কাইলৈ অসমীয়া জাতীয় জীৱনৰ মহান ব্যক্তিত্ব শ্ৰীমন্ত শংকৰদেৱৰ ৫৭০ সংখ্যক জন্মজয়ন্তীৰ প্ৰাকক্ষণত বিতৰ্কৰ সূত্ৰপাত ঘটিছে বৈষ্ণৱ গুৰুজনাৰ জন্মস্থান বটদ্ৰৱাত। শ্ৰীশ্ৰী বটদ্ৰৱা থানত আজিৰ পৰাই আৰম্ভ হোৱা গুৰুজনাৰ ৫৭০ সংখ্যক আৰ্বিভাৱ মহোৎসৱৰ কাৰ্য্যসূচীক কেন্দ্ৰ কৰি সৃষ্টি হৈছে এই বিতৰ্ক।
থান পৰিচালনা সমিতিৰ বিৰুদ্ধে স্থানীয় ভালে সংখ্যক লোকে এই ধৰ্মীয় আৰু সংস্কৃতি বিষয়ক অনুষ্ঠানটোক ৰাজনৈতিক প্ৰচাৰৰ মঞ্চলৈ পৰিৱৰ্তন কৰাৰ অভিযোগ আনিছে। অভিযোগ মতে, ধৰ্মালোচনী সভালৈ গৱেষক, পণ্ডিতৰ বিপৰীতে ৰাজনৈতিক নেতা, মন্ত্ৰী, বিধায়ককহে মাতিছে পৰিচালনা সমিতিয়ে। আনহাতে বঙালী সংস্কৃতি আমদানি কৰি সত্ৰীয়া পৰিৱেশ বিনষ্ট কৰাৰো অভিযোগ তুলিছে স্থানীয় ৰাইজে।
উল্লেখযোগ্য যে বিগত প্ৰায় তিনিটা বছৰত পৰিচালনা সমিতিৰ একাংশ বিষয়ববীয়াৰ পৃষ্ঠপোষকতাত এটি বিশেষ ৰাজনৈতিক দলৰ কুচকাৱাজৰ থলীত পৰিণত হৈছে ঐতিহ্যমণ্ডিত বটদ্ৰবা থানখন৷
তাৎপৰ্য্যপূৰ্ণভাৱে এবছৰ পূৰ্বে বটদ্ৰৱা থানৰ নামঘৰৰ ভিতৰতে আৰ এছ এছৰ প্ৰশিক্ষণ শিবিৰো আয়োজন কৰা হৈছিল। মহাপুৰুষজনাৰ আদৰ্শৰ পৰিপন্থী, ধৰ্মীয় উগ্ৰতা আৰু অসিহষ্ণুতাৰ দ্বাৰা পৰিচালিত এটা ধৰ্ম ভিত্তিক সংগঠনক থানখনত ঠাই দিয়া বাবে তেতিয়াও স্থানীয় লোকৰ মাজত অসন্তুষ্টিয়ে দেখা দিছিল।
স্থানীয় লোকে জানিবলৈ দিয়ামতে, তিনিদিনীয়া কাৰ্যসূচীৰে আয়োজিত গুৰুজয়ন্তী উৎসৱৰ লগত সংগতি ৰাখি ২০ ছেপ্টেম্বৰত আয়োজিত ধৰ্মালোচনী সভালৈ মহাপুৰুষজনা আৰু তেওঁৰ কৰ্মৰাজিক লৈ গৱেষণা কৰা গৱেষক, পণ্ডিতৰ পৰিৱৰ্তে শাসকীয় দলৰ মন্ত্ৰী, দলৰ সভাপতি, বিধায়ক তথা টিভি চেনেলৰ স্বত্বধিকাৰীকহে নিমন্ত্ৰণ কৰা হৈছে। আনকি শাসকীয় দলৰ মন্ত্ৰী, বিধায়কৰ বাহিৰে স্থানীয় সাংসদ তথা অন্যান্য বিৰোধী দলৰ কোনো ব্যক্তিকো আমন্ত্ৰণ জনোৱা হোৱা নাই গুৰুজয়ন্তীৰ কাৰ্যসূচীলৈ৷
এই ক্ষেত্ৰত বিশেষ ভূমিকা পালন কৰিছে সমিতিখনৰ এজন শক্তিশালী বিষয়াই৷ এই বিষয়ত সমিতিৰ ভিতৰ চ’ৰাতেই মতানৈক্যৰ সৃষ্টি হোৱা বুলিও জানিবলৈ দিয়ে একাংশ সদস্যই৷
ইপিনে এইবাৰ গুৰুজয়ন্তীত ৰাইজে থানখনৰ বাবে দান কৰা ধনেৰে বঙালী সংস্কৃতি আমদানি কৰি থানখনৰ চৌহদত বিভিন্ন ‘আলোক ব’ৰ্ড’ লগাই এক অশুভনীয় পৰিৱেশ সৃষ্টি কৰিছে পৰিচালনা সমিতিয়ে৷ স্থানীয় ৰাইজে তীব্ৰ আপত্তি দৰ্শাই কয় যে এনে বঙালী সংস্কৃতিয়ে ঐতিহ্যমণ্ডিত থানখনলৈ সম্পূৰ্ণ দুৰ্গা পূজাৰ পৰিৱেশহে আনি দিছে।
উল্লেখ্য যে, এইবাৰো ১৮, ১৯ আৰু ২০ ছেপ্টেম্বৰত বিগত বৰ্ষসমূহৰ দৰেই তিনিদিনীয়া বিভিন্ন কাৰ্যসূচী গ্ৰহণ কৰিছে বটদ্ৰৱা থান পৰিচালনা সমিতিয়ে৷
