শনিবাৰে অসম প্ৰদেশ মহিলা কংগ্ৰেছৰ উদ্যোগত আয়োজিত ল’গ’ বা প্ৰতীক চিহ্ন তথা পতাকা উন্মোচনী অনুষ্ঠানত পতাকাখন উন্মোচন কৰে অসম প্ৰদেশ মহিলা কংগ্ৰেছৰ সভানেত্ৰী শ্বেহনাজ হক চৌধুৰীয়ে।
উল্লেখ্য যে, মহিলা কংগ্ৰেছে ৩২ বছৰৰ পূৰ্বে আজিৰ দিনটোতে প্ৰতিষ্ঠা লাভ কৰিছিল যদিও তেওঁলোকৰ এখন নিজাববীয়া পতাকা নাছিল। কিন্তু আজি মহিলা কংগ্ৰেছে নিজাববীয়াকৈ এখন পতাকা তথা প্ৰতীক চিহ্ন উন্মোচন কৰে।
উক্ত পতাকা উন্মোচনী কাৰ্য্যসূচীত প্ৰাক্তন মুখ্য মন্ত্ৰী ভূমিধৰ বৰ্মন, বিৰোধী দলপতি দেৱব্ৰত শইকীয়া, প্ৰাক্তন মন্ত্ৰী তথা প্ৰদেশ কংগ্ৰেছৰ উপ সভাপতি শৰৎ বৰকটকীকে ধৰি মহিলা প্ৰদেশ কংগ্ৰেছৰ অন্যান্য বিষয় ববীয়াসকল উপস্থিত থাকে।
উন্মোচনী সভাত উপস্থিত থাকি প্ৰাক্তন মুখ্য মন্ত্ৰী ভূমিধৰ বৰ্মনে কয় যে মহিলাসকলে স্বাধীনতা দিৱসত গুৰুত্বপূৰ্ণ ভূমিকা পালন কৰিছিল।গতিকে অনাগত দিনবোৰতো অসম প্ৰদেশ কংগ্ৰেছ কমিটিৰ মহিলাসকলে কংগ্ৰেছ দলৰ হৈ নিষ্ঠাৰে কাম কৰি কংগ্ৰেছ দলৰ প্ৰাৰ্থীসকলক জয়ী কৰাত গুৰুত্বপূৰ্ণ ভূমিকা গ্ৰহণ কৰিব বুলিও আশা প্ৰকাশ কৰে।
তেওঁ লগতে কয়, “ইন্দিৰা গান্ধীয়ে পৃথিৱীৰ ভিতৰত শ্ৰেষ্ঠ মহিলাৰ সন্মান পাইছিল। তেওঁৰ আদৰ্শ গ্ৰহণ কৰি সকলো মহিলাই নতুন উদ্যমেৰে কাম কৰি যাব লাগে।”
আনহাতে, সভাখনত ভাষণ প্ৰদান কৰি বিৰোধী দলপতি দেবব্ৰত শইকীয়াই কয় যে নতুন পতাকাৰ জৰিয়তে মহিলা কংগ্ৰেছে ন-ন পদক্ষেপ হাতত ৰাখি সমাজত প্ৰতিষ্ঠা লাভ কৰিব পাৰিব।
তেওঁ লগতে কয় “ইন্দিৰা গান্ধী আৰু সৰোজিনী নাইডুকে মুখ্য কৰি অন্যান্য বহু মহিলাই স্বাধীনতা আন্দোলনৰ সময়ত অগ্ৰণী ভূমিকা গ্ৰহণ কৰি আহিছিল আৰু বৰ্তমানেও মহিলাসকলে সমাজত বহু অবদান আগবঢ়াই আহিছে। মহিলাৰ সমাজৰ প্ৰতি অবদান স্বীকাৰ কৰিব লাগিব।”
আনহাতে, ‘বিজেপি দলৰ মহিলাসকলৰ প্ৰতি থকা দৃষ্টিভংগি বিজ্ঞানসন্মত নহয় বুলি’ দাবী কৰি তেওঁ কয় “বিজেপিয়ে এটা পুৰণিক’লীয়া মনোভাব লৈ আছে মহিলাসকলৰ প্ৰতি। তেওঁলোকৰ মতে মহিলাসকল ঘৰতেই থাকিব লাগে, সমাজলৈ আগুৱাই আহিব নালাগে। কিন্তু কংগ্ৰেছৰ সেইটো নীতি নাই।”
তেওঁ লগতে কয়, “কংগ্ৰেছে সকলো মহিলাকে সুযোগ-সুবিধা দিবলৈ বিচাৰে। গতিকে বৰ্তমান সময়ত মহিলা কংগ্ৰেছৰ যোগেদি মহিলাসকলে নিৰ্বাচনৰ সময়ত সক্ৰিয়তা দেখুৱাব লাগিব।”
আনহাতে, উক্ত সভাতে উপস্থিত থাকি প্ৰাক্তন কংগ্ৰেছী মন্ত্ৰী তথা জ্যেষ্ঠ নেতা শৰৎ বৰকটকীয়ে কয় যে শ্বেহনাজ হকৰ নেতৃত্বত অসমত মহিলা কংগ্ৰেছে অগ্ৰগতি লাভ কৰিছে। তেওঁ লগতে কয় যে মহিলা সমিতিৰ সভা সমিতি পূৰ্বৰ তুলনাত বৃদ্ধি হৈছে।
আনহাতে, তেওঁৰ মতে ৰাহুল গান্ধীয়ে অসম প্ৰদেশ কংগ্ৰেছৰ প্ৰতি বেছিকৈ গুৰুত্ব প্ৰদান কৰে বাবে সুস্মিতা দেবক অসমৰ হ’লেও মহিলা কংগ্ৰেছৰ সভানেত্ৰী পদত অধিষ্ঠিত কৰিছে।
তদুপৰি প্ৰাক্তন মন্ত্ৰীগৰাকীয়ে উক্ত সভাতে বিজেপি নেতৃত্বাধীন ৰাজ্য চৰকাৰক সমালোচনা কৰি কয়, “বিজেপিয়ে কেৱল ঘোষণাৰ পাছত ঘোষণা কৰিছে, কামত একো নাই।”
আনহাতে, প্ৰাক্তন মন্ত্ৰীগৰাকীয়ে আগন্তুক পঞ্চায়ত আৰু লোকসভা নিৰ্বাচনত মহিলা ওলাই আহি কংগ্ৰেছক জিকোৱাত সহায় কৰিব বুলিও আশা প্ৰকাশ কৰে।
