স্বাধীনতাৰ ৭১ বছৰ পাছতো কাৰ্বি আংলংবাসীৰ বাবে এতিয়াও নিৰক্ষৰতা এক জ্বলন্ত সমস্যা হৈয়ে আছে। শিক্ষাৰ অভাৱৰ বাবেই আজিও অন্ধবিশ্বাস, কুসংস্কাৰ আৰু উৰা বাতৰিৰ কু প্ৰভাৱৰ পৰা মুক্ত হ’ব পৰা নাই কাৰ্বি আংলঙৰ বহু লোক।
বৃহস্পতিবাৰে গুৱাহাটী প্ৰেছ ক্লাবত এখন সংবাদমেল সম্বোধন কৰি এই কথা আক্ষেপেৰে কয় জইন্ট একশ্যন কমিটি ফ’ৰ অটন’মাছ ষ্টেট চমুকৈ জাকাচৰ অধ্যক্ষ খৰচিং টেৰণে।
টেৰণে কয়, ‘’যি সময়ত অসম চৰকাৰৰ শিক্ষা বিভাগে ৰাজ্যত ‘গুণোৎসৱ’ পাতিছিল, সেই সময়ত কাৰ্বি আংলঙত এশতকৈও অধিক বিদ্যালয় শিক্ষক শূন্য আছিল। তেনেকুৱা এটা অৱস্থাত কাৰ্বি আংলঙত শিক্ষিতৰ সংখ্যা কেনেকৈ বাঢ়িব?’’
উল্লেখ্য যে, যোৱা জুন মাহত জিলাখনৰ ডকমকা থানাৰ পানজুৰিৰ কছাৰি গাঁৱত সংঘটিত নীলোৎপল দাস আৰু অভিজিৎ নাথৰ হত্যাকাণ্ডৰ প্ৰসংগ উত্থাপন কৰি টেৰণে কয় যে এই ঘটনা কেৱল তাৰ মানুহৰ শিক্ষাৰ অভাৱৰ বাবেই ঘটিছিল। নিৰক্ষৰতাৰ বাবেই তাত মানুহৰ মাজত অন্ধবিশ্বাস, উৰাবাতৰি শিপাবলৈ পাইছিল আৰু তাৰ ফলশ্ৰুতিতেই এই অমানৱীয় কাণ্ড সংঘটিত হৈছিল বুলি তেওঁ দাবী কৰে।
একেটা প্ৰসংগতে খৰচিং টেৰণে সংবাদমাধ্যম, ছ’চিয়েল মিডিয়াৰ লগতে বিভিন্ন ক্ষেত্ৰত এতিয়াও জুন মাহৰ সেই ঘটনাৰ কথা চৰ্চিত হৈ থকাক লৈ দুখ প্ৰকাশ কৰে।
‘’নীলোৎপল আৰু অভিজিতৰ হত্যাকাণ্ডৰ ঘটনাৰ তদন্ত কৰি দোষীক উচিত শাস্তি প্ৰদান কৰিব লাগে আৰু তেওঁলোকৰ পৰিয়াল দুটাই ন্যায় পাব লাগে। কিন্তু বৰ্বৰ ঘটনাৰ এতিয়াও বাৰে বাৰে চৰ্চিত হৈ আছে। ক’ৰবাত এনেকুৱা ঘটনা ঘটিলেই বাৰে বাৰে কাৰ্বি আংলঙত সংঘটিত সেই ঘটনাটোৰ প্ৰসংগ টানি অনা হয়। ইয়াৰ দ্বাৰা জিলাখনৰ লোকসকলক আঘাত হনা হৈ আছে আৰু আন প্ৰান্তৰ মানুহৰ মনত আমাৰ প্ৰতি ঘৃণাৰ ভাৱৰ সৃষ্টি কৰা হৈ আছে। গতিকে কাৰ্বি আংলঙৰ লোকসকলকো ন্যায় দিয়াৰ প্ৰয়োজন আছে,’’ খৰচিং টেৰণে কয়।
ইপিনে, এই সংবাদমেলতেই বিশিষ্ট সাংবাদিক ধীৰেন্দ্ৰ নাথ চক্ৰবৰ্তীয়ে পূৰ্বেত তিনিখনকৈ সংবাদমেলত কাৰ্বি আংলঙ, ডিমা হাচাও, বৰাক উপত্যকা আৰু বিটিএডিৰ জিলাকেইখনক অসমৰ পৃথক কৰি দিব লাগে বুলি কৰা মন্তব্যৰ তেওঁ বিৰোধিতা কৰে।
তেওঁ কয়, ‘’আমি অসমৰ পৰা পৃথক হৈ যাব বিচৰা নাই। অসমৰ মাজত থাকিয়েই স্বায়ত্ব শাসিত ৰাজ্যৰ মৰ্যাদা বিচাৰো। চক্ৰৱৰ্তীৰ এই কথাৰ দ্বাৰা আমাক ঘিণ কৰাটোহে সূচাইছে।যদি তেওঁ কোৱাৰ নিচিনাকৈ আমাক ‘কলংক’ বুলি ভাৱে তেতিয়াহ’লে আমাক পৃথক কৰি দিয়ক।’’
একেখন সংবাদমেলতে ১৫ টা অজনজাতীয় সংগঠনে কাৰ্বি আংলং স্বায়ত্ব শাসিত পৰিষদে নিজে আইন প্ৰণয়ণ কৰিব পৰা ক্ষমতাৰ বিৰোধিতা কৰা কাৰ্যকো ধিক্কাৰ দিয়ে। এই সন্দৰ্ভত টেৰণে কয় যে গুৱাহাটী উচ্চ ন্যায়ালয়েই কাৰ্বি আংলং স্বায়ত্ব শাসিত পৰিষদক এই অধিকাৰ প্ৰদান কৰিছে।
ইয়াৰ উপৰিও অসমীয়া যুৱ মঞ্চৰ সাধাৰণ সম্পাদক জিতুল ডেকাই কাৰ্বি আংলঙৰ কোনো সংগঠনে আহ্বান কৰা বন্ধৰ বিৰোধিতা কৰি আদালতত ৰাজহুৱা স্বাৰ্থজড়িত আবেদন দাখিল কৰা কাৰ্যৰো খৰচিং টেৰণে বিৰোধিতা কৰে।
তেওঁ কয়, ‘‘জিতুল ডেকাই ভাৰত বন্ধকে ধৰি আন আন সমুহত নিৰৱে থাকে, কিন্তু কাৰ্বি সংগঠনে বন্ধ ঘোষণা কৰিলেই তেওঁ তাৰ বিৰোধিতা কৰে। এই কাৰ্যই তেওঁৰ কাৰ্বি বিৰোধী স্থিতিক প্ৰকাশ কৰিছে।‘’
