ডিমা হাচাও জিলাত আকৌ আৰম্ভ হৈছে সন্দেহযুক্ত উগ্ৰপন্থীৰ দপদপনি। পাৰ্বত্য স্বায়ত্ত শাসিত পৰিষদৰ হাজাদিচা পৰিষদীয় সমষ্টিত নিশাৰ আন্ধাৰত হাতত এ কে ৪৭ হাতত লৈ অগপ নেতাৰ সন্ধানত বিচৰণ কৰিছে উগ্ৰপন্থী দল। অগপৰ ডিমা হাচাও জিলা ট্ৰাইবেল পৰিষদৰ সভাপতি ফিৰ’জ লাংথাচাক বিচাৰি চলিছে উগ্ৰপন্থীৰ এই অভিযান।
আজি হাফলঙৰ অগপ কাৰ্যালয়ত এক সংবাদমেল পাতি উগ্ৰপন্থীয়ে ভাবুকি দিয়া তথা উগ্ৰপন্থীৰ দলে মাৰণাস্ত্ৰলৈ তেওঁৰ সন্ধান কৰি থকাৰ কথা নিজ মুখে সদৰী কৰে অগপ ট্ৰাইবেল পৰিষদৰ সভাপতি ফিৰ’জ লাংথাচায়।
তেওঁ কয় যে যোৱা দেওবাৰে হাজাদিচা পৰিষদীয় সমষ্টিৰ দৈৰাঙ্গি গাওঁত অগপ যুৱ পৰিষদৰ সভা সামৰি হাজাদিচাৰ নাবলাইদিচা গাওঁৰ নিজ ঘৰত শুৱলৈ যোৱাৰ সময়ত ৰাতি দুটা মান বজাত পাঁচ জনীয়া উগ্ৰপন্থীৰ এটা দলে হাতত এ কে ৪৭ লৈ ঘৰৰ দুৱাৰত টুকুৰিয়ায়। উগ্ৰপন্থীকেইজনৰ এজনে টি-ছাৰ্ট পৰিধান কৰাৰ বাহিৰে বাকি চাৰি জনে সেনাৰ পোছাক পৰিধান কৰি আহিছিল।
আনহাতে, হাজাদিচাৰ দিদাম্ব্ৰা গাঁওত লাংথাচাৰ এখন বেচৰকাৰী আবাসিক বিদ্যালয়তো একেই দিনাই নিশা উগ্ৰপন্থীৰ দলটো মাৰণাস্ত্ৰলৈ উপস্থিত হৈ বিদ্যালয়ৰ শিক্ষক-শিক্ষয়ত্ৰীক ফিৰ’জ লাংথাচাৰ বিষয়ে সোধাপোছ কৰে।
ডিমা হাচাও জিলাত আজিৰ দিনত আপাতত: কোনো উগ্ৰপন্থী নাই। যিবোৰ উগ্ৰপন্থী আছিল চৰকাৰৰ লগত চুক্তি স্বাক্ষৰ কৰি এতিয়া মূলসুঁতিলৈ ঘুৰি অহাৰ উপৰি অবৈধ মাৰণাস্ত্ৰসমূহ চৰকাৰৰ ঘৰত জমা দিছে। তেনেক্ষেত্ৰত এতিয়া এ কে ৪৭ ৰাইফেল হাতত লৈ সেনাৰ পোছাক পৰিধান কৰি ৰাতিৰ আন্ধাৰত ভয় ভাবুকি দিয়া সকলক কোনে সহযোগ কৰি আছে ? লাংথাচাই এনে ঘটনাৰ চৰকাৰক তদন্ত কৰাৰ লগতে ঘটনাত জড়িত অপৰাধীক গ্ৰেপ্তাৰৰ দাবী জনায়। ইয়াৰ অন্যথা বৃহত্তৰ প্ৰতিবাদী আন্দোলন গঢ়ি তোলা হ’ব বুলিও তেওঁ সকীয়াই দিয়ে।
ইতিমধ্যে এই সন্দৰ্ভত লাংথাচাই মাইবাঙ আৰক্ষী থানাত এখন এজাহাৰ দাখিল কৰিছে। লাংথাচাই এই ঘটনাক এক ৰাজনৈতিক ষড়যন্ত্ৰ বুলি অভিহিত কৰিছে। আনহাতে জিলা অগপ সভাপতি বকুল বড়োয়েও এনে ঘটনাৰ তীব্ৰ ভাষাৰে গৰিহণা দি দোষীক গ্ৰেপ্তাৰ কৰাৰ দাবী উত্থাপন কৰে।
উল্লেখযোগ্য যে উত্তৰ কাছাৰ পাৰ্বত্য স্বায়ত্ত শাসিত পৰিষদৰ সাধাৰণ নিৰ্বাচন অহা চেপ্টেম্বৰ বা নৱেম্বৰ মাহত অনুষ্ঠিত হোৱাৰ কথা আৰু ফিৰ’জ লাংথাচা হৈছে অগপ দলৰ হাজাদিচা সমষ্টিৰ প্ৰক্ষেপিত প্ৰাৰ্থী।
