দেশে স্বাধীনতা লাভ কৰা ৭২ বছৰৰ পিছতো শিৱসাগৰ আৰু যোৰহাট দুয়োখন জিলাৰ সীমামূৰীয়া কৃষিপ্ৰধান অঞ্চল খনামুখবাসী ৰাইজ আজিও এখন চৰকাৰী চিকিৎসালয়ৰ পৰা বঞ্চিত। বিপৰীতে চিকিৎসালয় নিৰ্মাণৰ বাবে ভূমি দান কৰা ভূমিদাতা পৰিয়ালক প্ৰতাৰণা।
উল্লেখযোগ্য যে ১৯৯১ চনতে অনুষ্ঠিত এখন ৰাজহুৱা সভাত খনামুখ গাঁৱৰ ১ নং মাউট গাঁৱৰ দেবেন বৰা, বদন বৰা আৰু মঙল বৰাই প্ৰস্তাৱিত চিকিৎসালয়খনৰ চতুৰ্থ শ্ৰেণীৰ এটিকৈ পদৰ বিনিময়ত জকাইচুক মৌজাৰ অন্তৰ্গত মাউট ঘৰফলীয়া গাঁৱৰ ১০৫ নং ম্যাদী পট্টাৰ পাঁচবিঘা মাটি আগবঢ়াইছিল।
আৰু সেই অনুসৰি তদানীন্তন মুখ্য মন্ত্ৰী প্ৰয়াত হিতেশ্বৰ শইকীয়াই ১৯৯২ চনৰ ৩ জুনত ৩০ খন বিছনাযুক্ত খনামুখ প্ৰাথমিক স্বাস্থ্য কেন্দ্ৰৰ আধাৰশিলা স্থাপন কৰিছিল।
চিকিৎসালয়খনৰ নিৰ্মাণকাৰ্য অতি লেহেমীয়া গতিত আৰম্ভ হোৱাৰ পিছত অৱশেষত ২০১০ চনৰ ৩ আগষ্টত চিকিৎসালয়খন মুকলি কৰিবলৈ অাহি ভূমিদাতা আৰু স্থানীয় ৰাইজৰ ৰোষত পৰি উভতি যাব লগা হয়। ভূমিদাতা পৰিয়ালক চিকিৎসালয়খনত চতুৰ্থবৰ্গৰ পদত নিযুক্তি নিদিয়াৰ বাবে ভূমিদাতা পৰিয়াল আৰু স্থানীয় ৰাইজে তলা ওলমাই দিয়ে।
মন কৰিব লগীয়া যে ২০০৮ চনৰ ১ ডিচেম্বৰত শিৱসাগৰ আৱৰ্ত ভৱনত স্বাস্থ্য বিভাগৰ চতুৰ্থবৰ্গৰ পদত মকৰলৰ বাবে এক মৌখিক সাক্ষাৎকাৰ অনুষ্ঠিত হৈছিল। কিন্তু উক্ত সাক্ষাৎকাৰত অৱতীৰ্ণ ভূমিদাতা পৰিয়ালৰ এজন সদস্যকো বাছনি নকৰি বাহিৰৰ প্ৰাৰ্থীকহে উক্ত পদৰ বাবে বাছিন কৰিছিল।
ইফালে ২০১০ চনৰ ১৭ মে’ত অসমৰ তদানীন্তন স্বাস্থ্য মন্ত্ৰী হিমন্তবিশ্ব শৰ্মাক ভূমিদাতা দেবেন বৰাই গুৱাহাটীত সাক্ষাৎ কৰি উক্ত চিকিৎসালয়খনতে নাইবা অন্য কোনো চৰকাৰী বিভাগীয় কাৰ্যলয়ত ভূমিদাতা পৰিয়ালক মকৰল কৰিবলৈ দাবী জনাইছিল যদিও কোনো সুফল নাপালে।
এনে পৰিস্থিতিত কোটিটকীয়া চিকিৎসালয়খনৰ সা-সম্পত্তি নষ্ট হোৱাৰ লগতে চিকিৎসালয়খন হাবি-জংঘলেৰে ভৰি পৰিছে। ইয়াৰ মাজতে ৰাজ্যৰ শাসনৰ গাদীত পৰিৱৰ্তনকামী চৰকাৰ অহাৰ পিছতো আজিলৈও মুকলি নহ’ল খনামুখৰ চিকিৎসালয়।
বৰ্তমান গৰু গোহালিলৈ পৰিণত হৈছে চিকিৎসালয় চৌহদটো। ফলত স্থানীয় ৰাইজ ক্ষোভিত হৈ পৰিছে আৰু এই সন্দৰ্ভত মুখ্য মন্ত্ৰী গৰাকীৰ হস্তক্ষেপ কামনা কৰিছে।