কোচ ৰাজবংশী সন্মিলনীয়ে কাইলৈৰ পৰা আৰম্ভ হোৱাকৈ আহ্বান জনোৱা ৩৬ ঘণ্টীয়া অসম বন্ধ প্ৰত্যাহাৰ কৰিছে। নৰ্থ-ইষ্ট নাওলৈ ফোন কৰি সংগঠনটোৱে এই কথা জানিবলৈ দিয়ে।
কোচ ৰাজবংশী সন্মিলনীৰ প্ৰচাৰ সম্পাদক সত্যজিত শইকীয়াই জানিবলৈ দিয়া মতে, কোকৰাঝাৰ জিলা আৰক্ষী অধীক্ষকৰ কাৰ্য্যালয়ত জিলা আৰক্ষী প্ৰশাসনৰ সৈতে আলোচনাৰ পিছত সংগঠনটোৱে বন্ধৰ আহ্বান প্ৰত্যাহাৰৰ সিদ্ধান্ত লয়।
উল্লেখযোগ্য যে জনজাতিকৰণৰ দাবীত যোৱা ৬ আগষ্টত সংগঠনটোৱে কোকৰাঝাৰৰ চৌতাৰা ৰেইল ষ্টেইশ্যনত ৰেইল অৱৰোধ কাৰ্য্যসূচী লৈছিল। কিন্তু আৰক্ষীয়ে অৱৰোধকাৰীৰ ওপৰত লাঠীচালনা কৰাত বহু কেইজন আহত হৈছিল। লগতে আৰক্ষীয়ে কেইবাজনো প্ৰতিবাদকাৰীক গ্ৰেপ্তাৰ কৰিও ৰাখিছে।
ইয়াৰ প্ৰতিবাদত স্বাধীনতা দিৱসৰ দিনা সংগঠনটোৱে ক’লা বেজ পৰিধান কৰাৰ লগতে ১৪ আগষ্টৰ পৰা ৩৬ ঘণ্টীয়া অসম বন্ধৰ আহ্বান জনাইছিল।
কিন্তু আজি সংগঠনটোৰ প্ৰচাৰ সম্পাদক সত্যজিত শইকীয়াই জানিবলৈ দিয়া মতে, সংগঠনটোৰ সৈতে কোকৰাঝাৰ জিলা আৰক্ষী প্ৰশাসনৰ আলোচনাত এটা ঐকমত্যত উপনীত হোৱা গৈছে। এই ঐকমত্য মতে, উক্ত দিনা গ্ৰেপ্তাৰ কৰা আটাইকেইজনকে আদালতত আৰক্ষীয়ে দোষমুক্ত বুলি ঘোষণা কৰিব, যাতে তেওঁলোকে মুক্তি পোৱাৰ বাট আইনগতভাৱেই মুকলি হয়। এই প্ৰতিশ্ৰুতিৰ বাবেই সংগঠনটোৱে বন্ধ প্ৰত্যাহাৰ কৰা বুলি জনাইছে। অৱশ্যে স্বাধীনতা দিৱস বৰ্জন আৰু ক’লা বেজ পৰিধানৰ সিদ্ধান্তৰ পৰা আঁতৰি অহা নাই সংগঠনটো।
আনহাতে উক্ত দিনটোত গুৰুতৰভাবে আহত হোৱা দুলাল ৰায় নামৰ প্ৰতিবাদকাৰীজনক আৰক্ষীয়ে চিকিৎসাৰ বাবে কোকৰাঝাৰ হাস্পতালত ৰাখিছিল যদিও আজি আলোচনাৰ পাছতে মুকলি কৰি দিয়ে বুলি শইকীয়াই নৰ্থ-ইষ্ট নাওক জনায়।
আলোচনা কালত কোকৰাঝাৰ জিলা আৰক্ষী প্ৰশাসনৰ হৈ আৰক্ষী অধীক্ষক ৰাজেন সিং, অতিৰিক্ত জিলা আৰক্ষী অধীক্ষক টাবুৰাম পেগু, কমল কুমাৰ গুপ্তা, ডি এছ পি প্ৰকাশ মেধি উপস্থিত আছিল। কোচ ৰাজবংশী সন্মিলনীৰ তৰফৰ পৰা কাৰ্যকৰী সভাপতি প্ৰণৱ নাৰায়ণ দেৱ, সাধাৰণ সম্পাদক ৰঞ্জিত কুমাৰ ৰায়, কোকৰাঝাৰ জিলা সমিতিৰ সভাপতি মাধৱ ৰায় আৰু গোসাঁই গাঁও জিলা সমিতিৰ সভাপতি সুৰজ ৰায় উপস্থিত আছিল।
মন কৰিব লগীয়া যে আজি গুৱহাটীত আৰক্ষী আয়ুক্ত হীৰেন নাথে অসম বন্ধ আহ্বানকাৰীৰ বিৰুদ্ধে ব্যৱস্থা লোৱা হ’ব বুলি সংবাদ মাধ্যমৰ আগত মন্তব্য কৰিছে। তেওঁ কয় যে বন্ধৰ আহ্বান জনোৱাসকলৰ বিৰুদ্ধে শীঘ্ৰেই আইনমতে ব্যৱস্থা লোৱা হ’ব।
