰ কৰে। আনহাতে লোককেইজনৰ বাহনখনৰ পৰা গেছ চিলিণ্ডাৰ, বিভিন্নধৰণৰ পেকেট, স্প্ৰে আদি উদ্ধাৰ হয়।
ডিমা হাচাও জিলাৰ সহকাৰী আয়ুক্ত ৰাহুল দলে মাহুৰত উপস্থিত হৈ গোটেই ঘটনাৰ বুজ লোৱাৰ লগতে তেওঁ দিয়া তথ্য অনুসৰি আৰক্ষীৰ জিম্মাত থকা তিনি গৰাকী লোক উত্তৰ প্ৰদেশৰ পৰা আহিছে।
লোককেইজনে কামাখ্যা আৰু পৰশুৰাম কুণ্ড দৰ্শন সামৰি ডিমা হাচাও হৈ আগৰতলাৰ ত্ৰিপুৰা সুন্দৰী মন্দিৰ দৰ্শনৰ কাৰনে গৈ আছিল বুলি আৰক্ষীয়ে জানিবলৈ দিয়ে।
