ৰাজ্যৰ শক্তি বিভাগত ব্যাপক পৰিৱর্তনৰ কথা কোৱা চৰকাৰৰ এচাম অকৰ্মণ্য আমোলা-বিষয়াৰ চৰম দায়িত্বহীন কাৰ্যৰ বাবেই মুখ্য মন্ত্ৰীৰ গৃহ সমষ্টি মাজুলীৰ এখন গাঁৱৰ ৰাইজে ভয়ংকৰ বিপদৰ সন্মুখীন হৈছে।
উল্লেখ্য যে মাজুলীৰ সোণোৱাল কছাৰী চিকাৰী নামৰ গাঁওখনৰ প্ৰায় ৯৫ শতাংশ মানুহ দৰিদ্ৰ সীমা ৰেখাৰ তলত বসবাস কৰি আছে। কিন্তু অসম ৰাজ্যিক বিদ্যুৎ বিভাগৰ দৃষ্টিত গাঁৱখনত নাই কোনো দুখীয়া ৰাইজ। ইয়াৰ প্ৰমাণ ওলাইছে বিভাগে জাৰি কৰা বিদ্যুৎ মাচুল সংগ্ৰহৰ বিলত।
গাঁৱখনৰ জনসাধাৰণৰ আগতে প্ৰতি মাহত বিল আহিছিল গড়ে ১৫০ টকাৰ পৰা ২০০ টকা। কিন্তু মাজতে জুন-জুলাই মাহৰ বিল কোনো মানুহকে নিদিয়াৰ বিপৰীতে আগষ্ট মাহৰ বিল প্ৰেৰণ কৰিলে ৰাইজলৈ। মাজত মাত্ৰ ৬০ টা দিনৰ ব্যৱধানত ৰাইজৰ বিল আহিল ৯ হাজাৰৰ পৰা ১৪ হাজাৰ টকা।
বিদ্যুৎ বিভাগৰ এনে কাণ্ডৰ পিছত এতিয়া চকুৰে সৰিয়হ ফুল দেখিছে গাঁৱবাসীয়ে। কিয়নো যি সকল দুখীয়া ৰাইজে দুটা বা এটা বাল্ব আৰু দুই এক ঘৰত এটা টিভি চলোৱাৰ বাবদ মাহেকত দি আহিছিল ১৫০ ৰ পৰা ২০০ টকা কিন্তু বৰ্তমান সেই একেই ৰাইজৰ এতিয়া বিল ধন হৈছে হাজাৰৰ ঘৰত।
উল্লেখ্য যে এই সকলো বিসংগতিৰ মূল কাৰণ সন্দৰ্ভত ৰাইজে দিছে ভয়ংকৰ অভিযোগ। বিভাগৰ কোনো মিটাৰ ৰিডাৰ নাযায় গাওঁখনত। নিজৰ খেয়াল খুচি মতে বিল বনাই প্ৰেৰণ কৰে বিয়াগোম বিভাগটোৱে। আচলতে একাংশ অকৰ্মণ্য কৰ্মচাৰীৰ বাবেই এনেদৰে বিপদত পৰিছে এতিয়া চিকাৰীৰ গাঁৱবাসী।
এতিয়া গাঁৱবাসীয়ে মুখ্য মন্ত্ৰী সৰ্বানন্দ সোনোৱাল আৰু শক্তি মন্ত্ৰী তপন গগৈৰ হস্তক্ষেপ বিচাৰি সমগ্ৰ ঘটনাটোৰ উচিত তদন্তৰ পোষকতা কৰিছে। ইফালে দৰিদ্ৰ জনতাক ৰাম ঠগন দি চলি থকা মাজুলীৰ বিদ্যুৎ বিভাগক নিয়ন্ত্ৰন কৰিবলৈ দাবী জনাইছে মাজুলীবাসীয়ে।
