চেন্নাইত অনুষ্ঠিত হৈ থকা বিজয় হাজাৰে ট্ৰফী এদিনীয়া ক্ৰিকেটত অব্যাহত আছে অসমৰ শোচনীয় প্ৰদৰ্শন। আজি ঝাৰখণ্ডৰ বিৰুদ্ধে অনুষ্ঠিত হোৱা মেচখনতো লজ্জাজনকভাৱে ৮ উইকেটত পৰাস্ত হয় অসম।
চেন্নাইৰ এম এ চিদাম্বৰম ষ্টেডিয়ামত অনুষ্ঠিত হোৱা মেচখনত অসমে প্ৰথমে বেট ধৰি নিৰ্ধাৰিত ৫০ অভাৰত ৯টা উইকেট হেৰুৱাই ২২১ ৰান সংগ্ৰহ কৰিবলৈ সক্ষম হয়। শিৱশংকৰ ৰয়ৰ ৪৬, ৱাছিকুৰ ৰহমানৰ ৪৩ আৰু ৰোমাৰি’অ শৰ্মাৰ ৪২ ৰানৰ বাহিৰে কোনো এজন বেটছমেনে ঝাৰখণ্ডৰ বলিঙ আক্ৰমণক উচিত প্ৰত্যুত্তৰ দিব নোৱাৰিলে।
ঝাৰখণ্ডৰ হৈ বৰুন এৰনে ১টা, ৰাহুল শুক্লাই ২টা, স্পীনাৰ চাহবাজ নাডীমে ৩টা আৰু উৎকৰ্ষ সিঙে ২ উইকেট লাভ কৰিবলৈ সক্ষম হয়।
ইফালে ২২২ ৰানৰ লক্ষ্য আগত লৈ বেটিং কৰিবলৈ অহা ঝাৰখণ্ড দলে মাত্ৰ ৩১ অভাৰতে দুটা উইকেট হেৰুৱাই বিজয় লক্ষ্যত উপনীত হয়। ঝাৰখণ্ড দলৰ হৈ অপেনাৰ ইষান কিষানে দুৰ্দান্ত বেটিঙেৰে মাত্ৰ ৯১টা বলত ১৩৯ ৰানৰ বিস্ফোৰক শতকীয় ইনিংছ খেলাৰ লগতে আনন্দ সিঙেও ৫৮ ৰানৰ এক গুৰুত্বপূৰ্ণ ইনিংছ খেলি ঝাৰখণ্ডক সহজে বিজয়ত উপনীত কৰে।
অসমৰ হৈ মুখতাৰ হুছেইনে দুয়োটা উইকেট লাভ কৰে। মুখতাৰৰ বাহিৰে অসমৰ কোনো এজন বলাৰে মেচখনত ঝাৰখণ্ডৰ বেটছমেনক প্ৰত্যাহ্বান জনোৱাত ব্যৰ্থ হয়।
উল্লেখযোগ্য যে ১৯ ছেপ্তেম্বৰত গুজৰাট আৰু অসমৰ খেলখন পৰিত্যক্ত বতৰৰ বাবে বাতিল হোৱাৰ পাছত দ্বিতীয়খন খেলত হাৰিয়ানাৰ বিপক্ষে অসমে মাত্ৰ ৮১ ৰানতে ইনিংছ সামৰি লজ্জাজনকভাৱে পৰাস্ত হৈছিল।
ইফালে অসমে অহা ২৭ ছেপ্তেম্বৰত তামিলনাডুৰ বিপক্ষে পৰৱৰ্তী মেচত অৱতীৰ্ণ হ’ব।
