চৰকাৰ পৰিৱৰ্তন হ’ল। নতুন চৰকাৰে কথা দিলে গুৱাহাটীক স্মাৰ্ট কৰি দিয়াৰ।
কিন্তু স্মাৰ্ট চিটি দূৰতে থাকক। সপোন দেখুওৱা বিজেপি চৰকাৰৰ গুৱাহাটী উন্নয়ন বিভাগে আজি পৰ্য্যন্ত মেৰামতি কৰিব নোৱাৰিলে ভগ্ন পদপথ, মেনহ’লসমূহ।
গুৱাহাটীৰ বিভিন্ন প্ৰান্তত বিশেষকৈ এ বি চি, ভঙাগড়, পল্টনবজাৰ, গণেশগুৰি, বেলতলা বজাৰ, আমবাৰী, ফাঁচিবজাৰকে ধৰি অন্য বহুতো অঞ্চলত পদপথসমূহৰ মেৰামতিৰ অভাৱত সেইসমূহত সৃষ্টি হৈছে বৃহৎ ফাট। বহু অংশত পদপথসমূহত ঢাকনী নথকা বাবে পথচাৰীসকলৰ জীৱনলৈয়ে ভাবুকি আহিছে। বহুকেইজন পথচাৰী ঘুণীয়া হৈছে এই ভগ্ন পদপথ আৰু উন্মুক্ত মেনহ’লত ভৰি সোমাই।
ভুক্তভোগী পথচাৰীয়ে বিভাগীয় কৰ্তৃপক্ষ তথা বিভাগীয় মন্ত্ৰী সিদ্ধাৰ্থ ভট্টাচাৰ্য্য আৰু প্ৰাক্তন বিভাগীয় মন্ত্ৰী ড০ হিমন্ত বিশ্ব শৰ্মাৰ ওপৰত ক্ষোভ উজৰা বাদে একো কৰিব নোৱাৰে।
এই সম্পৰ্কত নৰ্থ-ইষ্ট নাওৰ সৈতে হোৱা কথা-বতৰাত এ বি চি-ভঙাগড় অঞ্চলৰে দুগৰাকী ব্যক্তিয়ে আশংকা প্ৰকাশ কৰাৰ লগতে পদপথসমূহৰ অৱস্থা উন্নত কৰিবৰ বাবেও আহ্বান জনাইছে।
এগৰাকী সমাজ সচেতক তথা ভগা পদপথৰ ভুক্তভোগী প্ৰশান্ত বৰ্মনে নৰ্থ-ইষ্ট নাওৰ আগত নিজৰ প্ৰতিক্ৰিয়া ব্যক্ত কৰি কয়, “মোৰ বাওঁভৰিখন এবছৰমান আগতে ভঙাগড় অঞ্চলৰ পদপথত প্ৰাতঃভ্ৰমণ কৰি আহি থাকোতে গাঁতত সোমাই মোচোকা খাই ভাগিছিল, যাৰ ফলত মই ৪৫ দিন বিছনাত পৰি থাকিবলগীয়া হৈছিল।”
তেওঁ লগতে কয়, “প্ৰায় ১০ বছৰ ধৰি উক্ত অঞ্চলৰ পদপথসমূহ একে অৱস্থাতে আছে তথা কোনোধৰণৰ মেৰামতি কৰা নাই।”
আনহাতে, তেওঁ পদপথসমূহ বিজ্ঞানসন্মতভাৱে নিৰ্মাণ কৰিবৰ বাবে বিভাগীয় কৰ্তৃপক্ষক আহ্বান জনোৱাৰ উপৰি কয়, “পদপথ নিৰ্মাণ কৰা অভিযন্তা অথবা বিভাগীয় কৰ্তৃপক্ষৰ এইসমূহ নিৰ্মাণ কৰাত সদ্দিচ্ছা থাকিব লাগে।”
ইয়াৰোপৰি উক্ত অঞ্চলৰে আন এগৰাকী সচেতন ব্যক্তি প্ৰদীপ বৰ্মনে কয় যে চৰকাৰে নমামি বৰাক-ব্ৰহ্মপুত্ৰ অনুষ্ঠিত কৰিছে, এডভাণ্টেইজ আছামো অনুষ্ঠিত কৰিছে, কিন্তু উত্তৰ-পূবৰ দূৱাৰমুখ গুৱাহাটীৰ পদপথসমূহৰ লগতে ৰাস্তা মেৰামতি কৰাৰ বাবে গুৱাহাটী উন্নয়ন বিভাগটোৰ সময় নাই।
তেওঁ লগতে কয়, “গুৱাহাটী উন্নয়ন বিভাগত থকা মন্ত্ৰী সিদ্ধাৰ্থ ভট্টাচাৰ্য্য নিজেই পূব গুৱাহাটী সমষ্টিৰ। ফুটপাথসমূহৰ মেৰামতি কৰাৰ ক্ষেত্ৰত যিধৰণে গুৰুত্ব আৰোপ কৰিব লাগিছিল, তেওঁ সেইধৰণে কৰা নাই।”
চৰকাৰে উন্নয়নমূলক কাম-কাজসমূহ কৰিলেও কেইদিনমান পাছতে ৰাস্তা-ঘাট অথবা পদপথত ডাঙৰ-ডাঙৰ গাঁতৰ সৃষ্টি হয় বুলিও তেওঁ কয়। ইয়াৰোপৰি তেওঁ চৰকাৰৰ এই কাম-কাজবোৰক ল’ৰা-ধেমালি আখ্যা দিয়ে।
উল্লেখ্য যে, এ বি চিস্থিত কংগ্ৰেছৰ ৰাজীৱ ভৱনৰ সন্মুখতে পদপথৰ অৱস্থা তেনেই দুখ লগা। ঠিক সেইদৰে অতি ব্যস্ততাপূৰ্ণ অঞ্চল যেনে- বেলতলা বজাৰৰ মাজমজিয়া, পল্টনবজাৰ, গণেশগুৰিত পদপথৰ কেইবা ঠাইতো ঢাকনী নাই, যাৰ বাবে পথচাৰীসকলৰ বাবে ন-ন সমস্যা আহি পৰিছে।
