ৰহাৰ টোলগেট সম্পৰ্কত কৃষক মুক্তি সংগ্ৰাম সমিতি, অসম জাতীয়তাবাদী যুৱ ছাত্ৰ পৰিষদকে ধৰি কেইবাটাও জাতীয় আৰু জনগোষ্ঠীয় সংগঠনে ত্ৰিপাক্ষিক বৈঠকৰ দাবী জনাই অহাৰ সময়ত নগাঁও জিলা প্ৰশাসনে এই সম্পৰ্কত আজি এক সভা আহ্বান কৰে যদিও দল-সংগঠনৰ নেতৃত্বই আলোচনাত অংশ নলয়।
আনহাতে, কৃষক মুক্তি সংগ্ৰাম সমিতি আৰু অসম জাতীয়তাবাদী যুৱ ছাত্ৰ পৰিষদৰ নেতৃত্বই বৈঠকত আজি উপস্থিত নথকাৰ সিদ্ধান্ত লৈ দুয়ো দলৰ নেতৃত্বই জিলা উপায়ুক্ত বিশ্বজিৎ পেগুক এখন স্মাৰক পত্ৰ প্ৰদান কৰে।
তেওঁলোকে লগতে ত্ৰিপাক্ষিক বৈঠকৰ পোষকতা কৰাৰ উপৰি এই বৈঠক ৰাজ্য চৰকাৰৰ লগত হ’ব লাগিব বুলি দাবী কৰে। উল্লেখ্য যে, নগাঁৱৰ অতিৰিক্ত উপায়ুক্ত লাচিত কুমাৰ দাসে পত্ৰ নং এন এম এন ০৬/ ২০১৮/ ২০০২ পত্ৰ যোগে ৰহাৰ টোল গেটৰ বিৰোধিতা কৰা জাতীয়-জনগোষ্ঠীয় সংগঠনৰ প্ৰতিনিধি আৰু ৰাষ্ট্ৰীয় ঘাইপথ প্ৰাধিকৰণৰ নগাঁৱৰ প্ৰকল্প সঞ্চালকক আজিৰ সভালৈ আমন্ত্ৰণ জনাইছিল৷
পত্ৰখনত উল্লেখ কৰা হৈছে যে, টোলগেট বিৰোধী সংগঠনসমূহে দাবী কৰা অনুসৰি ৰাষ্ট্ৰীয় ঘাইপথ প্ৰাধিকৰণ কৰ্তৃপক্ষৰ লগত এই আলোচনাৰ আয়োজন কৰা হৈছে। সেই দিনা বিয়লি চাৰে তিনি বজাত নগাঁও উপায়ুক্ত কাৰ্যালয়ৰ সভাগৃহত এই সভাৰ আয়োজন কৰা হৈছে।
উল্লেখ্য যে ৰহাৰ টোলগেটৰ বিৰোধিতা কৰা জাতীয় আৰু জনগোষ্ঠীয় সংগঠন কেইটাই এই সম্পৰ্কত আলোচনা কৰাৰ বাবে চৰকাৰ-ৰাষ্ট্ৰীয় ঘাইপথ প্ৰাধিকৰণৰ উচ্চ পৰ্যায়ৰ প্ৰতিনিধিৰ সৈতে এক ত্ৰিপাক্ষিক বৈঠকৰ দাবী জনাই আহিছিল। আনকি যোৱা ২২ জুলাইত টোলগেটৰ বিৰুদ্ধে প্ৰতিবাদ কৰা সংগঠন কেইটাক ৰাজ্য চৰকাৰৰ উচ্চ পৰ্যায়ৰ প্ৰতিনিধিৰ সৈতে আলোচনা অনুষ্ঠিত কৰাৰো প্ৰতিশ্ৰুতি দিছিল নগাঁও জিলা প্ৰশাসনে।
আনহাতে, ৰাষ্ট্ৰীয় ঘাইপথ প্ৰাধিকৰণে নগাঁও জিলা উপায়ুক্তৰ সভাকক্ষত এই সম্পৰ্কত আলোচনাৰ বাবে এক সভাৰ আয়োজন কৰি সংশ্লিষ্ট সংগঠন কেইটাক আমন্ত্ৰণ জনাই যদিও মূৰকত সেই সভা অনুষ্ঠিত নকৰিলে। তাৰ ফলত সংগঠন কেইটা ক্ষুব্ধ হৈ পৰিছিল। ইয়াৰ পিছতেই আজি এক আলোচনাৰ বাবে নগাঁও জিলা প্ৰশাসনে সংগঠন কেইটাক আমন্ত্ৰণ জনাইছিল।
