পে’ট্ৰল-ডিজেলৰ অভাৱনীয় মূল্যবৃদ্ধিৰ পৰিপ্ৰেক্ষিতত সদৌ অসম বেচৰকাৰী বাছ মালিক সন্থাই ৩ অক্তোবৰৰ পৰা বাছভাৰা বৃদ্ধি কৰিব বুলি ঘোষণা কৰিছিল যদিও আজি সন্থাই ঘোষণা কৰিছে যে ১০ অক্তোবৰলৈ কোনো যাত্ৰীবাহী গাড়ীৰে ভাৰা বৃদ্ধি কৰা নহয়। মহানগৰ জিলা পৰিবহণ কাৰ্যালয়ত অনুষ্ঠিত এখন বৈঠকত বাছ মালিক সন্থাই এই সিদ্ধান্ত লয়।
জানিব পৰামতে, দুই-এদিনতে চৰকাৰৰ সৈতে হ’ব বাছ মালিক সন্থাৰ আলোচনা হোৱাৰ কথা। উক্ত আলোচনাৰ পিছতহে পৰৱৰ্তী সিদ্ধান্ত ল’ব বাছ মালিক সন্থাই।
উল্লেখযোগ্য যে পূৰ্বে এক জাননী যোগে ৩ অক্টোবৰৰ পৰা ৫০ শতাংশ ভাৰা বৃদ্ধিৰ কথা ঘোষণা কৰিছিল বাছ মালিক সন্থাই। তেওঁলোকে ইন্ধনৰ অভাৱনীয় আৰু ধাৰাবাহিক মূল্য বৃদ্ধিৰ পৰিপ্ৰেক্ষিতত চৰকাৰক ভাৰা বৃদ্ধিৰ বাবে বাৰম্বাৰ আৱেদন নিবেদন কৰি অহাৰ পিছতো সঁহাৰি নাপাই নিজাববীয়া সিদ্ধান্তৰে এই ঘোষণা কৰিছিল।
কিন্তু সন্থাই ঘোষণা কৰা নতুন নিৰিখক লৈ প্ৰতিক্ৰিয়াৰ সৃষ্টি হোৱাত আৰু চৰকাৰৰ পৰা কোনো সঁহাৰি নোপোৱাত চৰকাৰৰ সৈতে আলোচনা কৰিবলৈ সিদ্ধান্ত লোৱা হয় আজিৰ বৈঠকত।
