চলিত বৰ্ষৰ জুন মাহৰ শেষৰ ফালে মণিপুৰৰ মুখ্য মন্ত্ৰী এন বীৰেন সিঙে আনুষ্ঠানিকভাৱে আৰম্ভ কৰাৰ পাচত ৰাজ্যখনৰ বন মন্ত্ৰী থৌনাওজাম শ্যামকুমাৰ সিঙে অগৰুৰ সমুহীয়া ৰোপণ কাৰ্যসূচী ৰাজ্যখনৰ বিভিন্ন স্থানত আয়োজন কৰি আহিছে।
বন বিভাগৰ শীৰ্ষস্থীনীয় বিষয়াসকলৰ সৈতে বন আৰু পৰিৱেশ মন্ত্ৰীগৰাকীয়ে সেনাপতি জিলাৰ থৌবাল ফৰেষ্ট ডিভিজনৰ অন্তৰ্গত আইলেণ্ড গাঁৱত অগৰুৰ সমুহীয়া ৰোপণ কাৰ্যসূচী আৰম্ভ কৰে।
বন মন্ত্ৰীগৰাকীয়ে কৈছে যে অগৰুৰ গছ ৰোপণ কৰি গাঁৱবাসীসকল অৰ্থনৈতিকভাৱে লাভান্বিত হ’ব পাৰিব। তেওঁ কৈছে যে আইলেণ্ড গাঁৱৰ চাৰিওফালে ৩,৩০০ জোপা অগৰুৰ পুলি ৰোপণ কৰা হ’ব। বন মন্ত্ৰীগৰাকীয়ে গাঁৱবাসীকলক অগৰুৰ পুলিসমূহ প্ৰতিপালন কৰাৰ বাবে উপদেশ দিয়ে।
তেওঁ আৰু কয় যে ৭ৰ পৰা ৮ বছৰৰ ভিতৰত একোডাল অগৰু গছৰ পৰা তেওঁলোকে ৩০ হাজাৰৰ পৰা ১ লাখ টকা পৰ্যন্ত লাভ কৰিব পাৰিব।
উল্লেখ্য যে যোৱা বছৰ মণিপুৰ ছাংগাই মহোৎসৱত ভাৰত আৰু লাওছ চৰকাৰৰ মাজত সম্পন্ন হোৱা বুজাবুজিৰ চুক্তি অনুসৰি লাওছ চৰকাৰে মণিপুৰত ৰোপণ কৰা অগৰু গছৰ প্ৰতিপালন ব্যয়, ৰোগৰ ব্যয় বহন কৰাৰ উপৰিও অগৰু গছৰ বাবে বজাৰৰ ব্যৱস্থা কৰিব।
প্ৰধান মুখ্য বন সংৰক্ষক আৰু বন ৰক্ষী বাহিনীৰ মুৰব্বী কাৰেলহৌবি আংগামি (PCCF & HoFF), থৌবাল ফৰেষ্ট ডিভিজনৰ বন বিষয়াসকল আৰু স্থানীয় লোকসকলে অগৰু পুলি ৰোপম কাৰ্যসূচীত উপস্থিত আছিল।
ইয়াৰ পূৰ্বে নগৰ পৰিকল্পনা বিভাগৰো দায়িত্বত থকা বন মন্ত্ৰী শ্যামকুমাৰে কোৰেইনগেই, ছাংগাকফাম, কাঞ্চিপুৰ আৰু ইৰোইছেম্বাৰ নিৰ্মীয়মান জলাধাৰ আৰু জন পৰিশোধন প্ৰকল্পকেইটা পৰিদৰ্শন কৰে।
চৰকাৰৰ গৃহ নিৰ্মাণ আৰু নগৰ পৰিক্ৰমা মন্ত্ৰ্যালয়ৰ পুঁজিৰে পুনৰুজ্জীৱন আৰু নগৰীয় ৰূপান্তৰণ আঁচনিৰ হকে অটল অভিযানৰ অধীনত সকলো নগৰীয় এলেকাত খোৱা পানী যোগান ধৰাৰ এই প্ৰকল্পসমূহৰ নিৰ্মাণকাৰ্যসমূহ ভাৰত চলি আছে।
