বৃহস্পতিবাৰে বিয়লি ৫ বাজি ৫ মিনিটত মৃত্যুক সাবটি লোৱা মূল্যবোধৰ ৰাজনীতিৰ ঘাইখুঁটাস্বৰূপ প্ৰাক্তন প্ৰধান মন্ত্ৰীৰ অন্তোষ্টিক্ৰিয়া অনুষ্ঠানত অসমৰ মুখ্য মন্ত্ৰী সৰ্বানন্দ সোণোৱাল, ৰাজ্যিক বিজপিৰ সভাপতি ৰঞ্জিত দাস, সাধাৰণ সম্পাদক দিলীপ শইকীয়াকে ধৰি ৰাজ্যিক বিজেপিৰ অন্যান্য নেতৃবৃন্দই অংশগ্ৰহণ কৰে।
উল্লেখ্য যে, শুকুৰবাৰে যমুনা নদীৰ পাৰত বিয়লি ৫ বজাত সম্পন্ন হোৱা শেষাকৃত্যত বাজপেয়ীৰ তোলনীয়া কন্যা নমিতা ভট্টাচাৰ্য্য আৰু নাতিনী নিহাৰিকাই প্ৰাক্তন প্ৰধান মন্ত্ৰীগৰাকীৰ মুখাগ্নি কৰে। লগতে ২১ টা টোপধ্বনিৰে ৰাষ্ট্ৰীয় মৰ্য্যদাৰে শেষ বিদায় দিয়া হয় ৰাজনীতিৰ মহীৰূহগৰাকীক। তদুপৰি বাজপেয়ীৰ অস্থি হৰিদ্বাৰত বিসৰ্জন দিয়া হ’ব বুলি জানিব পৰা গৈছে।
আনহাতে, অসমৰ মুখ্য মন্ত্ৰী সৰ্বানন্দ সোণোৱালে দিল্লীত থকাৰ সময়তে অৰ্থ্যাৎ শেষৰবাৰলৈ শ্ৰদ্ধাঞ্জলি জ্ঞাপন কৰি উঠি প্ৰাক্তন প্ৰধানমন্ত্ৰীগৰাকীৰ স্মৃতি সুঁৱৰি নিজৰ ফেচবুক পেইজত লিখিছে এইদৰে, ‘অটলজীৰ মহাপ্ৰয়াণ মোৰ ব্যক্তিগত জীৱনৰ বাবে এক বৃহৎ ক্ষতি। মই প্ৰথমবাৰৰ বাবে নিৰ্বাচনত পৰাজয়বৰণ কৰোঁতে তেখেতে দিয়া প্ৰেৰণা আৰু সাহস আজিও মনত সজীৱ হৈ আছে।
তেখেতে কৈছিল-“সৰ্বানন্দ, যদি তুমি সমাজ আৰু জনতাৰ প্ৰতি নিঃস্বাৰ্থভাৱে সেৱা আগবঢ়াব বিচৰা,তেন্তে তুমি বহু ঘাত-প্ৰতিঘাত, প্ৰত্যাহ্বান আৰু পৰাজয়ৰ সন্মুখীন হ’ব লাগিব। কিন্তু তুমি হতাশগ্ৰস্ত নহৈ নতুন উদ্যমেৰে দেশৰ স্বাৰ্থত কঠোৰ পৰিশ্ৰম কৰি যাবলৈ মন বান্ধিব লাগিব।”
‘যুগদ্ৰষ্টা অটলজীৰ এই অমূল্য বাক্যকেইশাৰী মোৰ জীৱনৰ বাবে অফুৰন্ত প্ৰেৰণাৰ উৎস,‘-সোণোৱালে উল্লেখ কৰিছে।
আনহাতে, শেষাকৃত অনুষ্ঠানত উপস্থিত থকা বিজেপিৰ ৰাজ্যিক সভাপতিগৰাকীয়েও প্ৰাক্তন প্ৰধান মন্ত্ৰীগৰাকীৰ বিয়োগত গভীৰ শোক প্ৰকাশ কৰে আৰু তেওঁলৈ শেষ শ্ৰদ্ধাঞ্জলি জ্ঞাপন কৰে।
ইয়াৰোপৰি অগপৰ সভাপতি অতুল বৰাৰ নেতৃত্বত যোৱা কাৰ্য্যকৰী সভাপতি কেশৱ মহন্ত, সাধাৰণ সম্পাদক ড০ কমলাকান্ত কলিতায়ো অন্ত্যেষ্টিক্ৰিয়া অনুষ্ঠানত অংশগ্ৰহণ কৰে। উল্লেখ্য যে অগপৰ মুখ্য কাৰ্য্যালয়তো প্ৰাক্তন প্ৰধান মন্ত্ৰীগৰাকীৰ প্ৰতি সন্মান জনাই দলীয় পতাকা অৰ্ধনমিত কৰি ৰখা হয়।
আনহাতে, শেষকৃত্য অনুষ্ঠানত ৰাষ্ট্ৰপতি ৰামনাথ কোবিন্দ, উপ-ৰাষ্ট্ৰপতি ভেংকায়া নাইডু, প্ৰধানমন্ত্ৰী নৰেন্দ্ৰ মোদী, অমিত শ্বাহ,গৃহ মন্ত্ৰী ৰাজনাথ সিং, কংগ্ৰেছ অধ্যক্ষ ৰাহুল গান্ধী, লালকৃষ্ণ আদবানী, মুৰলী মনোহৰ যোশী, নিৰ্মলা সীতাৰমণ, ভূটানৰ ৰজা, বাংলাদেশৰ বিদেশ মন্ত্ৰী, শ্ৰীলংকাৰ ভাৰপ্ৰাপ্ত বিদেশ মন্ত্ৰী, নেপালৰ বৈদেশিক পৰিক্ৰমা মন্ত্ৰী, পাকিস্তানৰ আইন মন্ত্ৰীসহ দক্ষিণ-পূৱ এছিয়াৰ ৰাষ্ট্ৰৰ প্ৰতিনিধিয়ে অংশগ্ৰহণ কৰে।
