ওদালগুৰি জিলাৰ টংলাৰ চিবাকাই সতীশ চন্দ্ৰ ৰাভা ছুমাৰছিনি মাপাক ডাম ক্ষেত্ৰত বুধবাৰৰ পৰা আৰম্ভ হোৱা ৰাভা সাহিত্য সভাৰ অধিৱেশনৰ দ্বিতীয় দিনটো বৰ্ণিল কাৰ্সূচীৰে সামৰণি পৰে। বুধবাৰে সভাৰ ৩৪ সংখ্যক অধিৱেশনখনি জিলাখনৰ বিশিষ্ট ব্যক্তিৰ উপস্থিতিত ৩৪ খন পতাকা উত্তোলনেৰে আৰম্ভ কৰা হৈছিল।
অধিৱেশনৰ দ্বিতীয় দিনা বহু লোকৰ সমাগম হয়। সভাৰ মুকলি মঞ্চত ৰাভা সাহিত্য সভাৰ সভাপতি অমৰ সিং কোচে ভাষণ দি কয় যে ৰাভা জনগোষ্ঠীয়ে তেওঁলোকৰ চহকী পৰম্পৰা,সংস্কৃতি আৰু ভাষা সঠিক ৰূপত ঘৰি ৰাখিব লাগে।
ৰাভা সাহিত্য সভাৰ উপ সভাপতি যতীন ৰাভাই স্মৃতি তৰ্পণ কৰাৰ পিছত বন্তি প্ৰজ্বলন কৰে আছুৰ সহকাৰী সাধাৰণ সম্পাদক জয়ন্ত কুমাৰ ভট্টাচাৰ্যই।
অধিৱেশনত ৰাভাসকলৰ ঐতিহাসিক জীৱন পৰম্পৰাৰ বিষয়ে অনুষ্ঠিত এটি মনোজ্ঞ অনুষ্ঠান উদ্বোধন কৰে বিশিষ্ট লেখক কুশোৰাজ ৰানকাহাই। এই অনুষ্ঠানত আলোচক হিচাপে উপস্থিত থাকে গুৱাহাটী বিশ্ববিদ্যালয়ৰ ইতিহাস বিভাগৰ অধ্যাপক ড০ যোগেশ ফুকন আৰু হিতেশ্বৰ শইকীয়া মহাবিদ্যালয়ৰ অধ্যক্ষ ড০ শিখামনি কোঁৱৰে।
ইয়াৰ পিছতে এখন ভলীবল প্ৰতিযোগিতাও অনুষ্ঠিত হয়। বিভিন্ন যুৱকৰ দলে অংশ গ্ৰহণ কৰা ভলীবল প্ৰতিযোগিতাখনে দৰ্শকক আকৰ্ষণ কৰে।
অধিৱেশনত এলানি গ্ৰন্থ উন্মোচনৰ কাৰ্যসূচী ৰূপায়ন কৰা হয়। ‘ছুনখাৰঙ’ নামৰ এখন মুখপত্ৰ, এখন স্মৃতিগ্ৰন্থ ‘কাৰানল’, ৰাভা শব্দমালাকে ধৰি এলানি গ্ৰন্থ এই গ্ৰন্থ উন্মোচনী অনুষ্ঠানত উন্মোচন কৰা হয়।
দ্বিতীয় দিনাৰ কাৰ্যসূচীত উপস্থিত আছিল আছুৰ সভাপতি দীপাংক কুমাৰ নাথ, ৰাভা হাছং স্বায়ত্ত্ব পৰিষদৰ উপাধ্যক্ষ ৰমাকান্ত ৰাভা, ৰাভা হাছঙৰ কাৰ্যবাহী সদস্য জীৱন ৰাভা, জয়ন্তী ৰাভা, সামাজিক কৰ্মী বীৰুবালা ৰাভা আৰু অভিনেতা তথা নাট্যকাৰ পৱিত্ৰ ৰাভাকে বহুতো গণ্য মান্য ব্যক্তি।
অধিৱেশনত এখন বহু ভাষিক কবি সন্মিলনো অনুষ্ঠিত হয়। সন্ধিয়া বিভিন্ন শিল্পীৰ দলে জনগোষ্ঠীয় সাংস্কৃতিক অনুষ্ঠান পৰিৱেশনেৰে দৰ্শকক আপ্লুত কৰে।
