অসমত সঘনাই দি থকা বন্ধই ৰাজ্যখনৰ চাহ উদ্যোগৰ যথেষ্ট ক্ষতি সাধন কৰিছে বুলি নৰ্থ-ইষ্টাৰ্ন টী এছোচিয়েশ্যন (North Eastern Tea Association) অৰ্থাৎ ‘নেটা’ই কালি গুৱাহাটীত সদৰি কৰিছে।
অসমৰ ১৯৫ বছৰীয়া চাহ উদ্যোগ বিভিন্ন সমস্যাৰে ভাৰাক্ৰান্ত হৈ বৰ্তি থকাৰ বাবে যথেষ্ট সংগ্ৰাম কৰিবলগীয়া হৈছে বুলি নৰ্থ-ইষ্টাৰ্ন টী এছোচিয়েশ্যনৰ অধ্যক্ষ নিপুল শইকীয়াই এক বিজ্ঞপ্তিযোগে প্ৰকাশ কৰিছে।
বিজ্ঞপ্তিটোত এছোচিয়েশ্যনৰ অধ্যক্ষগৰাকীয়ে প্ৰকাশ কৰিছে যে অসমত বন্ধৰ ইতিহাস অতি পুৰণি যদিও পূৰ্বতে চাহ বাগিচাসমূহৰ কাম-কাজত আজিৰ দৰে প্ৰতিবন্ধকতা আহি পৰা নাছিল।
শইকীয়াই কৈছে যে অস্বীকৃত সংগঠনসমূহে হকে-বিহকে বন্ধ ঘোষণা কৰি থকাৰ ফলত চাহ বাগিচাসমূহৰ স্বাভাৱিক কাম-কাজত বাধাৰ সৃষ্টি হৈছে।
নেটাৰ অধ্যক্ষগৰাকীয়ে আৰু জনাইছে যে সেউজীয়া চাহপাত হৈছে অতি সোনকালে নষ্ট হোৱা সামগ্ৰী। চাহপাত চিঙা কামটো দৈনিক কৰিব লাগে আৰু যথা সময়ত ইয়াক প্ৰস্তুত কৰিব লাগে। ইয়াৰ ব্যতিৰেকে চাহপাতৰ গুণগত মানদণ্ড হ্ৰাস পায় আৰু এইদৰে চাহ বাগিচাসমূহ লোকচানৰ মুখামুখি হ’বলগীয়া হয়।
তেওঁ আৰু কৈছে যে এদিনৰ চাহপাত চপোৱাৰ লোকচানখিনি পৰৱৰ্তী দিনত পূৰাব নোৱাৰি, গতিকে ইতিমধ্যেই ৰুগ্ন হৈ পৰা চাহ উদ্যোগটোক এই বন্ধসমূহে আৰু ব্যাপকভাৱে ক্ষতিগ্ৰস্ত কৰি তুলিছে।
এনে ধৰণৰ পৰিস্থিতিত সঘনে দি থকা বন্ধই উদোগটোৰ কৰ্মশক্তিৰ প্ৰত্যক্ষ অৰ্থনৈতিক লোকচান কৰে। চাহ উদ্যোগৰ ব্যৱস্থাপনাত হোৱা এই লোকচান বহন কৰিব নোৱাৰি আৰু এই লোকচান গ্ৰহণযোগ্য নহয়।
‘আছাম ট্ৰিবিউন’ কাকতত প্ৰকাশিত এটা প্ৰতিৱেদনত ‘কিছুমান শক্তিয়ে চাহ উদ্যোগটোক ধ্বংস কৰিবলৈ উঠি পৰি লাগি আছে’ প্ৰকাশ পাইছে। প্ৰতিৱেদনটোত আৰু কোৱা হৈছে যে যদিহে অতি সোনকালে উপযু্ক্ত পদক্ষেপ গ্ৰহণ কৰা নহয়, তেন্তে চাহ উদ্যোগটো লাহে লাহে ধ্বংসৰ মুখলৈ গতি কৰিব।
নেটাৰ উপদেষ্টা বিদ্যানন্দ বৰকটকীয়ে চৰকাৰলৈ অনুৰোধ জনাইছে যাতে অসমৰ বন্ধ সংস্কৃতিৰ পৰা চাহ বাগানসমূহক প্ৰভাৱিত নোহোৱাকৈ ৰাখি সেইসমূহৰ কাম-কাজ স্বাভাৱিকভাৱে চলাই ৰাখিবলৈ প্ৰয়োজনীয় ব্যৱস্থা গ্ৰহণ কৰে।
উপদেষ্টাগৰাকীয়ে সংগঠনসমূহকো চাহ বাগিচাসমূহৰ উৎপাদিত সামগ্ৰীসমূহক অত্যাৱশ্যকীয় সামগ্ৰী হিচাপে বিৱেচনা কৰি বাগিচাসমূহক বন্ধৰ প্ৰভাৱৰ পৰা আঁতৰাই ৰাখিবলৈ আহ্বান জনায়।
