বাক্সা জিলাৰ নাগ্রীজুলি উন্নয়ন খণ্ডৰ অধীনৰ ভাৰত-ভূটান সীমান্তৰ গুৱাবাৰীত আজি এটি বনৰীয়া হাতীৰ মৃতদেহ উদ্ধাৰ হোৱা ঘটনাই বৃহত্তৰ নাগ্রীজুলি অঞ্চলত শোকৰ ছাঁ পেলোৱা পৰিলক্ষিত হৈছে।
এচাম অদূৰদৰ্শী লোকে ভাৰত-ভূটান সীমান্তত চলোৱা অবাধ বন ধ্বংসযজ্ঞৰ ফলত তীব্ৰ খাদ্য সংকটত ভোগা বনৰীয়া হাতীৰ জাকে পাহাৰৰ পৰা খাদ্যৰ সন্ধানত লোকালয়ত প্ৰৱেশ কৰি বছৰৰ পিছত বছৰ ধৰি মানুহৰ লগত সংঘাটত লিপ্ত হয় আৰু এইদৰে মানুহ আৰু বনৰীয়া হাতীয়ে কৰুণ মৃত্যুক আকোৱালি ল’বলগীয়া হয়।
উল্লেখযোগ্য যে এক তথ্য অনুসৰি বিগত প্ৰায় পোন্ধৰ বছৰত অকল তামুলপুৰ মহকুমাতে বনৰীয়া হাতীৰ আক্ৰমণত ৭০ জনতকৈ অধিক লোকে প্ৰাণ হেৰুওৱাৰ বিপৰীতে ৭ টাকৈ বনৰীয়া হাতীয়ে প্ৰাণ হেৰুৱাইছে।
এই বছৰো খাদ্যৰ সন্ধানত পোৱালি সহ পাহাৰৰ পৰা নামি অহা ডেৰ শতাধিক বৃহৎ বনৰীয়া হাতীৰ জাক এটাই নাগ্রীজুলিৰ বৰনদীৰ পাৰত আশ্ৰয় লৈ থাকি বিভিন্ন গাঁৱত প্ৰৱেশ কৰি তাণ্ডৱ চলাই অহা সম্পৰ্কে বিভিন্ন সংবাদ মাধ্যমত ধাৰাবাহিক ভাৱে বাতৰি প্ৰকাশ হৈ আহিছে যদিও হাতীৰ জাকটোক খেদি পঠিওৱাৰ ব্যৱস্থা বন বিভাগে নোলোৱাৰ গুৰুতৰ অভিযোগ উত্থাপিত হৈছে।
ইপিনে বনৰীয়া হাতীৰ উপদ্ৰৱৰ পৰা হাত সাৰিবলৈ অঞ্চলটোৰ কিছু গাঁৱৰ লোকে ঠায়ে ঠায়ে বিদ্যুৎ পৰিবাহী তাঁৰ সংযোগ কৰি বনৰীয়া হাতীৰ জাকক গ্ৰামাঞ্চলত প্ৰৱেশৰ ক্ষেত্ৰত বাধা দিয়াৰ চেষ্টা চলাই আহিছে। এনে সংঘাতৰ পৰিণতিতেই শনিবাৰে নিশা নাগ্রীজুলি উন্নয়ন খণ্ডৰ অধীনৰ ৩নং পূব-গুৱাবাৰী গাঁৱত কৰুণ মৃত্যুক সাৱটি ল’ব লগা হয় এটি বনৰীয়া দঁতাল হাতীয়ে।
জানিব পৰা মতে খাদ্যৰ সন্ধানত বিচৰণ কৰা হাতীৰ জাক এটাৰ পৰা ফালৰি কাটি যোৱা এটি হাতীৰ মৃতদেহ আজি পুৱা স্থানীয় ৰাইজে প্ৰত্যক্ষ কৰে। হাতীৰ মৃত্যুৰ খবৰ পাই তামুলপুৰ বনাঞ্চলিক কাৰ্য্যালয়ৰ পৰা বন বিষয়া আৰু কৰ্মচাৰীৰ দল উপস্থিত হৈ মৃত হাতীটোৰ মৰণোত্তৰ পৰীক্ষা সম্পন্ন কৰে।
বন বিভাগে হাতীটোৰ মৃত্যুৰ কাৰণ এতিয়াও নিশ্চিত কৰিব পৰা নাই যদিও একাংশ সচেতন ৰাইজে বিদ্যুৎষ্পৃষ্ট হৈ হাতীটোৰ মৃত্যু হোৱা বুলি সন্দেহ কৰিছে।
ইপিনে আজিও নাগ্রীজুলিৰ বিভিন্ন অঞ্চলত বনৰীয়া হাতীৰ জাকটোৱে সৰু সৰু ভাগত বিভক্ত হৈ বিচৰণ কৰি আছে। বনৰীয়া হাতীৰ জাকক নিয়ন্ত্ৰণ আৰু সুৰক্ষা দিয়াৰ ক্ষেত্ৰত চৰকাৰ তথা বন বিভাগে অভিলাষী আঁচনি গ্ৰহণ নকৰিলে হাতী মানুহৰ মাজত চলা সংঘাতৰ ফলত আৰু কিমান মানুহে বা কিমান বনৰীয়া হাতীয়ে প্ৰাণ হেৰুৱাব লাগে তাৰ কোনো নিশ্চয়তা নাই। সেয়েহে প্ৰকৃতি প্ৰেমী ৰাইজে বনৰীয়া হাতীৰ সুৰক্ষা নিশ্চিত কৰাৰ লগতে নাগ্রীজুলি অঞ্চলৰ ৰাইজৰ জীৱন আৰু সম্পত্তিৰ নিৰাপত্তা সুনিশ্চিত কৰাৰ বাবে চৰকাৰক ব্যৱস্থা লোৱাৰ দাবী জনায়।
