নাগালেণ্ডৰ পৰা নামি অহা ঢলে গোলাঘাটৰ সৰুপথাৰ বৰপথাৰৰ লগতে বোকাখাত মহকুমাৰ নুমলীগড়ৰ বিস্তীৰ্ণ অঞ্চল প্লাৱিত কৰাত এতিয়া বিভিষিকাময় পৰিস্থিতিৰ উদ্ভৱ হৈছে ৰাইজৰ মাজত৷
ধনশিৰি নদীৰ জলপৃষ্ঠ অভাৱনীয় ভাৱে বৃদ্ধি পোৱাত ইতিমধ্যে গোলাঘাটৰ বহু অঞ্চলত বানে ভয়ংকৰ ৰূপ ধাৰণ কৰিছে। ইতিমধ্যে বাঢ়নী পানীত ১ নং পাৰঘাতৰ নিৱাসী খুলো গোৱালা নামৰ এজন লোকে কৰুণ মৃত্যুক সাবটিব লগা হৈছে।ঘৰৰ ভিতৰত পানী সোমোৱাত ওখ ঠাই বিচাৰি ওলাই আহোতেই পানীত উটি গৈ মৃত্যু হয় লোক জনৰ।
ইফালে কেন্দ্ৰীয় জল আয়োগৰ তথ্য মতে নুমলীগড়ত ধনশিৰি নদীৰ জলপৃষ্ঠই পূৰ্বৰ অভিলেখ ভংগ কৰি বিপদ সীমাৰ ২.৪৮ মিটাৰ ওপৰেৰ পানী বৈ আছে৷ সম্প্ৰতি নুমলীগড়ত জলপৃষ্ঠ ৭৯.৯০ মিটাৰত আছে আৰু পানী বাঢ়ি আছে৷
অনুমান কৰা হৈছে যে আজি সন্ধিয়ালৈ নুমলীগড়ত ধনশিৰি নদীৰ পানী ০১.১১ মিটাৰ বাঢ়িব আৰু ন ন অঞ্চল প্লাৱিত কৰিব। ইয়াৰ পূৰ্বে ১৯৮৫ চনৰ ২৪ ছেপ্তেম্বৰত নুমলীগড়ত ধনশিৰি নদীৰ জলপৃষ্ঠ সৰ্বাধিক ৭৯.৮৭ মিটাৰলৈ বৃদ্ধি পাইছিল৷
ইফালে বোকাখাতৰ ধনশিৰিমুখত ব্ৰহ্মপুত্ৰৰ জলপৃষ্ঠ বিপদসীমাৰ ০.১৪ মিটাৰ ওপৰেৰ বৈ আছে আৰু পানী ধীৰ গতিৰেহে বৃদ্ধি পাইছে৷ যাৰ বাবে কাজিৰঙা আৰু ইয়াৰ কাষৰীয় অঞ্চলত বানৰ শংকা নাই বুলি কেন্দ্ৰীয় জল আয়োগৰ তথ্যত প্ৰকাশ পাইছে ৷
