তিনিচুকীয়াৰ জিলাৰ লেখাপানীত আজি আৰক্ষীয়ে অভিযান চলাই এটা ড্ৰাগছ ব্যৱসায়ী আটক কৰে ৷ ধৃত ড্ৰাগছ ব্যৱসায়ী জনৰ নাম প্ৰেম সোনাৰ (৩৩) বুলি জানিব পৰা গৈছে। ৩৪ গ্ৰাম হিৰ’ইন সহ লেখাপানীৰ থানাৰ অন্তৰ্গত তিনি মাইলৰ পৰা ড্ৰাগছ ব্যৱসায়ীজনক লেখাপানী আৰক্ষীয়ে আটক কৰে।
উল্লেখযোগ্য যে মাৰ্ঘেৰিটা মহকুমাকে ধৰি তিনিচুকীয়া জিলাৰ বিভাগীয় কৰ্তৃপক্ষৰ সোপাঢিলা নীতিৰ সুযোগ গ্ৰহণ কৰি একাংশ লোকে মাৰ্ঘেৰিটা, লিডু, জাগুন, লেখাপানী, বৰগোলাই আদি অঞ্চলত প্ৰশাসনক ‘মেনেজ’ কৰি ড্ৰাগছৰ ৰমৰমীয়া ব্যৱসায় চলাই থকা বুলি স্থানীয় ৰাইজে বহু দিনৰ পৰা অভিযোগ কৰি আহিছে।
আনহাতে আবকাৰী বিভাগৰ লোকে নিয়ম মাফিক তালাচীৰে দুই এজন লোকক ধৰি বাঃ বাঃ লোৱাৰ বিপৰীতে প্ৰকৃত বেপাৰীসকল গোপন বুজাবুজিৰ বাবেই অভিযানত ধৰা নপৰে বুলি একাংশ লোকে অভিযোগ কৰে। বিশেষকৈ লেখাপানী আৰক্ষী থানাৰ অন্তৰ্গত নিংগাম, টাইফাকে আৰু মাৰ্ঘেৰিটা আৰক্ষী থানাৰ অন্তৰ্গত কেটেটং, ইনথেম, নংলাই, ডিবঙকে ধৰি জনগোষ্ঠীয় প্ৰধান অঞ্চলসমূহত এতিয়া গাঞ্জা-কানিৰ মুক্ত প্ৰচলন চলে।
মহকুমাটোত দীৰ্ঘ দিনৰ পৰা অব্যাহত থকা এনে নিচা জাতীয় দ্ৰব্যৰ বেহা বন্ধ কৰিবলৈ স্থানীয় ৰাইজ আৰু দল সংগঠন সমূহে বিভাগীয় কৰ্তৃপক্ষক অৱগত কৰি আহিছে যদিও এই ক্ষেত্ৰত কোনোধৰণৰ উপযুক্ত ব্যৱস্থা গ্ৰহণ কৰা পৰিলক্ষিত হোৱা নাই। অঞ্চলটোৰ লোকসকলে মাৰ্ঘেৰিটাৰ মহকুমাধিপতি সুমিত সত্তাৱনক তাৎক্ষণিক হস্তক্ষেপৰ দাবী তোলে অন্যথা তীব্ৰ প্ৰতিবাদী কাৰ্যসূচী হাতত লোৱা হ’ব বুলি প্ৰকাশ কৰে।
আজি আটক কৰা প্ৰেম সোনাৰৰ বিৰুদ্ধে এক গোচৰ ৰুজু কৰি আৰক্ষীয়ে জেৰা অব্যাহত ৰাখিছে বুলি জানিবলৈ দিয়ে।
