এটা হৃদয়বিদাৰক ঘটনাত আজি বাগচা জিলাৰ তামুলপুৰ গাৱঁৰ এজন যুৱকে নিজৰ প্ৰিয়তমা পত্নী আৰু মাত্ৰ ২০ দিনীয়া কেঁচুৱা সন্তানক এৰি আত্মহত্যাৰ পথ বাচি লয়। ৩২ বছৰীয়া এই যুৱকজনৰ নাম বিনয় চন্দ। এই কথা জানি যিকোনো মানুহৰ চকুলো সৰিব যে শনিবাৰে সন্ধিয়াৰ ভাগত আত্মহত্যাৰ পূৰ্বে বিনয়ে শহুৰেকৰ ঘৰলৈ গৈ তাত মাকৰ সৈতে থকা নিজৰ ২০ বছৰীয়া কেঁচুৱাটোক কোলাত লৈ মৰম কৰিছিল আৰু নিজৰ পত্নীৰ হাতত ১০০ টকা তুলি দি আহিছিল। তাৰ পিছত খুলশালীয়েকে তেওঁক নিজৰ ঘৰত নমাই থৈ গৈছিল। কিন্তু আজি পুৱা তেওঁৰ মৃতদেহ প্ৰতিৱেশীসকলে ঘৰৰ কাষৰে এজোপা গছত ওলমি থকা দেখা পায়।
দুৰ্ভাগ্যজনকভাৱে বিনয়ৰ আত্মহত্যাৰ কাৰণটো হৈছে চৰকাৰে বিদেশী চিনাক্তকৰণৰ বাবে গঠন কৰি দিয়া বিদেশী ন্যায়াধিকৰণত চলি থকা গোচৰ। মাকক ডি ভোটাৰ বুলি চিনাক্ত কৰি বিদেশী ন্যায়াধিকৰণে চলোৱা গোচৰটোত আ-অলংকাৰ বিক্ৰী কৰি সৰ্বস্বান্ত হৈছিল দিন হাজিৰা কৰি খোৱা বিনয় চন্দ।
তামুলপুৰৰ পৰা দীপক কুমাৰ পাঠক :
তামুলপুৰৰ ডিমিলাপাৰৰ বিনয় চন্দ নামৰ ব্যক্তিজনে আজি পুৱতি নিশা আত্মহত্যা কৰা ঘটনাই অঞ্চলটোত চাঞ্চল্যৰ সৃষ্টি কৰিছে। বিদেশী ন্যায়াধিকৰণত চলি থকা গোচৰৰ বাবে হতাশাগ্ৰস্ত হৈ বত্ৰিছ বছৰীয়া এই যুৱকজনে আত্মহত্যা কৰা বুলি জানিব পৰা গৈছে।
বিনয় চন্দৰ মাতৃ শান্তি চন্দৰ নামত বিদেশী ন্যায়াধিকৰণত এটা গোচৰ আজিৰ পৰা এবছৰ আগৰ পৰা চলি আছিল। স্থানীয় লোকে জনোৱা মতে, দিন হাজিৰা কৰি জীৱন নিৰ্বাহ কৰা বিনয় চন্দে তামুলপুৰস্থিত বিদেশী ন্যায়াধিকৰণ আদালত তাঁত-বাতি কৰি আৰ্থিকভাৱে জুৰুলা হৈ পৰিছিল। প্ৰকৃত ভাৰতীয় নাগৰিক হৈও সন্দেহযুক্ত নাগৰিকৰ গোচৰত পৰি আৰু গোচৰৰ নিষ্পত্তি নোহোৱা বাবে মানসিক আৰু অৰ্থনৈতিকভাৱে ভাঙি পৰিছিল বিনয়।
আনহাতে ৰাষ্ট্ৰীয় নাগৰিকপঞ্জীৰ দ্বিতীয় খচৰাতো পৰিয়ালটোৰ নাম অন্তৰ্ভুক্ত নোহোৱা বুলি জানিব পৰা গৈছে।
মন কৰিব লগীয়া কথাটো হ’ল, বিনয় চন্দৰ মাতৃৰ নামত ১৯৬৪ চনৰ শৰণাৰ্থীৰ প্ৰমাণপত্ৰ আছে। কিন্তু শেহতীয়াকৈ শৰণাৰ্থীৰ প্ৰমাণপত্ৰক এন আৰ চিত নাম অন্তৰ্ভুক্তিৰ বাবে বৈধ নথি হিচাপে অগ্ৰাহ্য কৰিবলৈ প্ৰতীক হাজেলাই উচ্চতম ন্যায়ালয়ক পৰামৰ্শ দিয়া বুলি সংবাদ মাধ্যমৰ যোগে ৰাইজে জানিব পাৰিছে। এইবোৰ কাৰণতো অতি হতাশ হৈ পৰিছিল বিনয় আৰু তেওঁৰ পৰিয়ালটো।
আনহাতে ১৯৬৪ চনৰে শৰণাৰ্থীৰ পিছতো বিদেশী ন্যায়াধিকৰণ আদালতে হাৰাশাস্তি কৰাৰ অভিযোগ উত্থাপন কৰিছে সদৌ অসম বাঙালী যুৱ ছাত্ৰ ফেডাৰেইশ্যনৰ বাক্সা জিলা সমিতিয়ে। সংগঠনটোৰ বাক্সা জিলা সমিতিৰ সভাপতি অধীৰ আৰ্য্য স্বাক্ষৰিত এক প্ৰেছ বিজ্ঞপ্তিতত প্ৰকাশ যে বিদেশী ন্যায়াধিকৰণে প্ৰকৃত ভাৰতীয় হোৱাৰ নথি-পত্ৰ থকাৰ পিছতো পৰিয়ালটোক বিদেশী সজাই হাৰাশাস্তি কৰিছিল।
ইফালে গোচৰটো চলাই থকা বিনয়ৰ অধিবক্তাই তেওঁলোকৰ গোচৰটোত জয়ৰ সম্ভাৱনা খুব কম আছে আৰু উচ্চ ন্যায়ালয়ৰ কাষ চাপিব লাগিব পাৰে বুলি কোৱাৰ পিছতে তেওঁ আত্মহত্যাৰ পথ বাছি লয় বুলি সংগঠনটোৱে প্ৰেছ বিজ্ঞপ্তিত উল্লেখ কৰিছে।
তাৎপৰ্য্যপূৰ্ণভাৱে বিনয় চন্দৰ ককায়েকৰ নামতো ডি ভোটাৰৰ গোচৰ চলিছিল বিদেশী ন্যায়াধিকৰণত। কিন্তু একেখিনি নথি-পত্ৰকে দেখুৱাই সেই গোচৰৰ পৰা ৰেহাই পাইছিল ককায়েকে।
ঘটনা সন্দৰ্ভত পৰিয়ালৰ লোকে তামুলপুৰ থানাত ন্যায়াধিকৰণ আদালতত চলা গোচৰৰ বাবেই আত্মহত্যা কৰা বুলি এজাহাৰ দাখিল কৰিছে। আৰক্ষীয়ে আত্মহত্যাৰ তদন্ত কৰি থকা বুলি জনাইছে।
