‘‘বৰ্তমান সময়ত প্ৰতিটো খণ্ডতে প্ৰতিযোগিতা আছে। আমি নিজকে শক্তিশালী কৰিবলৈ স্বাৱলম্বী হ’ব লাগিব।’’ হোজাইত দেওবাৰে নৰ্থ-ইষ্ট প্ৰডাকশ্যন কাম ট্ৰেইনিং চেণ্টাৰৰ পৃষ্ঠপোষকতাত অংগিৰা মেক-অ’ভাৰে আয়োজন কৰা পৰ্টফলিঅ’ মেক-অ’ভাৰৰ ১৫ দিনীয়া পাঠ্যক্ৰমৰ প্ৰমাণপত্ৰ বিতৰণ কাৰ্যসূচী এটাত মুখ্য অতিথি হিচাপে উপস্থিত থকা ৰাম ঠাকুৰ মন্দিৰৰ পৰিচালনা সমিতিৰ সভাপতি সুশাৰ কান্ত পালে এই দৰে কয়।
এই কাৰ্যসূচীৰ উদ্দেশ্যৰ চমু ব্যাখ্যা কৰে অংগিৰা মেক-অ’ভাৰৰ সঞ্চালিকা নন্দিতা ভৌমিকে।
তেওঁ কয় যে যুৱতীসকলক সৱলীকৰণ কৰিবলৈ অংগিৰা মেক-অ’ভাৰৰ তৰফৰ পৰ্টফলিঅ’ মেক-অ’ভাৰৰ ১৫ দিনীয়া পাঠ্যক্ৰমৰ আয়োজন কৰা হৈছে। এই কাৰ্যসূচীত এইচ্চ ডি নন ব্ৰাইডেল (Non Bridal) মেক-আপ, সাধাৰণ কইনাৰ মেক-আপ, চুলিৰ ষ্টাইল আৰু আলোকচিত্ৰণৰ ধাৰণা দিয়া হয়।
প্ৰমাণপত্ৰ বিতৰণ কাৰ্যসূচীত হোজাই ছোৱালী মহাবিদ্যালয়ৰ সহকাৰী অধ্যাপিকা সুমিতা দেবনাথ, পামিলা বাগচি, জ্যেষ্ঠ সাংবাদিক অঞ্জন পাল, ৰমেশ মুন্দ্ৰা, প্ৰণব শৰ্মা, ৰাম ঠাকুৰ মন্দিৰৰ সম্পাদক অশোক কুমাৰ সাহা আদি বিশিষ্ট ব্যক্তি মঞ্চত উপস্থিত আছিল।
অনুষ্ঠানত উপস্থিত বিশিষ্ট ব্যক্তিসকলে নন্দিতা ভৌমিকৰ প্ৰয়াসক উৎসাহ প্ৰদান কৰি কয় যে যুৱতীসকলক সৱলীকৰণ কৰা এই ধৰণৰ কাম প্ৰশংসাযোগ্য, কাৰণ আজিৰ কঠিন প্ৰতিযোগিতামূলক সময়চোৱাত এইটো এটা অতি গুৰুত্বপূৰ্ণ কাম।
দেওবাৰে অনুষ্ঠিত পৰ্টফলিঅ’ মেক-অ’ভাৰৰ ১৫ দিনীয়া পাঠ্যক্ৰমৰ প্ৰমাণপত্ৰ বিতৰণ কাৰ্যসূচীত পাঠ্যক্ৰম সফলতাৰে সম্পন্ন কৰা পাপিয়া নন্দি, প্ৰিয়ংকা ঘোষ, ৰুমা ৰায় মণ্ডল, পূজা শৰ্মা, শ্ৰীমা ৰায়, পায়েল ভৱাল আৰু নন্দি দাসক প্ৰমাণপত্ৰ প্ৰদান কৰা হয়।
