ভাৰতৰ সৰ্ববৃহৎ প্ৰতিৰক্ষা চুক্তি হিচাপে খ্যাতি অৰ্জন কৰা ৩৬খন ৰাফেল যুদ্ধ বিমান ক্ৰয়ত বিজেপি চৰকাৰে বৃহৎ কেলেংকাৰী সংঘটিত কৰা বুলি মাজুলীত আজি কংগ্ৰেছে এক সংবাদমেল যোগে অভিযোগ কৰে।
মাজুলীৰ ৰাজীৱ ভৱনত আয়োজন কৰা উক্ত সংবাদমেলত প্ৰাক্তন মন্ত্ৰী ৰাজীৱ লোচন পেগু আৰু প্ৰদেশ কংগ্ৰেছৰ সম্পাদক মৃদুল মালাকাৰ উপস্থিত থাকি কয় যে ইউ পি এ চৰকাৰে তেওলোকৰ কাৰ্যকালত আহ্বান জনোৱা নিবিদা অনুসৰি ২০১২ চনৰ ১২ ডিচেম্বৰত প্ৰতিখন ৰাফেল যুদ্ধ বিমানৰ আন্তঃৰাষ্ট্ৰীয় বজাৰ মূল্য ৫২৬.১০ কোটি টকা আছিল।
সেই অনুসৰি ৩৬ খন ৰাফেল যুদ্ধ বিমানৰ মূল্য হয়গৈ ১৮,৯৪০ কোটি টকা। কিন্তু মোডী চৰকাৰে প্ৰতিখন ৰাফেল যুদ্ধ বিমান ১৬৭০.৭০ কোটি টকাকৈ ক্ৰয় কৰি ৩৬ খন বিমানত মুঠ ৬০,১৪৫ কোটি টকা ব্যয় কৰে বুলি তেওঁলোকে সদৰী কৰে।
সংবাদমেলত তেওঁলোকে লগতে প্ৰকাশ কৰে যে ডাছল্ট এভিয়েচনৰ ২০১৬ চনৰ বাৰ্ষিক প্ৰতিবেদন আৰু ৰিলায়েন্সে ২০১৭ চনৰ ১৬ ফেব্ৰুৱাৰীত প্ৰকাশ কৰা প্ৰেছ বিবৃতিত এই মূল্য উল্লেখ আছে।
মোদী চৰকাৰে ৰাফেল বিমান ক্ৰয় কৰাৰ ক্ষেত্ৰত অতিৰিক্তভাৱে ৪১,২০৫ কোটি টকাৰ ৰাজহুৱা ধন অপব্যৱহাৰৰ কাৰণ দাঙি ধৰিব পাৰিবনে বুলিও দলটোৱে প্ৰশ্ন কৰে।