শিৱসাগৰ জিলাৰ গৌৰীসাগৰ থানাৰ অন্তৰ্গত চাৰিং বাৰুৱতী গাঁৱত আজি দুপৰীয়া এজনী কন্যাশিশুক এটা ফেৰিৱালাই নিজ গৃহতেই যৌন নিৰ্যাতন চলোৱাৰ ভয়ংকৰ খবৰে অঞ্চলটোত তীব্ৰ চাঞ্চল্যৰ সৃষ্টি হৈছে৷
ঘটনাৰ বিৱৰণি মতে আজি দুপৰীয়া প্ৰায় বাৰ বজাত আন দিনাৰ দৰেই চিনাকী ফেৰীৱালাটো গাওঁখনৰ সেই শিশুটিৰ ঘৰত সোমায়৷
সেই সময়ত বাহিৰত মূষলধাৰ বৰষুণ৷ কন্যাশিশুটিৰ পিতৃ টিভি চোৱাত ব্যস্ত আছিল৷ মাতৃও পাক ঘৰত ইটো সিটো কাম কৰি আছে ৷ তেনে সময়তে চিনাকী ফেৰিৱালাজন দেখি নিঃসংকোচে বাহিৰলৈ ওলাই আহিছিল দ্বিতীয় শ্ৰেণীত পঢ়া কন্যাশিশুটি৷
লম্পট ফেৰিৱালাজনে এনে সুযোগতে কন্যাশিশুক বাহিৰৰ এখন বেঞ্চত নেইল-প’লিছ লগোৱাৰ অচিলা লৈ বিভিন্ন কথা কৈ কৈ শৰীৰৰ আপত্তিজনক ঠাইত স্পৰ্শ কৰে৷ ইতিমধ্যে কন্যাশিশুটিৰ পিতৃয়ে বাহিৰত কোনে কথা পাতি আছে সেয়া চাবলৈ আহি নিজ কন্যাক ফেৰীৱালাটোৱে যৌন নিৰ্যাতন চলোৱা দেখি অগ্নিশৰ্মা হৈ লম্পট চৰিত্ৰৰ ফেৰিৱালাজনক মাৰ-ধৰ কৰাৰ উপৰিও তেওঁৰ গাৰ কানি-কাপোৰ ফালি চিৰি পেলায়৷ পাছত অপৰাধীজনক ঘৰতে বহুৱাই থৈ গৌৰীসাগৰ থানাত এই ঘটনাটো অৱগত কৰাৰ বাবে ওলাই যায়।
অনহাতে আৰক্ষী অহাৰ পূৰ্বেই চতুৰ ফেৰিৱালাজনে কন্যাশিশুটিৰ দেউতাকৰ চাইকেলখন লৈ পলায়ন কৰে৷ উল্লেখ্য্য যে ধাৰাসাৰ বৰষুণ দি থকাৰ বাবে শিশুটিৰ পিতৃয়ে ওচৰৰ কাকো এই সন্দৰ্ভত খবৰ নিদিয়াকৈ থানালৈ ওলাই যোৱাৰ সুযোগ ললে লম্পট ফেৰিৱালাজনে৷
ইতিমধ্যে গৌৰীসাগৰ আৰক্ষীয়ে ঘটনাস্থলীত উপস্থিত হৈ তদন্ত আৰম্ভ কৰিছে।
