ধুবুৰীৰ নিলম্বিত উপ-আৰক্ষী অধীক্ষক ভাস্কৰ ওজাৰ বিৰুদ্ধে আৰক্ষীয়ে কোনো গোচৰ পঞ্জীয়ন নকৰা বুলি শুকুৰবাৰে এক সংবাদমেলত কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে অনা অভিযোগ অস্বীকাৰ কৰিছে আৰক্ষীয়ে।
এই সন্দৰ্ভত ধুবুৰীৰ আৰক্ষী অধীক্ষকগৰাকীয়ে সদৰী কৰিছে যে আৰিফুল ইছলাম নামৰ এজন ব্যক্তিয়ে দাখিল কৰা এজাহাৰৰ ভিত্তিত যোৱা ২৪ জুলাইতে ধুবুৰী থানাত অভিযুক্ত ভাস্কৰ ওজাৰ বিৰুদ্ধে পি চি এক্ট ১০৪৩/১৮ ইউ/এছ ৭ৰ অধীনত এক গোচৰ পঞ্জীয়ন কৰা হৈছে।
তদুপৰি এজন অতিৰিক্ত আৰক্ষী অধীক্ষকে আইন অনুযায়ী ক্ষিপ্ৰতাৰে গোচৰটোৰ তদন্ত চলাই আছে বুলি অসম আৰক্ষীৰ মুখ্য জনসম্পৰ্কৰক্ষী বিষয়াই জানিব দিছে। ইপিনে, শনিবাৰে এখন সংবাদমেলত অখিল গগৈয়ে ভাস্কৰ ওজাৰ বিৰুদ্ধে আৰক্ষীয়ে গোচৰ লোৱা বুলি স্বীকাৰ কৰে।
অৱশ্যে, শনিবাৰে কৃষক নেতাজনে পুনৰ উভতি ধৰি কয় যে যদি গোচৰ লোৱা হৈছেই তেনেহ’লে আৰক্ষী মনে মনে আছে কিয়? কিয় ওজাক গ্ৰেপ্তাৰ কৰা হোৱা নাই? নে সাংবাদিক বিশ্বজিৎ দাসৰ আত্মীয় হোৱা বাবেই এনে কৰা হৈছে বুলিও কৃষক নেতাগৰাকীয়ে প্ৰশ্ন কৰে।
আনহাতে, আৰক্ষী সঞ্চালকপ্ৰধানগৰাকীয়ে সংবাদ মাধ্যমৰ আগত এ পি এছ চিৰ তদন্ত সঠিকভাৱে আগবাঢ়িছে বুলি কৰা মন্তব্য সন্দৰ্ভত গগৈয়ে তদন্ত সঠিকভাৱে আগবঢ়া নাই বুলি কয়। গগৈয়ে শনিবাৰৰ সংবাদমেলৰ বিবৃতিটো আৰক্ষী সঞ্চালকপ্ৰধানলৈকে পঠিয়াই দিব বুলিও ব্যক্ত কৰে।
