নগাঁও ক্ৰীড়া সংস্থা আৰু জিলা প্ৰশাসনৰ উদ্যোগত নগাঁৱৰ খগেন মহন্ত প্ৰেক্ষাগৃহত সম্বৰ্ধনা গ্ৰহণ কৰি স্ব-গৃহাভিমুখী হোৱা স্বৰ্ণকন্যা হিমা দাস বিয়লি উপস্থিত হয় বটদ্ৰৱা থানত। মহাপুৰুষ শ্ৰীমন্ত শংকৰদেৱৰ তিৰোভাৱ তিথিৰ পৱিত্ৰ দিনটোত বিয়লি প্ৰায় ৩:৩০ বজাত হিমা বটদ্ৰৱা থানত উপস্থিত হয়।
বটদ্ৰৱা থানত উপস্থিত হোৱাৰ লগে লগে গুৰু কীৰ্তন উপলক্ষে থানত সমবেত হাজাৰ হাজাৰ তীৰ্থযাত্ৰীয়ে আগুৰি ধৰি মৰম, আদৰ জনায় অসমী আইৰ সুযোগ্যা সন্তানগৰাকীক। ৰাইজৰ মৰম-আদৰ সাদৰেৰে গ্ৰহণ কৰি এথলেটগৰাকীয়ে কীৰ্তন ঘৰত মূৰ দোৱাই সেৱা জনাই আশীৰ্বাদ গ্ৰহণ কৰে।
নৰোৱা সত্ৰৰ সত্ৰাধিকাৰ দেবানন্দ দেৱ গোস্বামীয়ে নিৰ্মালি প্ৰদান কৰি আশিস বাণী প্ৰদান কৰে। তাৰ পাছতে গুৰুজনাই ব্যৱহাৰ কৰা ঐতিহাসিক পাটনাদটোৰ কাষতে হিমা আৰু প্ৰশিক্ষকদ্বয়ে একোটিকৈ গছপুলি ৰোপণ কৰে। হিমাই ৰোপণ কৰে এটি বকুলৰ পুলি।
বটদ্ৰৱা থানত উপস্থিত হোৱা খেলুৱৈগৰাকীক পৰিচালনা সমিতিয়ে বাটচ’ৰাৰ পৰা আদৰি নিয়ে। কীৰ্তনঘৰত সেৱা জনোৱাৰ পিছত থান পৰিচালনা সমিতিৰ হৈ কাৰ্যকৰী সভাপতি, সাধাৰণ সম্পাদক সহিতে সদস্যসকলে গামোচা, শৰাই, কুঁহিলা কঠ, গ্ৰন্থৰ টোপোলা আদিৰে সম্বৰ্ধনা জনায়৷
ইয়াৰ উপৰি থান প্ৰাংগণৰ ভিতৰে-বাহিৰে বৃহত্তৰ বটদ্ৰৱা এলেকাৰ বিভিন্ন অনুষ্ঠান-প্ৰতিষ্ঠান তথা ব্যক্তি বিশেষৰ লগতে বিভিন্ন স্থানৰ তীৰ্থযাত্ৰীসকলে স্বৰ্ণকন্যাক মৰমতে মূৰে-কপালে হাত বোলাই অনাগত দিনবোৰৰ বাবে আশীৰ্বাদ প্ৰদান কৰে।
নগাঁৱৰ পৰা বৰদোৱালৈকে সমগ্ৰ পথছোৱাত হুজগাঁও, চিলঙনি, ৰাইদঙীয়া, ভোমোৰাগুৰি, ভেটিয়নি, শান্তিজান পাৰ আদিটো গুণমুগ্ধসকলে ব্যাপক উৎসাহেৰে হিমাক বিপুল সম্বৰ্ধনা জনায়।
বটদ্ৰৱা থানৰ পৰা সমদলেৰে হিমা দাস গৃহভূমি ধিং অভিমুখে ৰাওঁনা হয়৷ বটদ্ৰৱাৰ পৰা ধিঙলৈকে পথছোৱাত জামতলা, কদমনি, ধূপগুৰি, চমুৱাগাঁও আদিতো বহু লোক সমবেত হৈ স্বৰ্ণকন্যা হিমা দাসক আদৰণি জনায়।
