ৰাজ্যত ভেন্সাৰ স্কুলসমূহৰ প্ৰাদেশিকীকৰণৰ বিষয়টো ইমানেই জটিল কৰি তোলা হৈছে যে শিক্ষাখণ্ডৰ এই বিদ্যালয়সমূহৰ ছাত্ৰ-ছাত্ৰী তথা শিক্ষকসকল প্ৰকৃততে শিক্ষা ব্যৱস্থাৰ বঞ্চনাৰ বলি হ’বলগীয়া হৈছে। দীৰ্ঘদিন ধৰি শিক্ষকসকলে নিজৰ চাকৰিৰ নিৰাপত্তাৰ বাবে সংগ্ৰাম কৰি থাকি ছাত্ৰ-ছাত্ৰীৰ বাবে কেনেদৰে উন্নত মানৰ শিক্ষা আগবঢ়াব সেয়া এক জটিল প্ৰশ্ন।
১৯৯৪ চনৰ পৰা ৰাজ্যত মধ্য ইংৰাজী বিদ্যালয়সমূহৰ স্বীকৃতি বন্ধ ৰখাৰ ফলত ৰাইজে নিৰ্মাণ কৰা চৰকাৰী খণ্ডৰ বিদ্যালয়সমূহ পৰৱৰ্তী পৰ্যায়ত ২০০৫ চনক ভিত্তিবৰ্ষ ধৰি স্বীকৃতি প্ৰদান কৰিছিল। কিন্তু প্ৰাদেশিকীকৰণ আইনৰ মেৰপেঁচত আজিও এই বিদ্যালয়সমূহ বঞ্চিত হৈ আহিছে।
আনহাতে, অসম শিক্ষানুষ্ঠান সেৱা পদ প্ৰাদেশিকীকৰণ আইন ২০১১’ সংশোধিত ২০১২-১৩ অনুযায়ী এই শিক্ষানুষ্ঠানসমূহ যোগ্য বিবেচিত হৈ প্ৰাদেশিকীকৰণৰ আশাত বন্দী হৈ থকা সময়ত গুৱাহাটী উচ্চ ন্যায়ালয়ে প্ৰাদেশিকীকৰণ আইন নাকচ কৰে।
ইয়াৰ পিছত বৰ্তমানৰ শাসনাধিষ্ঠিত চৰকাৰে অসম শিক্ষক কৰ্মচাৰী পদ প্ৰাদেশিকীকৰণ আইন ২০১৭’ বলৱৎ কৰে যদিও আসোঁৱাহপূৰ্ণ এই আইনে কিছু চৰ্ত আৰোপ কৰাত ২০০৫ চনত বলৱৎ হোৱাকৈ স্বীকৃতিপ্ৰাপ্ত কিন্তু ইচ্ছ্যু তাৰিখ ২০০৬ চনত থকাত প্ৰাদেশিকীকৰণৰ আশাত চেঁচা পানী পৰে।
ইপিনে আইন সংশোধনেৰে এই বিদ্যালয়সমূহৰ প্ৰাদেশিকীকৰণৰ দাবীত অহা ১ অক্টোবৰত বিধানসভাৰ সন্মুখত শিক্ষকসকলে পুৱা ১০ বজাৰ পৰা ধৰ্মঘটত বহিব বুলি আহ্বায়ক আবুল কালাম আজাদে জানিব দিয়ে।
