ত্ৰিপুৰাৰ ধৰ্মনগৰত আজি সংঘটিত এক ভয়াৱহ পথ দুৰ্ঘটনাত এগৰাকী ১৮ বছৰীয়া যুৱতী থিতাতে নিহত হোৱাৰ লগতে আন ৩জন লোক গুৰুতৰভাৱে আহত হয়।
আজি পুৱা বাগপাছা-ধৰ্মনগৰ পথৰ গংগাসাগৰত এখন ১২ চকীয়া মালবাহী ট্ৰাকে বিপৰীত দিশৰ পৰা আহি থকা এখন অটোৰ লগত মুখামুখী সংঘৰ্ষ লগাৰ ফলতে এই দুৰ্ঘটনাটো হয় বুলি জানিব পৰা গৈছে।
প্ৰত্যক্ষদৰ্শীয়ে জনোৱা মতে ধৰ্মনগৰৰ পৰা গুৱাহাটী অভিমুখে আহি থকা এম এল ০১-এম ৭৯৪৩ নম্বৰৰ তীব্ৰবেগী ১২ চকীয়া ট্ৰাকখনে টি আৰ ০২- বি ৩২৬১ নম্বৰৰ অটোখনক খুন্দা মৰাত ৩ গৰাকী লোক আহত হোৱাৰ লগতে যুৱতীগৰাকী থিতাতে নিহত হয়।
নিহত যুৱতীগৰাকীক অনিন্দিতা মাহান্তো বুলি চিনাক্ত কৰা হৈছে, আনহাতে অটোত থকা তেওঁৰ মাতৃ শঞ্চিতা মাহান্তো, সম্পৰ্কীয় অনিটা চৌধুৰী আৰু অটো চালক বিশ্বেশ্বৰ দেবনাথ গুৰুতৰভাৱে আঘাটপ্ৰাপ্ত হয়।
আঘাটপ্ৰাপ্ত লোককেইজনক উন্নত চিকিৎসাৰ বাবে শিলচৰলৈ প্ৰেৰণ কৰা হৈছে। আনহাতে দুৰ্ঘটনাৰ খবৰ লাভ কৰিয়েই আৰক্ষী ঘটনাস্থলীত উপস্থিত হৈ ট্ৰাক চালক ৰটন দেক গ্ৰেপ্তাৰ কৰি তেওঁৰ বিৰুদ্ধে গোচৰ ৰুজু কৰিছে।
