নীতীশ কুমাৰে নাগৰিকত্ব বিধেয়কৰ বিৰোধিতা কৰিলে, অৰুণাচল, মেঘালয়ৰ চৰকাৰে কৰিলে, তাৰ পিছতো মনে মনে থকা সৰ্বানন্দ কেনেকৈ জাতীয় নায়ক হ’ল? আজি এখন সংবাদমেলত প্ৰাক্তন মুখ্য মন্ত্ৰী তৰুণ গগৈয়ে এইদৰে কটাক্ষ কৰে মুখ্য মন্ত্ৰী সৰ্বানন্দ সোণোৱালক।
উল্লেখযোগ্য যে প্ৰাক্তন মুখ্য মন্ত্ৰী তৰুণ গগৈয়ে আজি কইনাধৰাৰ তেওঁৰ বাসগৃহত এখন সংবাদমেল সম্বোধন কৰি কেইবাটাও গুৰুত্বপূৰ্ণ কথাৰ অৱতাৰণা কৰাৰ লগতে বিজেপি চৰকাৰখনক ক্ষুৰধাৰ সমালোচনা কৰে।
বিভিন্ন সময়ত সততে সংবাদমেল দি সৰৱ হৈ অহা গগৈয়ে আজি ৰেৱতী ফুকনৰ নিৰুদ্দেশৰ ঘটনা, নাগৰিকত্ব সংশোধনী বিধেয়ক, ৰাজ্যত বৃদ্ধি পোৱা নাৰীজনিত অপৰাধ, সুকীয়া বৰাক ৰাজ্য, আৰক্ষীৰ ব্যৰ্থতা আদি কেইবাটাও বিষয়ত গুৰুত্বপূৰ্ণ মত দিয়ে।
আনহাতে গগৈয়ে তেওঁৰ পিতৃ-মাতৃৰ নামত থকা ট্ৰাষ্টৰ পৰা ১২ জুলাইত ফিনলেণ্ডৰ বিশ্ব জুনিয়ৰ এথলেটিকছ প্ৰতিযোগিতাত ৪০০ মিটাৰ দৌৰত স্বৰ্ণ পদক লাভ কৰা হিমা দাসক ১ লাখ টকা দিব বুলিও প্ৰকাশ কৰে।
প্ৰাক্তন মুখ্য মন্ত্ৰীজনে নাগৰিকত্ব সংশোধনী বিধেয়কৰ প্ৰসংগত সংবাদমেলত বৰ্তমানৰ মুখ্য মন্ত্ৰী সৰ্বানন্দ সোণোৱালক সমালোচনা কৰি কয়, “নীতীশ কুমাৰেও নাগৰিকত্ব বিধেয়কৰ বিৰোধিতা কৰিছে। অৰুণাচল, মেঘলয় চৰকাৰেও বিৰোধিতা কৰিছে। জাতিৰ সংকটৰ সময়ত মনে মনে থকা সৰ্বানন্দ সোণোৱাল তাৰ পিছতো জাতীয় নায়ক কেনেকৈ হ’ল?”
বেয়া ৰাস্তা বনাবলৈ ৩০ ঘণ্টা সময় ধৰি দিয়া কথাটোতো সৰ্বানন্দ সোণোৱালক সমালোচনা কৰি গগৈয়ে কয়, “ৰাস্তা বেয়া হ’লে মুখ্য মন্ত্ৰীয়ে ৩০ দিনত ৰাস্তা বনাবলৈ কয়। এইটো টোঘলকী নিৰ্দেশ। ৩০ ঘণ্টা দূৰৰে কথা, ৩০ দিনতো বনাব নোৱাৰে। এইটো মুখ্য মন্ত্ৰীৰ অপৰিপক্বতাৰ চিন।”
আনহাতে ৰেৱতী ফুকনৰ নিৰুদ্দেশৰ ঘটনা সন্দৰ্ভত কয়, “ই এক গুপ্তহত্যা বুলি আমাৰ সন্দেহ হৈছে। ৰেবতী ফুকনৰ আজিও সন্ধান নাই। অসমত ইয়াৰ আগতে এনে ধৰণৰ ঘটনা কেতিয়াও হোৱা নাছিল। ইয়াৰ চি বি আই তদন্ত হ’ব লাগে।”
নিজৰ আমোলতো স্বাস্থ্য মন্ত্ৰী থকা আৰু বৰ্তমানেও স্বাস্থ্য মন্ত্ৰী ড০ হিমন্ত বিশ্ব শৰ্মাক আক্ৰমণ কৰি কয়, “যোৱা ৯ বছৰত ১০ হাজাৰ শিশুৰ মৃত্যু হৈছে। বিভাগীয় মন্ত্ৰীজনে আকৌ নিজকে বৰ দায়ীত্বশীল বুলি কৈ থাকে।”
প্ৰাক্তন মুখ্য মন্ত্ৰীজনে ৰাজ্যত বিজেপিৰ চৰকাৰখন অহাৰ পিছত বিভিন্ন অপঘটনাবোৰ বৃদ্ধি হৈছে বুলি কৈ মৰেল পুলিচিং বৃদ্ধি হোৱা, ৰে’লতো মহিলাৰ ওপৰত আক্ৰমণৰ কথালৈ আঙুলিয়াই দিয়ে।
সংবাদমেলত আন এটা গুৰুত্বপূৰ্ণ প্ৰশ্নৰ অৱতাৰণা কৰি তৰুণ গগৈয়ে কয় যে এন আৰ চি প্ৰক্ৰিয়াত যিসকলৰ নাম বাদ পৰি যাব, সেই মানুহখিনিক লৈ কি কৰিব? যেতিয়া বিদেশী ন্যায়াধিকৰণে বিদেশী বুলি ঘোষণা কৰিব তেতিয়াহে অসমৰ পৰা বাহিৰ কৰিব পাৰিব।
আৰক্ষীৰ ব্যৰ্থতাৰ অভিযোগ তুলি গগৈয়ে কয়, “লাফিকুল ইছলামক কোনে হত্যা কৰিলে এতিয়ালৈকে শুংসূত্ৰ নাই। এবছৰ পাৰ হৈ গ’ল। এতিয়া মানুহে পাহৰিলে সকলোৱে। পুলিচৰ বৰমূৰীয়াসকলে কাম কৰাতকৈ কথা বেছি কয়। আমি কাম কৰাটো বিচাৰিছো।”
