পৰিৱৰ্তনৰ শ্ল’গানেৰে শাসনৰ গাদী দখল কৰা বিজেপি চৰকাৰৰ শাসনকালত বৰ্তমান গুৱাহাটী মহানগৰীৰ চানমাৰি, জাপৰিগোগকে ধৰি বিভিন্ন অঞ্চলৰ ৰাইজে পথৰ জৰাজীৰ্ণ অৱস্থাৰ বাবে ব্যাপক সমস্যাৰ সন্মুখীন হ’ব লগীয়া হৈছে।
উল্লেখযোগ্য যে ২০১৬ চনৰ বিধানসভা নিৰ্বাচনৰ পূৰ্বে বিজেপিৰ নেতা সকলে বাট-পথ, পৰিবহণ, স্বাস্থ্যখণ্ড আদিত পৰিৱৰ্তন অানিব বুলি জনসাধাৰণৰ আগত উদাত্ত ভাষণ দিছিল। কিন্তু শাসনৰ গাদী দখল কৰাৰ পিছত দেখা গৈছে ইয়াৰ এক ওলোটা ছবি।
আৰু এই কথা প্ৰমাণ কৰিছে গুৱাহাটী মহানগৰীৰ মাজমজিয়াৰ লক্ষ্মী নগৰ পথৰ জৰাজীৰ্ণ অৱস্থাই। যিটো পথে মহানগৰীৰ আৰ জি বৰুৱা আৰু জাপৰিগোগ পথক সংযোগ কৰিছে।
উক্ত অঞ্চলৰে নিৱাসী নৱ কুমাৰ গোস্বামীয়ে নৰ্থ ইষ্ট নাওৰ আগত প্ৰকাশ কৰা মতে এই পথটি ২০০৩ চনতে কংগ্ৰেছে নিৰ্মাণ কৰাৰ পিছত পূৰ্বৰ কংগ্ৰেছ চৰকাৰ আৰু বৰ্তমানৰ শাসনাধিস্থ বিজেপি চৰকাৰেও পথটি এতিয়ালৈকে কোনো ধৰণৰ মেৰামতি কৰা নাই।
তাৰোপৰি গোস্বামীয়ে কয় যে এই সম্পূৰ্ণভাৱে জৰাজীৰ্ণ তথা মাত্ৰ সামান্য বৰষুণ দিলেই পথৰ ওপৰতে হাঁহ চৰিব পৰা অৱস্থা হোৱা সত্ত্বেও স্থানীয় বিধায়ক সিদ্ধাৰ্থ ভট্টাচাৰ্যই এই ক্ষেত্ৰত কোনো ধৰণৰ গুৰুত্ব প্ৰদান কৰা নাই।
মন কৰিব লগীয়া যে পথটোৰ অৱস্থা ইমানই শোচনীয় যে চাৰি চকীয়া গাড়ী উক্ত পথেৰে চলাচল কৰাতো বাদেই দুচকীয়া বহনে সেই অঞ্চলেৰে আহ-যাহ কৰোতে পথৰ সলনি পথৰ কাষৰ পদপথেৰে আহ-যাহ কৰে।
তাৰোপৰি আন এজন স্থানীয় ব্যক্তি কিশোৰ ভৰালীয়ে সকলো ৰাজনৈতিক নেতা একে বুলি উল্লেখ কৰি কয় যে তেওঁলোকে কেৱল নিৰ্বাচনৰ আগতহে দেখা দিবলৈ আহে। কিন্তু স্থানীয় ৰাইজে ২০০৩ চনৰ পৰা ভূগি অহা এই সমস্যা সমাধানৰ ক্ষেত্ৰত বৰ্তমানলৈকে কোনো ধৰণৰ গুৰুত্ব প্ৰদান কৰা নাই।
একেদৰে চানামাৰিৰ অমিয়ানগৰৰ পথৰ অৱস্থাও একে। ফলত স্থানীয় ৰাইজে শাসনাধিস্থ চৰকাৰখনৰ ওপৰত বাৰুকৈয়ে ক্ষোভিত হৈ পৰিছে। তাৰোপৰি গুৱাহাটী মহানগৰীতে পথৰ এনে দুৰৱস্থা হোৱাত গাঁৱৰ ভিতৰুৱা অঞ্চলৰ পথ সমূহ কিমান উন্নতি হৈছে তাক লৈও স্থানীয় ৰাইজৰ সন্দেহ প্ৰকাশ কৰিছে।
