‘ৰাষ্ট্ৰীয় নাগৰিক পঞ্জী অসমীয়া জাতিৰ আয়ুসৰেখাস্বৰূপ’, গুৱাহাটী প্ৰেছ ক্লাবত সংবাদ মাধ্যমৰ আগত বুধবাৰে এই মন্তব্য কৰে জ্যেষ্ঠ সাংবাদিক ধীৰেন্দ্ৰ নাথ চক্ৰৱৰ্তীয়ে।
এন আৰ চি উন্নীতকৰণ প্ৰক্ৰিয়াত সংঘটিত হোৱা ভুল-ত্ৰুটিসমূহক সামান্য ভুল বুলি আখ্যা দি চক্ৰৱৰ্তীয়ে কয় ‘পি এইছ ডি ডিগ্ৰীধাৰী অথবা বিজ্ঞানী পৰ্য্যায়ৰ লোক এন আৰ চি উন্নীতকৰণ প্ৰক্ৰিয়াৰ সৈতে জৰিত হোৱা নাই, মেট্ৰিক পাছ কৰা কিছুমান এনআৰচি কামৰ সৈতে জৰিত হৈ আছে গতিকে সৰু-সুৰা ভুল হোৱাটো স্বাভাৱিক।’
চক্ৰবৰ্তীৰ মতে এন আৰ চিৰ ‘৮০ শতাংশ কামেই শুদ্ধ হৈছে, বাকী ২০ শতাংশ কামত কিছু খেলি মেলি আছে, এইবোৰ সময়ত শুদ্ধ হৈ যাব, ইয়াক লৈ চিন্তিত হ’ব নালাগে।‘
আনহাতে অসমত থকা পূৰ্ববংগভাষী মুছলমানসকল এন আৰ চিৰ পিছত নিৰাপদ হ’ব বুলিও তেওঁ মন্তব্য কৰে।
‘আগতে তেওঁলোকক বাংলাদেশী বুলি সকলোৱে ভাবি আছিল। এন আৰ চিৰ চূড়ান্ত খচৰা প্ৰকাশৰ পাছত সেইসকল সুখে-শান্তিৰে তথা নিৰাপদে থাকিব পাৰিছে,’ মন্তব্য চক্ৰবৰ্তীৰ।
এন আৰ চিক লৈ প্ৰতিক্ৰিয়াশীল আৰু ৰাষ্ট্ৰ তথা অসমবিৰোধী শক্তিয়ে ষড়যন্ত্ৰ কৰিলেও শুদ্ধ ৰূপত ই প্ৰকাশ পাবই বুলি আশা প্ৰকাশ কৰে প্ৰবীণ সাংবাদিকগৰাকীয়ে।
‘যিমানেই ষড়যন্ত্ৰ নকৰক কিয় উচ্চতম ন্যায়ালয়ৰ পৰিচালনাত এখন শুদ্ধ এন আৰ চি প্ৰস্তুত হ’ব বুলি আশা কৰিছো,’ আশা চক্ৰবৰ্তীৰ।
