বটদ্ৰৱাত পুনৰ সংঘটিত হ’ল মানৱতাক লজ্জানত কৰা ধৰ্ষণৰ দৰে আন এক জঘন্য কাণ্ড৷ বিগত কিছুদিনৰ পৰা জিলাখনত সংঘটিত হোৱা চাঞ্চল্যকৰ ঘটনাসমূহৰ প্ৰতিক্ৰিয়া মাৰ নৌযাওতেই পুনৰ বটদ্ৰৱাৰ বৰহিছা গাঁৱত সংঘটিত হ’ল আন এক ধৰ্ষণৰ অপচেষ্টা।
ঘটনাৰ বিৱৰণী অনুসৰি, ৪ ছেপ্তেম্বৰ অৰ্থাৎ মঙলবাৰে নিশা এগৰাকী তিনি সন্তানৰ মাতৃক ঘৰত কোনো নথকাৰ সুযোগ লৈ নগাঁও খুটিকটীয়া আকাশবাবাণী কেন্দ্ৰৰ সমীপৰ লম্পট যুৱক প্ৰণব বৰুৱাই ধৰ্ষণৰ চেষ্টা চলায়।
জানিব পৰা মতে, মহিলাগৰাকীৰ লগত যুৱকজনে প্ৰথমে চ’ছিয়েল মিডিয়াত চিনাকি হৈছিল। পিছত লম্পট প্ৰণবে প্ৰেমৰ প্ৰস্তাৱ দিয়ে যদিও মহিলাগৰাকীয়ে নাকচ কৰিছিল। সেয়েহে পাষণ্ড নৰপিশাচটোৱে মঙলবাৰে নিশা ঘৰত কোনো নথকাৰ সুযোগ লৈ হাতত চোকা অস্ত্রলৈ তিনি সন্তানৰ মাতৃগৰাকীক ভীতি প্ৰৰ্দশন কৰি ধৰ্ষণৰ চেষ্টা চলায়।
ইফালে মহিলাগৰাকীৰ সন্তানকো শাৰীৰিকভাৱে আক্ৰমণ কৰে লম্পট প্ৰণবে৷ পিছত মহিলাগৰাকীয়ে চিঞৰ-বাখৰ কৰাত স্থানীয় ৰাইজে হাতে-লোটে ধৰি লম্পট প্ৰণবক গতাই দিয়ে বটদ্ৰৱা আৰক্ষীক৷
ইপিনে, ঘটনা সংক্ৰান্তত বাতৰি পৰিবেশনৰ বাবে বুধবাৰে অভিযুক্তৰ ফটো সংগ্ৰহ কৰিবলৈ যোৱা বটদ্ৰৱাৰ সাংবাদিকৰ দলটোৰ কেমেৰা ভাঙিবলৈ উদ্যত হোৱাৰ লগতে আক্রমণৰ বাবে চোচা ল’য় লম্পট প্ৰণব বৰুৱাৰ ভায়েকে৷
আৰক্ষীৰ সন্মুখতে লম্পটৰ পৰিয়ালৰ লোকে প্ৰণব বৰুৱাৰ পিতৃ এজন চি আৰ পি এফ জোৱান বুলি পৰিচয় দি সাংবাদিকক ভয়-ভাবুকি প্রদান কৰাৰ লগতে দুৰ্ব্যৱহাৰ কৰাৰো অভিযোগ উত্থাপন হয়।
আনহাতে ঘটনা সন্দৰ্ভত ভুক্তভোগী মহিলাগৰাকীয়ে বটদ্ৰৱা থানাত দাখিল কৰা এখন এজাহাৰৰ ওপৰত ভিত্তি কৰি আৰক্ষীয়ে ২৫৪/১৮ নম্বৰত ৪৫৭, ৩৭৬, ৫১১, ৩২৫ ধাৰাত এটি গোচৰ ৰুজু কৰি লম্পট প্ৰণব বৰুৱাক জেল হাজোতলৈ প্ৰেৰণ কৰিছে।
